ఎస్ఎల్‌బీసీ టన్నెల్ ప్రమాదానికి కారణం కేసీఆరే

శ్రీశైలం లెఫ్ట్ బ్యాంక్ కెనాల్ టన్నెల్‌లో జరిగిన ప్రమాదం తీవ్ర చర్చనీయాంశంగా మారింది. ఈ ప్రమాద ఘటన అటు రాజకీయంగా మరోసారి అగ్గిరాజేసింది. ఈ ఘటనపై అధికార, ప్రతిపక్ష పార్టీల మధ్య మాటల యుద్ధం నడుస్తోంది. ఇందులో భాగంగానే కాంగ్రెస్ ఎమ్మెల్సీ తీన్మార్ మల్లన్న.. కీలక వ్యాఖ్యలు చేశారు. ఎస్ఎల్‌బీసీ టన్నెల్ ప్రమాదానికి మాజీ సీఎం, బీఆర్ఎస్ అధినేత కేసీఆరే కారణమంటూ కీలక ఆరోపణలు చేశారు. తాజాగా తన యూట్యూబ్ ఛానల్‌లో మాట్లాడిన తీన్మార్ మల్లన్న.. గతంలో ఎస్ఎల్‌బీసీ టన్నెల్ గురించి కేసీఆర్ చేసిన వ్యాఖ్యలను గుర్తు చేశారు.

"ఎస్ఎల్‌బీసీ టన్నెల్ వద్ద నేనే కుర్చి వేసుకోని కూర్చుంటా.. ఎవడు ఆపుతాడో చూస్తా.. టన్నెల్ పూర్తి చేసి శ్రీశైలం నుంచి నీళ్లు తెస్తా.." అని.. 2014 నల్గొండ ఎన్‌జీ కాలేజీలో జరిగిన బీఆర్ఎస్ పార్టీ ఎన్నికల ప్రచార సభలో కేసీఆర్ మాట్లాడారని తీన్మార్ మల్లన్న గుర్తు చేశారు. పదేళ్లు అధికారంలో ఉండి ఆ పని ఎందుకు చేయలేదని కేసీఆర్‌ను తీన్మార్ మల్లన్న ప్రశ్నించారు. అప్పుడే కేసీఆర్ ప్రాజెక్టు పూర్తి చేసుంటే.. ఇప్పుడు ఈ ప్రమాదం జరిగేది కాదని దుయ్యబట్టారు.

కేసీఆర్ నిర్లక్ష్యం వల్లనే ఈ ప్రమాదం జరిగిందన్నారు. ఎస్ఎల్‌బీసీ టన్నెల్ ప్రమాదానికి కేసీఆరే కారణం అయ్యారని తీన్మార్ మల్లన్న ఆరోపించారు. గత పదేళ్లలో ఎస్‌ఎల్‌బీసీని కేసీఆర్ నిర్లక్ష్యం చేశారని మండిపడ్డారు. కానీ నేడు ఎస్‌ఎల్‌బీసీ ప్రమాదానికి గురైన వ్యక్తులను రక్షించడానికి కాంగ్రెస్ ప్రభుత్వం తన వంతు కృషి చేస్తోందని కీలక వ్యాఖ్యలు చేశారు.

ఇదిలా ఉంటే.. నాగర్ కర్నూల్ జిల్లా దోమల పెంట సమీపంలోని శ్రీశైలం ఎడమగట్టు కాలువ సొరంగంలో శనివారం (ఫిబ్రవరి 22న) ఉదయం ఎనిమిదిన్నర సమయంలే భారీ ప్రమాదం జరిగింది. 14 కిలోమీటర్ల తర్వతా మూడు మీటర్ల మేర పైకప్పు కూలిపోయింది. ఈ ప్రమాదంలో పలువురు కార్మికులకు గాయాలు కాగా.. 8 మంది సొరంగం లోపలే చిక్కుకుపోయారు. నిన్నటి నుంచి ఆ ఎనిమిది మంది బిక్కుబిక్కుమంటూ టన్నెల్‌లోనే ఉండగా.. వారిని రక్షించేందుకు రాష్ట్ర ప్రభుత్వం, ఎన్‌డీఆర్ఎఫ్, డీఆర్ఎఫ్, ఆర్మీ రంగంలోకి దిగి తీవ్ర కృషి చేస్తున్నాయి. అయితే.. ప్రమాద సమయంలో టన్నెల్‌లో సుమారు 35 మంది ఉన్నట్టు తెలుస్తోంది. ఉదయం షిఫ్ట్‌ పనులకు వెళ్లిన సమయంలో ఒక్కసారిగా ఈ ఘటన జరగటంతో రాష్ట్రమంతా ఉలిక్కిపడింది.