తెలంగాణలో కొత్త లిక్కర్ బ్రాండ్లు

తెలంగాణలోని మందుబాబులకు రేవంత్ రెడ్డి సర్కార్ కిక్కెక్కించే వార్త వినిపించింది. ఇప్పుడున్న బ్రాండ్లతో పాటు కొత్త బ్రాండ్లు కూడా రాబోతున్నాయన్న శుభవార్త తీసుకొచ్చింది. ఈ మేరకు.. కొత్త లిక్కర్ బ్రాండ్స్‌ను ఆహ్వానించేందుకు అవసరమైన చర్యలను తెలంగాణ బేవరేజెస్ కార్పొరేషన్ లిమిటెడ్ చేపట్టింది కూడా. ప్రభుత్వం ఆదేశాల మేరకు.. కొత్త కంపెనీల మద్యం బ్రాండ్లకు అనుమతులు ఇవ్వనున్నారు. తెలంగాణలోలేని విదేశీ బ్రాండ్లతో పాటు దేశీయ లిక్కర్ బీర్ కంపెనీలు కూడా తమ మద్యం ఉత్పత్తి బ్రాండ్లను అమ్మకాలు జరుపుకునేందుకు కొత్త కంపెనీల నుంచి దరఖాస్తులను స్వీకరించనున్నారు.

కొత్త కంపెనీలు.. ఇతర రాష్ట్రాల్లో జరుపుతున్న తమ మద్యం అమ్మకాలపై నాణ్యత ప్రమాణాలతో అమ్మకాలు జరుపుతున్నట్లుగా, మద్యం అమ్మకాలపై ఎలాంటి ఆరోపణలు లేవన్న నిర్ధారణ పత్రాలను దరఖాస్తులో జతపరచాలని టీజీబీసీఎల్‌ కోరింది. అయితే.. తెలంగాణలో పలు కొత్త కంపెనీలు తమ ఉత్పత్తులను అమ్ముకోవడానికి ఇటీవల టీజీబీసీఎల్ కొందరికి అనుమతులు ఇచ్చింది. పర్మిషన్ ఇచ్చిన కొత్త కంపెనీలపై పలు ఆరోపణలు రావడంతో వాటిని మళ్లీ నిలిపేసింది. ఈ నేపథ్యంలో.. తెలంగాణలో కొత్త మద్యం బ్రాండ్ల ఆహ్వానానికి కొత్త విధానానికి ప్రభుత్వం నాంది పలికింది.

కొత్త దరఖాస్తులను ఆహ్వానించే ముందు బహిరంగ ప్రకటన ఇవ్వాలని టీజీబీసీలకు సర్కార్ ఆదేశించింది. టీజీబీసీఎల్ తెలంగాణలో రిజిస్టర్ కానీ కొత్త సప్లయర్స్ నుంచి దరఖాస్తులు తీసుకోవడానికి ప్రకటన జారీ చేసింది. కొత్త కంపెనీల నుంచి వచ్చిన దరఖాస్తులను 10 రోజుల పాటు ఆన్‌లైన్‌లో పెట్టాలని నిర్ణయం తీసుకుంది. దరఖాస్తులపై వచ్చిన అభ్యంతరాలపై విచారణ జరిపి అనుమతులపై నిర్ణయం తీసుకోవాలని నిర్ణయించింది. టీజీబీసీఎల్‌లో ఇప్పటికే రిజిస్టరై.. సరఫరా చేస్తున్న సప్లయర్స్ మాత్రం ప్రస్తుతం ఉన్న పద్ధతిలోనే కొత్త బ్రాండ్లకు దరఖాస్తు చేసుకోవచ్చని తెలిపింది. వీటన్నిటిని తరువాత ప్రభుత్వ ఆదేశాలను పాటిస్తూ కొత్త మద్యం బ్రాండ్లపై తెలంగాణ బేవరేజెస్ కార్పొరేషన్ నిర్ణయం తీసుకోనుంది.

గతంలో ఏపీలో వచ్చిన లోకల్ బ్రాండ్లు తెలంగాణకు కూడా వస్తాయని ప్రచారం జరగటమే కాకుండా కొన్ని చోట్ల అమ్మకాలు కూడా జరిపాయి. అయితే వాటిపై పెద్ద ఎత్తున విమర్శలు రావటంతో.. మళ్లీ వాటి అమ్మకాలు నిలిపేశారు. అయితే.. వచ్చే కొత్త బ్రాండ్లు ఎలాంటివన్నది సర్వత్రా చర్చ నడుస్తోంది.