హైదరాబాద్ వాసులకు గుడ్ న్యూస్.. త్వరలోనే ఉప్పల్- నారపల్లి ఫ్లైఓవర్ పూర్తి

హైదరాబాద్ వాసులకు మంత్రి కోమటిరెడ్డి వెంకట్ రెడ్డి గుడ్ న్యూస్ వినిపించారు. ఏళ్లుగా నిర్మాణ దశలోనే ఉన్న ఉప్పల్- నారపల్లి ఫ్లైఓవర్‌ను త్వరితగతిలో పూర్తి చేసి.. ప్రయాణికులకు అందుబాటులోకి తీసుకొస్తామని ప్రకటించారు. వచ్చే 2 నెలల్లో రోడ్లు అన్ని బాగు చేస్తామని మంత్రి తెలిపారు. ఎంతో కాలంగా పెండింగ్‎లోనే ఉన్నా నారపల్లి ఫ్లై ఓవర్‌కు మోక్షం కల్పిస్తామని.. నిర్మాణ పనులను 18 నెలల్లో పూర్తి చేయనున్నట్టు మంత్రి కోమటిరెడ్డి వెంకట్ రెడ్డి వెల్లడించారు. రాష్ట్రంలో రోడ్ల పరిస్థితి అధ్వానంగా ఉందన్న మంత్రి కోమటిరెడ్డి.. రహదారుల మరమ్మతులను గత బీఆర్ఎస్ ప్రభుత్వం అస్సలు పట్టించుకోలేదని విమర్శించారు.

తాము అధికారంలోకి వచ్చిన 10 నెలల నుంచి రోడ్ల మరమ్మతులు చేపడుతున్నట్టు పేర్కొన్నారు. రోడ్ల మరమ్మతులకు పార్ట్స్ హోల్ ఫిల్లింగ్.. జెట్ స్పాచ్ మిషన్ అనే కొత్త టెక్నాలజీలను ఉపయోగిస్తున్నామని కోమటిరెడ్డి వెంకట రెడ్డి వివరించారు. 2015 నుంచే ఈ టెక్నాలజీని జీహెచ్ఎంసీలో ఉపయోగిస్తుండగా.. మొదటిసారిగా రోడ్ల మరమ్మతులకు కూడా ఉపయోగిస్తున్నామని పేర్కొన్నారు. పంచాయతీ రాజ్, ఆర్ అండ్ బీ శాఖ ఆధ్వర్యంలో వచ్చే రెండేళ్లలో రోడ్లు లేని చోట్ల రోడ్లు వేస్తామని... వచ్చే 2 నెలల్లో రోడ్ల మరమ్మతులు కూడా పూర్తి చేస్తామని.. ఈ మేరకు అధికారులకు కీలక ఆదేశాలు ఇచ్చినట్టు కోమటిరెడ్డి వెంకట్ రెడ్డి పేర్కొన్నారు.

2021లో రంగారెడ్డి జిల్లాలో జాతీయ రహదారి మంజూరు అయితే ఇంత వరకు పనులు ప్రారంభించలేదని.. దానికి ఇటీవలే ఎన్జీటీలో క్లియరెన్స్ వచ్చిందని కోమటిరెడ్డి వెంకట్ రెడ్డి పేర్కొన్నారు. వచ్చే నెల చివరకు హైదరాబాద్- విజయవాడ ఆరు లైన్ల రోడ్ ప్రాజెక్టుకు టెండర్లు పిలువనున్నట్టు తెలిపారు. గత ప్రభుత్వ నిర్లక్ష్యం కారణంగా ఉప్పల్- నారపల్లి ఫ్లై ఓవర్ ఏడేళ్లయినా ఇప్పటికీ పూర్తి కాలేదని అసహనం వ్యక్తం చేసిన కోమటిరెడ్డి వెంకట్ రెడ్డి.. తాము అధికారంలోకి వచ్చిన వెంటనే పనులు మొదలుపెట్టేందుకు టార్గెట్ ఇచ్చామన్నారు. 18 నెలల్లో ఫ్లైఓవర్‌ను పూర్తి చేయాలని కాంట్రాక్టర్‌కు ఆదేశాలిచ్చామని మంత్రి స్పష్టం చేశారు.

గత బీఆర్ఎస్ సర్కార్.. ఏకంగా 7 లక్షల కోట్ల రూపాయల అప్పులు చేసి కనీసం 7 కిలోమీటర్ల ఫ్లైఓవర్‌ను కూడా పూర్తి చేయలేదని కోమటిరెడ్డి వెంకట్ రెడ్డి మండిపడ్డారు. మాజీ మంత్రి కేటీఆర్ ఎప్పుడు కూడా.. ఎన్‎హెచ్ఏఐ అధికారులు, ప్రధానమంత్రి నరేంద్ర మోదీ దగ్గరకు గానీ వెళ్లి రోడ్లు మంజూరు చేయాలని అడగలేదని.. ప్రధానిని మోడీ బోడీ అంటూ విమర్శించేందుకే సరిపోయాడంటూ విమర్శలు గుప్పించారు. రాష్ట్రంలో 12 వేల కిలోమీటర్ల మేర డబుల్ రోడ్లు వేస్తామని కోమటిరెడ్డి ప్రకటించారు.

ఇదే క్రమంలో.. వికారాబాద్ కలెక్టర్‎పై జరిగిన దాడిపై మంత్రి కోమటిరెడ్డి వెంకట రెడ్డి స్పందించారు. కలెక్టర్ మీద దాడి చాలా బాధాకరమన్నారు. అధికారుల మీద దాడి సరికాదని మంత్రి కోమటిరెడ్డి అభిప్రాయపడ్డారు. ప్రజాభిప్రాయ సేకరణలో తమ అభిప్రాయాలు చెప్పాలి కానీ.. ఇలా దాడి చేయడం ఏంటని కోమటిరెడ్డి వెంకట రెడ్డి ప్రశ్నించారు.