మందుబాబులకు వెరీ వెరీ బ్యాడ్‌న్యూస్.. తెలంగాణలో కింగ్ ఫిషర్ బీర్లు బంద్

పండగ ముందు తెలంగాణ మందుబాబులకు బ్యాడ్‌న్యూస్. ఇక నుంచి తెలంగాణలో కింగ్ ఫిషర్ బీర్లు కనిపించవంట. తెలంగాణకు కింగ్ ఫిషర్ బీర్లు, హెనికిన్‌ బీర్ల సరఫరాను నిలిపేస్తున్నట్టు యునైటెడ్ బ్రూవరీస్ సంస్థ ప్రకటించింది. తెలంగాణ బెవరేజస్‌ కార్పొరేషన్‌  బకాయిలు చెల్లించకపోవడం కారణంగానే బీర్ల సరఫరాను నిలిపేస్తున్నట్టు యునైటెడ్ బ్రూవరీస్ తెలిపింది. ఈ మేరకు.. సెబీకి యునైటెడ్ బ్రూవరీస్ లేఖ రాసింది.

తెలంగాణ బెవరేజస్‌ కార్పొరేషన్‌ రూ.900 కోట్లు బకాయి ఉందని, 2019 నుంచి ధరలను సవరించకపోవడం లాంటి కారణాల వల్ల.. భారీ నష్టాలు వస్తున్నాయని బ్రూవరీస్ తన లేఖలో వెల్లడించింది. బ్రూవరీస్ తీసుకున్న ఈ నిర్ణయంతో సంక్రాంతి పండగ ముందు.. రాష్ట్రంలోని కింగ్ ఫిషర్ బీర్ ప్రియుల నోట్లో వేడి వేడి బీరు పోసినట్టయింది.

తెలంగాణలో మంచి అయినా.. చెడు అయినా.. బాధొచ్చినా సంతోషం వచ్చినా.. పండుగొచ్చినా పబ్బమొచ్చినా.. చచ్చినా బతికినా.. ఇలా ఏ సందర్భమైనా ముందు మందుండాల్సిందే. తెలంగాణలో తాగటం అనేది అలవాటుపడిన ఓ సంప్రదాయమని ఓ సినిమాలో చెప్పినట్టు.. చిన్నా పెద్దా అందరూ తాగుతారన్నది బహిరంగ రహస్యమే. అయితే.. వయసులో పెద్దవాళ్లు చాలా మంది ఎర్రమందు అంటే.. విస్కీ, బ్రాండీ, రమ్ లాంటి మద్యం సేవిస్తే.. యువత మాత్రం ఎక్కువగా తాగేది బీర్లే.. అందులోనూ కింగ్ ఫిషర్ బ్రాండ్ బీర్లకు, మళ్లీ అందులో కింగ్ ఫిషర్ లైట్ బీర్లకు సపరేట్ ఫ్యాన్ బేస్ ఉంటుంది.

  మార్కెట్‌లో ఎన్నో పేర్లతో బీర్లు లభ్యమవుతున్నా.. చాలా మందికి బీర్ అంటే చాలు కింగ్ ఫిషర్ బీరే మొదటగా గుర్తొస్తుంది. కొంత మందికైతే.. కింగ్ ఫిషర్ బీర్ తప్ప మిగతా బ్రాండ్ల పేర్లు కూడా సరిగా తెలియదంటే అతిశయోక్తి కాదు. అలాంటి ప్రజాధరణ పొందిన కింగ్ ఫిషర్ బీర్లు ఇప్పుడు మొత్తానికే రావు అనే వార్త.. చాలా మంది యువతని ఆందోళనకు, ఆవేదనకు గురిచేయనుంది.

ఇప్పటికే తెలంగాణలో ప్రతి సమ్మర్‌లో కూల్ బీర్లు దొరకటం లేదని.. అందులోనూ కింగ్ ఫిషర్ లైట్ బీర్లు దొరకటం లేదంటూ పెద్ద ఎత్తున ఆందోళనలు.. వైన్ షాపుల మీద చిన్నపాటి యుద్ధాలే చేస్తుంటారు బీర్ల ప్రియులు. వేసవి కాలంలో కింగ్ ఫిషర్ బీర్లు దొరకటం లేదని యువత ఆగమవుతూ.. ప్రభుత్వానికి విజ్ఞప్తులు చేసిన సందర్భాలూ ఉన్నాయి. కింగ్ ఫిషర్ బీర్ల కొరత ఏర్పడితేనే ఆగమాగమైన బీరు ప్రియులు.. ఇప్పుడు మొత్తానికే దొరకవు, అసలు మార్కెట్‌లోకి రావు అంటే పరిస్థితి ఎలా ఉంటుందన్నది అసలు ముచ్చట. అందులోనూ మరో వారం రోజుల్లో సంక్రాంతి పండగ, ఆ తర్వాత పంచాయతీ ఎన్నికలు, అటు తర్వాత వచ్చేది వేసవి కాలం.. ఇలాంటి సమయంలో కింగ్ ఫిషర్ బీర్లు బంద్ చేయటం నిజంగానే వెరీ స్యాడ్ న్యూస్.

ఇక వేసవిలో అయితే.. జనాలు కొబ్బరి నీళ్ల కంటే ఎక్కువగా కింగ్ ఫిషర్ బీర్ నీళ్లు తాగేందుకే తహతహలాడుతుంటారు. మరి అలాంటి కింగ్ ఫిషర్ ప్రియుల దాహం ఎలా తీర్చుకుంటారనేది ఇప్పుడు అతిపెద్ద ప్రశ్నగా మారింది.