తెలంగాణ యువతకు శుభవార్త.. హైదరాబాద్‌లో గూగుల్ సేఫ్టీ సెంటర్

అంతర్జాతీయ ఐటీ కంపెనీలకు కేరాఫ్ అడ్రస్ అయిన హైదరాబాద్‌లో మరో ప్రతిష్టాత్మక సంస్థ ఏర్పాటు కానుంది. హైదరాబాద్‌లో ఇప్పటికే మైక్రోసాఫ్ట్, గూగుల్, అమెజాన్, మెటా, యాపిల్ వంటి సంస్థలు ఉన్నాయి. ఇప్పుడు హైదరాబాద్‌లో గూగుల్ సేఫ్టీ సెంటర్ కూడా ఏర్పాటు కానుంది. ఈ మేరకు తెలంగాణ ప్రభుత్వం, గూగుల్ ప్రతినిధుల మధ్య ఒప్పందం జరిగింది. జూబ్లీహిల్స్‌లోని సీఎం రేవంత్ రెడ్డి నివాసంలో గూగుల్ ప్రతినిధులు ముఖ్యమంత్రితో బుధవారం భేటీ అయ్యారు. ఈ భేటీలో మంత్రి దుద్దిళ్ల శ్రీధర్ బాబు కూడా పాల్గొన్నారు. అనంతరం గూగుల్ సేఫ్టీ ఇంజనీరింగ్ సెంటర్ ఏర్పాటు కోసం ఒప్పందం కుదిరింది. ఈ విషయాన్ని సీఎం రేవంత్ రెడ్డి ఎక్స్ వేదికగా వెల్లడించారు.

గూగుల్ సేఫ్టీ ఇంజనీరింగ్ సెంటర్ ఏర్పాటు కోసం గూగుల్ హైదరాబాద్‌ను ఎంచుకుందని సీఎం రేవంత్ రెడ్డి ట్వీట్‌లో పేర్కొన్నారు. హైదరాబాద్‌లో ఏర్పాటయ్యే గూగుల్ సేఫ్టీ ఇంజనీరింగ్ సెంటర్ ఆసియా పసిఫిక్‌లో రెండోదిగా.. ప్రపంచంలోనే ఐదో సెంటర్‌గా రేవంత్ రెడ్డి పేర్కొన్నారు. గూగుల్ సీఐవో రాయల్ హన్‌సెన్ నేతృత్వంలోని ప్రతినిధుల బృందం తనతో భేటీ అయినట్లు తెలిపారు. గూగుల్‌ భాగస్వామ్యంతో తాము చరిత్ర సృష్టించామన్న రేవంత్ రెడ్డి.. హైదరాబాద్‌ను సేఫ్టీ ఇంజనీరింగ్ అండ్ సైబర్ సెక్యూరిటీ రంగంలో గ్లోబల్‌ హబ్‌గా తీర్చిదిద్దేందుకు బలమైన పునాదిని వేశామని వెల్లడించారు.

హైదరాబాద్‌లో గూగుల్ సేఫ్టీ ఇంజనీరింగ్ సెంటర్ ఏర్పాటు ద్వారా రాబోయే రోజుల్లో.. తెలంగాణ యువతకు వేలాది ఉద్యోగాలు దొరుకుతాయని.. ఉపాధి అవకాశాలు లభిస్తాయని రేవంత్ రెడ్డి విశ్వాసం వ్యక్తం చేశారు. మరోవైపు సేఫ్టీ ఇంజనీరింగ్, సైబర్ సెక్యూరిటీ రంగంలో గ్లోబల్‌ హబ్‌గా మారేందుకు హైదరాబాద్‌కు మంచి అవకాశాలు ఉన్నాయని గూగుల్ సీఐవో రాయల్ హన్సెన్ అభిప్రాయపడ్డారు. సైబర్, డిజిటల్ సెక్యూరిటీ, సేఫ్టీ ఇంజినీరింగ్ సెంటర్ల ఏర్పాటుకు హైదరాబాద్ మంచి అనుకూలమైన ప్రాంతమని గూగుల్ సీఐవో అభిప్రాయం వ్యక్తం చేశారు. మరోవైపు గూగుల్ సేఫ్టీ ఇంజనీరింగ్ సెంటర్ రాకతో ఈ రంగంలో అవకాశాలు మెరుగవుతాయని నిపుణులు చెప్తున్నారు.