డ్రంక్ అండ్ డ్రైవ్ టెస్ట్ కోసం బైకు ఆపితే.. పోలీసులకే షాక్ ఇచ్చిన మందుబాబు

తాగి వాహనం నడపడం నేరం.. శిక్షార్హం కూడా.. ఇదే విషయాన్ని పోలీసులు పదే పదే చెప్తున్నారు. దానిపై అవగాహన కార్యక్రమాలు చేపడుతున్నారు. అయినా సరే.. జనాలు మాత్రం మారట్లేదు. పీకలదాకా తాగి రోడ్డెక్కుతుండటంతో.. రోడ్డు ప్రమాదాలు జరిగి ఎంతో మంది అమాయకులు ప్రాణాలు కోల్పోతున్నారు. చెప్పేది ప్రజల మంచి కోసమే అయినా.. చెవికెక్కించుకోకుండా తాగి రోడ్డెక్కిస్తున్నారు. అందుకే.. చేసేదేమీ లేక పోలీసులు ఎక్కడికక్కడ పుల్లలు పట్టుకుని డ్రంక్ అండ్ డ్రైవ్ టెస్టులు నిర్వహిస్తున్నారు. అయితే.. ఈ డ్రంక్ అండ్ డ్రైవ్ టెస్టుల సమయంలో కొందరు మందుబాబులు చేసే సర్కార్‌లు మామూలుగా ఉండవు. పీకలదాకా తాగేసి.. ఏం చేస్తున్నారో సోయి లేకుండా రోడ్డుపైన న్యూసెన్స్ చేస్తుంటారు. కొందరు మందుబాబులైతే తమ చేష్టలతో పోలీసులకే షాక్ ఇస్తుంటారు. అచ్చంగా అలాంటి ఘటనే జరిగింది హైదరాబాద్‌లోని హైదర్‌గూడాలో కూడా.

హైదర్గూడలో పోలీసులు ఓ చోట డ్రంక్ అండ్ డ్రైవ్ పరీక్షలు నిర్వహిస్తున్నారు. ఈ క్రమంలోనే.. ఓ ఇద్దరు ద్విచక్రవాహనంపై వెళ్తున్నారు. వారి వ్యవహారం చూస్తుంటేనే పోలీసులకు అనుమానం వచ్చి.. టెస్ట్ చేసేందుకు ఆపారు. ఈ క్రమంలోనే పోలీసులకు మందుబాబులు ఊహించని షాక్ ఇచ్చారు. టెస్ట్ కోసం ఆపినట్టుగా బండి స్లో చేయగా.. వెనుక కూర్చున్న వ్యక్తి.. ట్రాఫిక్ పోలీసుకు ఉన్న బాడీ కెమెరాను లాగేసుకున్నాడు. వెంటనే బైక్ నడుపుతున్న వ్యక్తి.. రయ్యిమంటూ దూసుకెళ్లాడు. బండి ఆపుతున్నాడు కదా అని రిలాక్స్ అయిన పోలీసులు.. మందుబాబు నుంచి వచ్చిన ఊహించని పరిణామంతో షాక్ అయ్యారు. షాక్ నుంచి వెంటనే బయటికొచ్చిన పోలీసులు.. నిందితుడిని పట్టుకునేందుకు ప్రయత్నించగా.. దొరకకుండా మాయమయ్యాడు.

పీకలదాకా తాగి డ్రైవింగ్ చేస్తుండటమే కాకుండా.. పైగా పోలీసులు వాడే బాడీ కెమెరాను కూడా పట్టుకుని పోవటంతో.. అతనిపై కేసు నమోదు చేశారు. సీసీఫుటేజీల ఆధారంగా నిందితులను పట్టుకునేందుకు 4 రోజులుగా నగరంలో జల్లెడ పడుతున్నారు. అయితే.. ఆ మందుబాబు ఇక్కడే అతితెలివి ప్రదర్శించినట్టు తెలుస్తోంది. ద్విచక్రవాహనం నెంబర్.. తప్పుడు నెంబర్‌గా పోలీసులు అనుమానిస్తున్నారు. ఫేక్ బైక్ నెంబర్‌ను బండికి అతికించి తిరుగుతున్నట్లుగా పోలీసులు గుర్తించారు.