నా పోస్టు వల్లే వైజాగ్‌ లోకల్ బాయ్ నాని అరెస్ట్.. సజ్జనార్ ఇంట్రెస్టింగ్ పోస్ట్

ఇటీవల వైజాగ్ లోకల్ బాయ్ నానికి సంబంధించిన ఓ వీడియోపై టీజీఎస్ ఆర్టీసీ ఎండీ సజ్జనార్ స్పందించారు. "మీరు డబ్బు సంపాదించుకోవాలంటే అనేక మార్గాలు ఉన్నాయి. ఇవేం దిక్కుమాలినపనులు. మీ టాలెంట్‌ను ఇతరత్రా రంగాల్లో ఉపయోగించుకుని సంపాదించుకోవడంలో తప్పులేదు. అలా చేస్తే మిమ్మల్ని సమాజం హర్షిస్తోంది. ఇలాంటి పనుల ద్వారా ఎంతో మందిని బెట్టింగ్ భూతానికి బానిసలను చేయడం ఎంత వరకు కరెక్టో ఒక్కసారి ఆలోచించండి. సోషల్ మీడియా ఇన్‌ఫ్లూయెన్సర్లమని, మేం ఏం చేసిన నడుస్తుందనే భ్రమలో ఉండకండి. చట్టప్రకారం మీకు శిక్షలు తప్పవని గుర్తుంచుకోండి. ఇప్పటికైనా సమాజ శ్రేయస్సును దృష్టిలో పెట్టుకుని ఆన్ లైన్ బెట్టింగ్ యాప్ ల ప్రమోషన్లను ఆపండి." అంటూ సజ్జనార్ లోకల్ బాయ్ నానికి సంబంధించిన వీడియో షేర్ చేశారు. ఈ పోస్టును వైజాగ్ సిటీ పోలీసులకు, ఏపీ డీజీపీకి, సైబర్ పోలీసులకు ట్యాగ్ చేశారు.

సజ్జనార్ ట్వీట్‌కు స్పందించిన వైజాగ్ పోలీసులు.. కేసు నమోదు చేసి ఆదివారం (ఫిబ్రవరి 23న) మధ్యాహ్నం నానిని అరెస్ట్ చేశారు. అనంతరం అతన్ని కోర్టులో హాజరు పరిచి రిమాండ్ కు తరలించారు. కాగా నాని పై కేసు నమోదు చేయడంపై ఐపీఎస్ అధికారి సజ్జనార్ స్పందించారు. "బెట్టింగ్ యాప్‌లను ప్రచారం చేయడం మరియు వాటిలో పాల్గొనడం నేరం. ట్విట్టర్‌లో నా పోస్ట్ ఆధారంగా వైజాగ్ పోలీసులు.. అలా చేసినందుకు స్థానిక సోషల్ మీడియా ఇన్‌ప్లూయెన్సర్ లోకల్ బాయ్ నానిని అరెస్టు చేశారు. చట్టవిరుద్ధమైన బెట్టింగ్ యాప్‌లను ప్రమోట్ చేస్తున్న ప్రతి ఒక్కరికీ ఈ అరెస్టు ఒక ఉదాహరణగా ఉండాలి. అప్రమత్తంగా ఉండండి." అంటూ సజ్జనార్ రాసుకొచ్చారు.

అయితే.. అప్పటికే లోకల్ బాయ్ నాని బెట్టింగ్ యాప్ ప్రమోషన్లపై స్పందించారు. తాను చదవుకోలేదని.. చాలా మంది చదువుకున్న వాళ్లు కూడా ఈ బెట్టింగ్ యాప్‌లను ప్రమోట్ చేస్తున్నారు. అలాగే నేను కూడా చేశానని.. కానీ తాను చేసింది తప్పని.. కానీ అది తప్పని తెలిసిన తర్వాత వెంటనే వాటిని ప్రమోట్ చేయటం ఆపేశానని చెప్పుకొచ్చాడు. సజ్జనార్ షేర్ చేసింది పాత వీడియో అని తెలిపిన నాని.. దాన్ని డిలిట్ చేయటమే కాకుండా.. ఇకపై ఎప్పుడు అలాంటివి ప్రమోట్ చేయనంటూ ఓ వీడియో విడుదల చేశారు.

నాని విడుదల చేసిన వీడియోపై కూడా సజ్జనార్ స్పందించారు. "ఎంతో మంది అమాయ‌కుల ప్రాణాల‌ను బ‌లి తీసుకుంటున్న ఆన్ లైన్ బెట్టింగ్ ను ఇక నుంచి ప్రమోట్ చేయ‌న‌ని నాని ప్రక‌టించడం అభినంద‌నీయం. మిగ‌తా సోషల్ మీడియా ఇన్‌ప్లూయెన్సర్లు కూడా నానిలాగే స‌మాజ శ్రేయ‌స్సును దృష్టిలో పెట్టుకుని ఇక నుంచైనా బెట్టింగ్ యాప్ ల‌ను ప్రమోట్ చేయ‌డం ఆపండి. 'మేం అలానే చేస్తాం. మా ఇష్టం' అనుకుంటే మీపై చ‌ట్ట ప్రకారం చ‌ర్యలు త‌ప్పవు." అని హెచ్చరించారు.