రీజినల్ రింగ్ రోడ్డు మధ్య రేడియల్ రోడ్లు.. డీజిల్ వాహనాలన్ని నగరం బయటకే

తెలంగాణ రాజధాని హైదరాబాద్‌‌ను విశ్వనగరంగా తీర్చిదిద్దేందుకు అన్ని రకాలుగా కృషి చేస్తున్నామని సీఎం రేవంత్ రెడ్డి తెలిపారు. ఫ్యూచర్ సిటీ పేరుతో దేశంలోనే ఒక గొప్ప నగరాన్ని నిర్మించాలన్నదే కాంగ్రెస్ ప్రభుత్వ లక్ష్యమన్నారు. న్యూయార్క్, లండన్, టోక్యో, సియోల్, దుబాయ్ లాంటి ప్రపంచ నగరాలకు పోటీగా హైదరాబాద్‌ను తీర్చిదిద్దటమే రాష్ట్ర ప్రభుత్వ లక్ష్యమని.. అందుకు అనుగుణంగా పెట్టుబడులతో ముందుకు రావాలని పారిశ్రామిక వేత్తలకు సీఎం రేవంత్ రెడ్డి ఆహ్వానం పలికారు. హైదరాబాద్‌లోని గ్రీన్ బిజినెస్ సెంటర్‌లో జరిగిన భారత పరిశ్రమల సమాఖ్య జాతీయ కౌన్సిల్ సమావేశంలో సీఎం రేవంత్ రెడ్డి ప్రసంగిస్తూ.. కీలక వ్యాఖ్యలు చేశారు.

పారిశ్రామికాభివృద్ధిలో తెలంగాణ ప్రభుత్వ లక్ష్యాలను సీఎం రేవంత్ రెడ్డి వివరించారు. తెలంగాణలో ఆర్థిక వ్యవస్థ అభివృద్ధి చెందడానికి.. పారిశ్రామిక రంగం సహకరించాలని విజ్ఞప్తి చేశారు. ప్రపంచంలోనే అత్యుత్తమ ఈజ్ ఆఫ్ డూయింగ్ బిజినెస్ అందించేందుకు తెలంగాణ రాష్ట్రం అన్ని విధాలుగా సిద్ధంగా ఉందని వివరించారు. ఇందులో భాగంగానే.. తెలంగాణ రైజింగ్  లక్ష్యంతో సేవల రంగం కేంద్రీకృతంగా ఫోర్త్ సిటీని నిర్మించాలన్నది ప్రభుత్వ ఆకాంక్ష అని రేవంత్ రెడ్డి తెలిపారు. హైదరాబాద్‌లో సంపూర్ణంగా నెట్ జీరో లక్ష్యాలతో పనిచేస్తున్నామని పేర్కొన్నారు.

హైదరాబాద్ నగరాన్ని కాలుష్య రహిత నగరంగా మార్చడంలో భాగంగా 3200 ఆర్టీసు బస్సుల స్థానంలో విద్యుత్ వాహనాలను సమకూర్చబోతున్నామని సీఎం రేవంత్ రెడ్డి తెలిపారు. ఎలక్ట్రిక్ వాహనాలపై రిజిస్ట్రేషన్, రోడ్ టాక్స్‌లను పూర్తిగా రద్దు చేశామని పేర్కొన్నారు. ప్రస్తుతం ఎలక్టిక్ వాహనాల అమ్మకాలు అత్యంత వేగంగా పెరుగుతున్నాయన్నారు. ఈ క్రమంలోనే.. నగరంలో ఉన్న డీజిల్ వాహనాలన్నింటిని ఔటర్ రింగు రోడ్డు అవతలికి పంపించేలా చర్యలు తీసుకుంటామని.. ఆ దిశగా ఆలోచనలు చేస్తున్నామని రేవంత్ రెడ్డి తెలిపారు.

మరోవైపు.. వరదలు లేని నగరంగానే కాకుండా దేశంలోనే పర్యావరణహితమైన హైదరాబాద్‌ను తీర్చిదిద్దాలన్న లక్ష్యంతో చర్యలు చేపట్టామని రేవంత్ రెడ్డి చెప్పుకొచ్చారు. అందులో భాగంగా 55 కిలోమీటర్ల పొడవైన మూసీ పునరుజ్జీవ పనులను ప్రారంభించామని వివరించారు. 2050 నాటికి అవసరమయ్యే తాగునీటి అవసరాలకు అవసరమైన కార్యాచరణను ఇప్పటి నుంచే ప్రారంభించినట్టు సీఎం రేవంత్ రెడ్డి తెలిపారు.

