టన్నెల్ ప్రమాదం.. రెస్క్యూ ఆపరేషన్‌ కోసం రోబోలు, మంత్రి ఉత్తమ్

ఎస్‌ఎల్‌బీసీ టన్నెల్ ప్రమాదం జరిగి దాదాపు 15 రోజులు గడిచింది. గత నెల 22న టన్నెల్ ప్రమాదం జరగ్గా.. 8 మంది బాధితులు అందులోనే చిక్కుకుపోయారు. ఆర్మీ, ఎన్టీఆర్ఎఫ్, సింగరేణి సహా.. దేశంలోని అన్ని రకాల రెస్క్యూ సిబ్బంది సహాయక చర్యల్లో పాల్గొన్నారు. అయినా అందులో చిక్కుకున్న వారి జాడ ఇంకా తెలియరాలేదు. దాదాపు వారు బ్రతికే అవకాశం లేదని అధికారులు అంచనాకు రాగా.. తమ వారికి కడసారి చూపైనా దక్కించేందుకు మృతదేహాల కోసం అన్వేషిస్తున్నారు. టన్నెల్ రెస్క్యూ ఆపరేషన్‌లో శుక్రవారం కీలక పరిణామం చోటు చేసుకుంది.

సొరంగంలో చిక్కుకుపోయిన వారి ఆనవాళ్లను గుర్తించేందుకు కేరళ నుంచి కడావర్ డాగ్స్ తెప్పించారు. అయితే బాధితులు చిక్కుకున్న అనుమానిత ప్రాంతాలను కడావర్ డాగ్స్ గుర్తించాయి. దీని ఆధారంగా అధికారులు తదుపరి చర్యలు తీసుకుంటున్నారు. మరోవైపు ఎన్వీ రోబోటిక్ నిపుణులు కూడా లోపలికి వెళ్లి అధ్యయనం చేశారు. 12 విభాగాలకు చెందిన 650 మంది సభ్యులు నిరంతరం షిఫ్టుల వారీగా కార్మికుల జాడ కోసం కష్టపడుతున్నారు. కాసేపటి క్రితం మంత్రి ఉత్తమ్ టన్నెల్ వద్దకు చేరుకున్నారు. స్థానిక ఎమ్మెల్యే డాక్టర్ చిక్కుడు వంశీకృష్ణతో కలిసి సహాయక చర్యలను పర్యవేక్షించారు. జరుగుతున్న సహాయక చర్యలపై సంబంధిత శాఖ అధికారులతో సమావేశం ఏర్పాటు చేసి సమీక్షించారు.

అనంతరం మీడియాతో మాట్లాడుతూ కీలక అప్డేట్ ఇచ్చారు. కన్వేయర్ బెల్టుతో వేగంగా సహాయక చర్యలు నడుస్తున్నాయన్నారు. మెుత్తం 14 కి.మీ సొరంగంలో 13.950 మీటర్ల వరకు ఎలాంటి రిస్క్ లేదని చెప్పారు. చివరి 50 మీటర్లు రిస్క్‌తో కూడుకున్నదని.. అక్కడ సహాయక చర్యల కోసం టీంలు వెళితే వారి లైఫ్ కూడా రిస్క్‌లో పడినట్లేనని చెప్పారు. కేరళ నుండి కడావర్ డాగ్స్ తెప్పించామని అవి మూడు చోట్ల అనుమానిత ప్రాంతాలను గుర్తించినట్లు చెప్పారు. రేపు రోబోలను రంగంలోకి దించుతామని.. రోబోల సాయంతో సహాయక చర్యలు చేపట్టనున్నట్లు వెల్లడించారు. ప్రమాదం కారణంగా వారు మరణించినట్లు తేలితే.. వారి కుటుంబాలను ఆదుకుంటామని తెలిపారు. ఈనెల 11న ఘటనపై సీఎం రేవంత్ మరోసారి రివ్యూ ఉంటుందని వెల్లడించారు.