అందరి ముందే తిట్టిన మంత్రి పొంగులేటి.. కలెక్టర్ ఎమోషనల్ పోస్ట్

కరీంనగర్‌లో జిల్లా కలెక్టర్ పమేలా సత్పతిపై మంత్రి పొంగులేటి శ్రీనివాస్ రెడ్డి.. అందరి ముందే తీవ్ర ఆగ్రహం వ్యక్తం చేశారు. ఇందుకు సంబంధించిన వీడియో కూడా సోషల్ మీడియాలో వైరల్ అవుతోంది. అయితే పమేలా సత్పతి తన ఇన్‌స్టాలో ఎమోషనల్ స్టేటస్ పెట్టటం సర్వత్రా చర్చనీయాంశంగా మారింది. "కలెక్టర్ అంటే ఒక జిల్లా ప్రథమ పౌరుడు, డిస్ట్రిక్ మెజిస్ట్రేట్.. జిల్లా ఎన్నికల అధికారి, పార్లమెంట్ ఎన్నికల ఆర్వో, డిస్ట్రిక్ అడ్మినిస్టేటర్, సెస్సెసె ఆఫీసర్, మున్సిపల్ సూపర్‌వైజర్, ల్యాండ్ రికార్డ్స్, ల్యాండ్ రెవెన్యూ, ల్యాండ్ ఎక్వైరింగ్, పార్మల్ లోన్స్, హోమ్ లోన్స్, ఓల్డేజ్ పెన్షన్స్.. ఇలా అన్నింటికి అధికారి కలెక్టరే. చివరికి మంత్రుల అధికారాలేంటో కూడా కలెక్టరే రాసివ్వాలి.. అంటూ గేమ్ ఛేంజర్ సినిమాలో విలన్ అయిన మంత్రికి కలెక్టరయిన హీరో రామ్ చరణ్ క్లాస్ పీకుతాడు. అయితే.. కలెక్టర్ అంటే కేవలం ఓ ప్రభుత్వ ఉద్యోగిగా మాత్రమే చూసే చాలా మంది రాజకీయ నాయకులకు తగిలేలా ఆ సీన్ పెట్టినట్టుగా ఉంటుంది.

ప్రస్తుతం ఈ సీన్ గురించి ఎందుకొచ్చిందంటే.. అందటి గౌరవప్రదమైన పదవిలో ఉన్న అధికారి అందులోనూ మహిళ అని కూడా చూడకుండా కరీంనగర్ కలెక్టర్ పమేలా సత్పతిని మంత్రి పొంగులేటి శ్రీనివాస్ రెడ్డి అందరి ముందే తిట్టటం ఇప్పుడు సర్వత్రా చర్చనీయాంశంగా మారింది. ఇందుకు సంబంధించిన వీడియో సోషల్ మీడియాలో తెగ వైరల్ అవుతోంది. జనవరి 24వ తేదీన కరీంనగర్‌లో పలు అభివృద్ధి పనులు ప్రారంభోత్సవాలు జరగ్గా.. అందుకు కేంద్ర మంత్రులు మనోహర్ లాల్ కట్టర్, బండి సంజయ్ కుమార్‌తో పాటు మంత్రులు పొన్నం ప్రభాకర్, పొంగులేటి శ్రీనివాస్ రెడ్డి కూడా హాజరయ్యారు. ఈ సందర్భంగా.. పలువురు మంత్రిని తోసుకుంటూ వెళ్లారు. దీంతో.. అధికారుల తీరుపై మంత్రి తీవ్ర ఆగ్రహం వ్యక్తం చేశారు. అందరి ముందే.. కలెక్టర్ పమేలా సత్పతిని తిట్టారు.

"వాట్ ఆర్ యూ డూయింగ్.. వాట్ ఈజ్ దిస్ నాన్ సెన్స్, అసలు కామన్ సెన్స్ ఉందా..? ఎస్పీ ఎక్కడా..?" అంటూ కలెక్టర్ పమేలా సత్పతిని మంత్రి పొంగులేటి తిట్టారు. ఇందుకు సంబంధించిన వీడియో సోషల్ మీడియాల్లో తెగ వైరల్ అయ్యింది. ఈ క్రమంలో.. కలెక్టర్ పమేలా సత్పతి ఈరోజు (జనవరి 25న) తన ఇన్‌స్టాగ్రాం అకౌంట్‌లో ఎమోషనల్ స్టేటస్ పెట్టారు.

"కాలగమనంలో అన్ని రకాల మార్పులను ఎదుర్కొనే మహిళను నేను. కొన్నిసార్లు కాలిపోతాను, మరికొన్నిసార్లు వికసిస్తాను, ఇంకొన్నిసార్లు పోరాటం చేస్తాను, పలుమార్లు మౌనంగా ఉండిపోతాను.. కొన్ని సమయాల్లో కరిగిపోతాను." అంటూ.. పమేలా సత్పతి స్టేటస్ పెట్టుకున్నారు.

  అయితే.. ఆమె పెట్టిన ఈ పోస్టు.. మహిళగా తాను ఎదుర్కొనే సందర్భాలను, కలెక్టర్‌గా ఎదుర్కొంటున్న పలు క్లిష్ట పరిస్థితులను తెలియజేసేలా ఉండటం.. అందులోనూ నిన్న (జనవరి 24న) జరిగిన సంఘటన తర్వాత పోస్ట్ చేయటం.. పలు చర్చలకు తావిస్తోంది. మంత్రి అందరి ముందు తనపై ఆగ్రహాన్ని వ్యక్తం చేయటం కలెక్టర్ మనసును బాధపరిచినట్టుగా చర్చించుకుంటున్నారు. కామెంట్లలో కూడా ఇదే విషయాన్ని ప్రస్తావిస్తూ.. ఆమెకు మద్దతుగా పోస్టులు పెడుతున్నారు.