దెబ్బకు కిక్కు దిగిపోయిందిగా..బీరు సీసాలోకి అదెలా వచ్చింది

అసలే ఎండలు దంచికొడుతున్నాయి. వేసవికాలం మొదలవకుండానే భానుడు భగభగా మండిపోతున్నాడు. దీంతో.. మద్యం ప్రియులంతా చల్లచల్లని బీర్లతో వేసవి తాపాన్ని తీర్చుకునేందుకు మద్యం దుకాణాలకు క్యూ కడుతున్నారు. ఇప్పటికే ప్రభుత్వం బీర్ల ధరలు పెంచి మద్యం ప్రియులకు కాస్త ఇబ్బంది కలిగించినా.. మంచి మనసుతో క్షమించి ఎక్కువ రేటు పెట్టయినా బీర్లు లాగించేస్తున్నారు. ఈ క్రమంలో.. ఎంతో ఆశగా వైన్స్‌కి వెళ్లి కూల్ కూల్ బీరు కొనుక్కుని హ్యాపీగా తాగేద్దామని చూస్తే.. సీసాలో బీరుతో పాటు స్పెషల్ అట్రాక్షన్లు కూడా దర్శనమిస్తున్నాయి. బీరు సీసాలో కనిపించే అవశేషాలు చూస్తూ.. మందుబాబుల మత్తు వదిలిపోతోంది. ఇప్పటివరకు క్రిములు, కీటకాలు, నాచు లాంటి అవశేశాలు ప్రత్యక్షమవగా.. ఇప్పుడు ఏకంగా ప్లాస్టిక్ స్పూనే దర్శనమవటంతో బీరు ప్రియుల కిక్కు ఒక్కసారిగా దిగిపోయింది.

ఈ ఘటన.. వరంగల్ జిల్లాలోని గిర్నిబావిలో గురువారం (మార్చి 06న) జరిగింది. గ్రామంలో జరిగిన ఓ శుభకార్యానికి వచ్చిన బంధుమిత్రులంతా కలిసి మద్యం సేవిస్తున్నారు. ఈ క్రమంలో ఓ బీరు (కింగ్ ఫిషర్ లైట్) బాటిల్‌ ఓపెన్ చేద్దామని చేతిలోకి తీసుకోగా.. సీసాలో ఏదో తెల్లగా తేలుతున్నట్టుగా కనిపించింది. ఏమిటా అని పరిశీలించగా.. తెల్లని ప్లాస్టిక్ స్పూన్‌. అది కూడా సగం వరకు విరిగిపోయిన స్పూన్. అది చూసి.. వాళ్లందిరికీ అప్పటివరకు తాగిందంతా దిగిపోయింది.

ఆందోళన చెందిన మందుబాబులు.. స్థానికంగా తాము కొనుగోలు చేసిన మద్యం షాపు వద్దకు వెళ్లి యజమానిని నిలదీశారు. అయితే బాటిల్‌లో ఉన్న ఆ సగం విరిగిన స్పూన్‌ బయటికి తీద్దామంటే ఎంతకూ రావట్లేదు. దీంతో.. అందు బీరు నింపే క్రమంలో కాకుండా.. బాటిల్‌ తయారు చేసే క్రమంలోనే అందులో స్పూన్ చేరి ఉంటుందని భావిస్తున్నారు. అందులో ఉన్న స్పూర్ గమనించకుండా బీరు నింపి ఉంటారని అంచనా వేస్తున్నారు.

అయితే.. బాధితులు కాస్త గట్టిగానే నిలదీయటంతో.. ఆ బీరు బాటిల్‌ను వెనక్కి తీసుకుని.. అందుకు బదులుగా రెండు బీర్లు ఇచ్చి డీల్ సెట్ చేశాడు. దీంతో.. బాధితులు కూడా ఒక్క బీరుకు రెండు బీర్లు వచ్చేసరికి.. హ్యాపీగా ఇంటికి వెళ్లిపోయారు. కాగా.. ఈ ఘటనను సదరు కంపెనీ దృష్టికి తీసుకెళ్తామని వైన్ షాపు యజమాని తెలిపారు.