కేటీఆర్ అరెస్ట్ ఖాయం.. ఏడేళ్లు జైలులోనే, ఆ తప్పుకు బెయిల్ కూడా కష్టం

తెలంగాణలో రాజకీయాలు రసవత్తరంగా మారుతున్నాయి. ఇప్పటివరకు కేవలం ఆరోపణలు, విమర్శల వరకే నడిచిన రాజకీయాలు.. ఇప్పుడు ఏసీబీ విచారణలు, అరెస్టుల వరకు రావటం సర్వత్రా చర్చనీయాంశంగా మారింది. అయితే.. బీఆర్ఎస్ హయాంలో హైదరాబాద్‌లో నిర్వహించిన ఫార్ములా ఈ రేసింగ్ వ్యవహారంలో భారీగా అవకతవకలు జరిగాయన్న ఆరోపణల నేపథ్యంలో.. విచారణ జరిపేందుకు గవర్నర్ జిష్ణుదేవ్ వర్మ గ్రీన్ సిగ్నల్ ఇవ్వటంతో.. ఏసీబీ విచారణకు మార్గం సుగమమైంది. కాగా.. కాంగ్రెస్ నేతలు ఎప్పటి నుంచి ఈ వ్యవహారంలో కేటీఆర్ ప్రధాన నిందితుడని ఆరోపిస్తుండగా.. అరెస్టవటం ఖాయమంటూ పదే పదే చెప్పుకొస్తున్నారు. ఈ క్రమంలోనే.. విచారణకు గవర్నర్ ఆమోదం తెలపటంతో.. పరిస్థితి ఉత్కంఠగా మారింది. ఈ నేపథ్యంలోనే.. మంత్రి కోమటిరెడ్డి వెంకట్ రెడ్డి కీలక వ్యాఖ్యలు చేశారు.

మాజీ మంత్రి, బీఆర్ఎస్ వర్కింగ్ ప్రెసిడెంట్ కేటీఆర్ చేసింది పెద్ద తప్పు అని.. ఆయన జైలుకు వెళ్లక తప్పదని మంత్రి కోమటిరెడ్డి వెంకట్ రెడ్డి తెలిపారు. కేటీఆర్ ఏడేండ్ల వరకు జైలులోనే ఉండాల్సి వస్తుందని.. ఆయన చేసిన తప్పుకు బెయిల్ కూడా రాదని మంత్రి జోస్యం చెప్పారు. అంతర్జాతీయ చట్టాల ప్రకారం కేటీఆర్‌కు బెయిల్ వచ్చే ఛాన్స్ లేదని మంత్రి కోమటిరెడ్డి పేర్కొన్నారు.

ఇదే క్రమంలోనే.. బీఆర్ఎస్ ఎమ్మేల్యేలు నల్ల చోక్కాలు ధరించి, చేతులకు బేడీలు వేసుకుని అసెంబ్లీకి రావటంపై స్పందిస్తూ.. మంత్రి కోమటిరెడ్డి వెంకట రెడ్డి కీలక వ్యాఖ్యలు చేశారు. కేటీఆర్‌కు బెయిల్ రావాలని బీఆర్ఎస్ ఎమ్మేల్యేలు మొక్కుతున్నారని.. బీఆర్ఎస్ ఎమ్మేల్యేలు శబరిమల వెళ్లటానికి నల్ల దుస్తులు ధరించినట్లుందని మంత్రి కోమటిరెడ్డి వెంకట్ రెడ్డి ఎద్దేవా చేశారు. కేటీఆర్ అరెస్టయితే శబరిమలకు వెళ్లి బెయిల్ రావాలని మొక్కుతారంటూ సెటైర్లు వేశారు.

ఫార్ములా ఈ కారు రేసింగ్ కేసులో బీఆర్ఎస్ వర్గాల్లో తీవ్ర ఉత్కంఠ నెలకొంది. ఈ కేసులో విచారణకు గవర్నర్ గ్రీన్ సిగ్నల్ ఇవ్వటంతో.. ప్రభుత్వం ఏసీబీకి లేఖ పంపించగా.. ఏ క్షణమైనా కేటీఆర్‌కు నోటీసులు ఇచ్చే అవకాశం ఉన్నట్లు తెలుస్తోంది. దీంతో.. కేటీఆర్ అరెస్ట్‌పై రాజకీయవర్గాల్లో ఉత్కంఠ నెలకొంది. ఇదిలా ఉంటే.. తాను మాత్రం ఎలాంటి విచారణకైనా సిద్ధమేనని కేటీఆర్ అంటున్నారు. ఆరోపణలన్నీ నిజమేనని బహిరంగంగా ఒప్పుకుంటున్న కేటీఆర్.. అందులో దాచిపెట్టేది ఏదీ లేదని.. హైదరాబాద్ బ్రాండ్ ఇమేజ్‌ను పెంచేందుకే ఈ కారు రేసింగ్ నిర్వహించామని కేటీఆర్ చెప్తున్నారు.