అమెరికా పైలట్లపై ఇరాన్ హంట్.. పట్టిస్తే భారీ రివార్డ్!

ఇరాన్‌పై అమెరికా-ఇజ్రాయెల్ ప్రారంభించిన యుద్ధం రెండో నెలలోకి అడుగుపెట్టినా, అది ఎప్పుడు ముగుస్తుందో స్పష్టత లేకుండా ఉంది. ఇదే సమయంలో ఈ యుద్ధంలో అమెరికాకు నష్టాలు పెరుగుతున్నాయన్న వార్తలు వెలువడుతున్నాయి.తాజాగా సౌదీ అరేబియాలో ఉన్న ఖరీదైన రాడార్ వ్యవస్థను ఇరాన్ ధ్వంసం చేసినట్లు సమాచారం. అదే ఘటనలో రెండు అమెరికా యుద్ధ విమానాలను కూడా కూల్చివేసినట్లు నివేదికలు చెబుతున్నాయి. అయితే ఆ విమానాల్లో ఉన్న పైలట్లు చివరి క్షణంలో బయటకు దూకి ప్రాణాలు దక్కించుకున్నట్లు తెలుస్తోంది. ఈ ఘటన ఇరాన్ భూభాగంలోనే చోటుచేసుకుంది. దీంతో ఆ పైలట్లను పట్టిస్తే బహుమతి ఇస్తామని ఇరాన్ ప్రకటించింది.“నో హార్ముజ్, నో డీల్” అంటూ మరోవైపు ఉద్రిక్తత మరింత పెరుగుతోంది.నైరుతి ఇరాన్‌లో ఒక అమెరికన్ యుద్ధ విమాన పైలట్ విమానం నుంచి బయటకు దూకినట్లు ఇరాన్ మీడియా పేర్కొంది. అనంతరం శత్రు పైలట్లను సజీవంగా పట్టుకుని పోలీసులకు లేదా సైన్యానికి అప్పగిస్తే విలువైన బహుమతి ఇస్తామని అధికారిక ప్రకటన విడుదలైంది. అంతేకాకుండా, “వారు కనిపిస్తే కాల్చివేయండి” అనే సందేశం కూడా స్క్రీన్‌పై ప్రదర్శించబడినట్లు సమాచారం. పైలట్లను పట్టించిన వారికి సుమారు 60 వేల డాలర్ల బహుమతి ప్రకటించారు.ఇరాన్ ప్రభుత్వ ప్రసార సంస్థ ఐఆర్‌ఐబి ప్రకారం, ఘటన స్థలానికి చేరుకునేందుకు పలువురు స్థానికులు ప్రైవేట్ వాహనాల్లో అక్కడికి వెళ్లారు. అమెరికా పైలట్‌ను గుర్తించేందుకు పెద్ద ఎత్తున ప్రజలు ప్రయత్నించినట్లు తెలిపింది. అయితే పైలట్‌కు ఎలాంటి హాని కలగకుండా చూడాలని ఇరాన్ సాయుధ దళాలు ప్రజలకు సూచించాయి.ఇక మరోవైపు, ఇస్లామిక్ రివల్యూషనరీ గార్డ్ కార్ప్స్ మధ్య ఇరాన్ ప్రాంతంలో ఒక ఎఫ్-35 స్టెల్త్ యుద్ధ విమానాన్ని కూల్చివేసినట్లు ఇరాన్ మీడియా పేర్కొంది. తస్నిమ్ వార్తా సంస్థ ఒక అమెరికన్ యుద్ధ విమాన శకలాల చిత్రాలను విడుదల చేసింది. ఆ ఘటనలో పైలట్ ప్రాణాలతో బయటపడే అవకాశాలు తక్కువగా ఉన్నాయని కూడా తెలిపింది.అలాగే యూకేలోని ఆర్‌ఏఎఫ్ లేకెన్‌హీత్‌కు చెందిన 494వ ఫైటర్ స్క్వాడ్రన్‌కు చెందిన ఎఫ్-15ఈ స్ట్రైక్ ఈగిల్ విమానాన్ని కూడా కూల్చివేశామని ఐఆర్‌ఐబి వెల్లడించింది. ఘటన స్థలంలో లభించిన శకలాలు దీనికి ధృవీకరణగా నిలుస్తున్నాయని, అయితే పైలట్ల పరిస్థితిపై స్పష్టత లేదని తెలిపింది.