అంతేకాకుండా.. తెలంగాణకు మరో మణిహారంగా రీజినల్ రింగ్ రోడ్డు నిర్మాణం చేపట్టామని సీఎం రేవంత్ రెడ్డి స్పష్టం చేశారు. ఔటర్ రింగ్ రోడ్డుకు, రీజినల్ రింగ్ రోడ్డుకు మధ్యన రేడియల్ రోడ్లను నిర్మించబోతున్నట్టు రేవంత్ రెడ్డి ప్రకటించారు. ఆయా ప్రాంతాల్లో ఫార్మా, లైఫ్ సైన్సెస్, ఏరోస్పేస్, డిఫెన్స్, ఈవీ, సోలార్ పవర్ వంటి పరిశ్రమలను రీజినల్ రింగు రోడ్ల వెంట ఏర్పాటు చేయబోతున్నామన్నారు.

360 కిలోమీటర్ల పొడవైన రీజినల్ రింగ్ రోడ్డు వెంట రీజినల్ రింగ్ రైల్‌ను కూడా నిర్మించాలని ప్రధాని నరేంద్ర మోదీని కోరామని రేవంత్ రెడ్డి తెలిపారు. రీజినల్ రింగ్ రోడ్డు చుట్టూ తయారీ పరిశ్రమ, మార్కెటింగ్‌కు అవసరమైన కేంద్రీకృత ప్రదేశాలను ఏర్పాటు చేయాలన్నది తమ ఉద్దేశమని తెలిపారు.

చైనా తరహాలో రకరకాల క్లస్టర్లను సృష్టించాలని భావిస్తున్నామని రేవంత్ రెడ్డి తెలిపారు. ఒక లైట్ సిటీ, మార్బుల్ సిటీ, గ్రానైట్ సిటీ, ఫర్నీచర్ సిటీ... ఇలా ప్రత్యేక తరహాలో రీజినల్ రింగ్ రోడ్డు చూట్టూ మార్కెటింగ్ కార్యకలాపాల విస్తరణకు ప్రయత్నిస్తున్నామని రేవంత్ రెడ్డి చెప్పుకొచ్చారు. రీజినల్ రింగ్ రోడ్డు పూర్తయితే తెలంగాణ ప్రాంతంలో 70 శాతం పట్టణీకరణ జరుగుతుందన్నారు. రింగ్ రోడ్డు ఆవతలివైపు ఉన్న గ్రామీణ తెలంగాణ సమగ్రాభివృద్ధే లక్ష్యంగా వ్యవసాయం, సేంద్రీయ సాగు, రైతుల కోసం గిడ్డంగులు, కోల్డ్ స్టోరేజీల ఏర్పాటుపై ప్రభుత్వం దృష్టి సారించిందని రేవంత్ రెడ్డి వివరించారు.

తెలంగాణకు సముద్ర తీరంలేని కారణంగా డ్రైపోర్టును ఏర్పాటు చేస్తున్నామని సీఎం రేవంత్ రెడ్డి తెలిపారు. పోర్టుతో అనుసంధానం చేయడానికి మచిలీపట్నం ఓడరేవు వరకు ప్రత్యేక రహదారి, రైల్వే కనెక్టివిటీని ప్రతిపాదించామన్నారు. మరోవైపు.. యువతలో నైపుణ్యత పెంచడానికి ఉద్యోగ, ఉపాధి అవకాశాలను మెరుగుపరచడంపై ప్రధానంగా దృష్టి సారించామని చెప్పుకొచ్చారు. చైనా ప్లస్ వన్ వ్యూహంలో హైదరాబాద్‌ను ప్రపంచంలో ప్రధాన పెట్టుబడుల కేంద్రంగా ఉండేలా చర్యలు తీసుకుంటున్నామని తెలిపారు. సీఐఐ జాతీయ కౌన్సిల్ సమావేశాన్ని హైదరాబాద్‌లో నిర్వహించడం శుభ పరిణామని సీఎం రేవంత్ రెడ్డి తెలిపారు. అత్యుత్తమ వ్యాపార సౌలభ్యాలను అందించడానికి తెలంగాణ సిద్ధంగా ఉందన్నారు. ఇందుకోసం ప్రభుత్వంతో సీఐఐ కూడా కలిసిరావాలని రేవంత్ రెడ్డి పిలుపునిచ్చారు.