ఢిల్లీకి కేటీఆర్.. కేంద్ర పెద్దలతో భేటీ.. తెలంగాణ పాలిటిక్స్‌లో కీలక పరిణామం

తెలంగాణ రాజకీయాలు రోజు రోజుకు రసవత్తరంగా మారుతున్నాయి. అధికార, ప్రతిపక్ష పార్టీల మధ్య పచ్చగడ్డి వేసినా భగ్గుమనేలా పరిస్థితులున్నాయి. హైడ్రా కూల్చివేతలు, మూసీ ప్రక్షాళన అంశంతో పాటు పలు అంశాల విషయంలో రాష్ట్రంలో రాజకీయాలు హాట్ హాట్‌గా మారాయి. ఈ నేపథ్యంలో.. మరో కీలక పరిణామం చోటుచేసుకోనుంది. ప్రతిపక్ష పార్టీ నేత, బీఆర్ఎస్ వర్కింగ్ ప్రెసిడెంట్ కేటీఆర్.. ఈరోజు ఢిల్లీకి వెళ్లారు. కేంద్ర పెద్దలతో భేటీ కానున్నారు. రాష్ట్రంలో అధికారంలో ఉన్న కాంగ్రెస్ పార్టీతోనే కాకుండా కేంద్ర ప్రభుత్వంతోనూ గతం నుంచే బీఆర్ఎస్ పార్టీకి రాజకీయపరమైన శత్రుత్వం కొనసాగుతున్న నేపథ్యంలో.. కేంద్ర పెద్దలతో కేటీఆర్ భేటీ కానుండటం ఇప్పుడు సర్వత్రా చర్చనీయాంశంగా మారింది.

అయితే.. ఢిల్లీకి వెళ్తున్న బీఆర్‌ఎస్‌ వర్కింగ్‌ ప్రెసిడెంట్‌ కేటీఆర్‌.. తమ పార్టీకి సంబంధించిన పనులు చక్కబెట్టుకోవడానికో, లేదా సొంత పనులపైనో కాదు. ఏకంగా తెలంగాణ సీఎం రేవంత్‌ రెడ్డి తీరుపై కేంద్రానికి ఫిర్యాదు చేసేందుకే కేటీఆర్ ఢిల్లీకి వెళ్లనున్నట్టు సమాచారం. ఈరోజు (నవంబర్ 11న) ఢిల్లీకి వెళ్లిన కేటీఆర్‌.. ఇప్పటికే కేంద్ర పట్టణాభివృద్ధి శాఖ మంత్రి మనోహర్ లాల్‌ ఖట్టర్‌ అప్పాయింట్‌మెంట్‌ కూడా తీసుకున్నట్టు తెలుస్తోంది. అయితే.. అమృత్‌ పథకం టెండర్ల విషయంలో సీఎం రేవంత్‌ రెడ్డి అధికార దుర్వినియోగానికి పాల్పడ్డారని.. కేంద్ర మంత్రికి కేటీఆర్ ఫిర్యాదు చేయనున్నట్టు సమాచారం.

అమృత్ పథకం టెండర్లలో సీఎం రేవంత్ రెడ్డి.. తన బావమరిది సృజన్‌రెడ్డికి లాభం చేకూర్చేలా అధికార దుర్వినియోగానికి పాల్పడ్డారని కేటీఆర్ గత కొంతకాలంగా ఆరోపిస్తున్న విషయం తెలిసిందే. కాగా.. ఈ విషయాన్ని కేటీఆర్‌ ఇప్పటికే లేఖ ద్వారా కేంద్ర మంత్రి దృష్టికి తీసుకెళ్లారు. అయితే.. కేంద్రం నుంచి ఇప్పటివరకు ఎలాంటి స్పందన లేకపోవటంతో.. ఇప్పుడు ఆయనే నేరుగా కలిసి ఈ వ్యవహారంపై కేంద్రానికి ఫిర్యాదు చేయాలని కేటీఆర్‌ నిర్ణయించుకున్నారు.

ఇందులో భాగంగానే.. కేటీఆర్ ఢిల్లీకి వెళ్లారు. కాగా.. కేటీఆర్‌ 2 రోజుల పాటు ఢిల్లీలోనే ఉండనున్నట్టు సమాచారం. ప్రస్తుతం తెలంగాణలో ఉన్న రాజకీయ పరిస్థితుల నేపథ్యంలో.. కేటీఆర్ ఢిల్లీకి వెళ్లి, సీఎం రేవంత్ రెడ్డి మీద కేంద్రానికి ఫిర్యాదు చేసేందుకు వెళ్తుండటం ఇప్పుడు సర్వత్రా ప్రాధాన్యత సంతరించుకుంది.