ఓ చేత్తో కార్ డ్రైవింగ్‌ చేస్తూనే.. ఇంకో చేత్తో ఎంచక్కా పబ్జీ ఆడుతు

అసలే ట్రాఫిక్‌‌తో వాహనదారులు చెడ్డ చిరాకుతో ఉంటే.. ఏమాత్రం రూల్స్ పాటించకుండా రయ్ రయ్‌మంటూ రోడ్డుపైనే విన్యాసాలు చేస్తుంటారు కొందరు వెధవలు. మనం అన్ని రూల్స్‌ పాటించినా సరే.. పక్కనోడు చేసే పొరపాట్లకు మనం బలికావాల్సి వస్తుంటుంది. చిన్న చిన్న పొరపాట్లు, ఏమరపాట్ల వల్ల రోడ్డుపై ఎన్ని ప్రమాదాలు జరుగుతున్నాయో రోజూ చూస్తూనే ఉన్నాం. ఇంటి నుంచి బయటికి వెళ్లామంటే.. మళ్లీ సేఫ్‌గా తిరిగి వస్తామన్న గ్యారెంటీ లేకుండా పోయింది. ఇలాంటి సమయంలో బైకో, కారో తీసుకుని రోడ్డెక్కామంటే ఎంత జాగ్రత్తగా డ్రైవింగ్ చేయాలి. అలాంటిది ఓ క్యాబ్ డ్రైవర్‌ ఎంత నిర్లక్ష్యంగా డ్రైవింగ్ చేస్తున్నాడన్న వీడియో ఒకటి ఇప్పుడు సోషల్ మీడియాలో వైరల్ అవుతోంది.

రోడ్డు మీద రయ్ రయ్‌మంటూ వాహనాలు దూసుకెళ్తున్నాయి. కారులో వెనుక ప్యాసింజర్ కూడా ఉన్నాడు. కానీ ఇవేవీ పట్టించుకోకుండా ఆ కారు డ్రైవర్.. ఎంచక్కా పబ్జీ ఆడుతున్నాడు. ఓ చేత్తో స్టీరింగ్ పట్టుకుని.. మరో చేత్తో మొబైల్ ఫోన్‌లో పబ్జీ గేమ్ ఆడుతూ.. నిర్లక్ష్యంగా డ్రైవింగ్ చేస్తున్నాడు. వెనుక ఉన్న ప్యాసింజర్.. బాబు ముందు చూసి నడుపూ.. గేమ్ తర్వాత తీరిగ్గా ఆడుకుందువులే అని హెచ్చరించినా.. చెప్పేది తనకు కాదన్నట్టుగా వినిపించుకోకుండా పబ్‌జీ ఆడుతూనే డ్రైవింగ్ చేశాడు. దీంతో.. చిరాకొచ్చిన ప్యాసింజర్.. ఆ డ్రైవర్ చేస్తున్న నిర్లక్ష్యపు డ్రైవింగ్‌ను ఫోన్‌లో వీడియో తీశాడు. అది కాస్త.. సోషల్ మీడియాలో అప్‌లోడ్ చేసి.. ఆ క్యాబ్ డ్రైవర్‌ ఎంత నిర్లక్ష్యంగా ఉన్నాడన్నది రాసుకొచ్చాడు.

అయితే.. ఇలాంటి ఘటనలు ఎక్కడో నార్త్ ఇండియాలో జరుగుతూ ఉంటాయి.. ఇది కూడా ఏ బెంగళూరో, ఢిల్లీలోనో జరిగింది అనుకుంటే పొరపాటు పడ్డట్టే.. అచ్చంగా తెలంగాణ రాజధాని హైదరాబాద్‌ మహానగరంలోనే జరిగింది.

అయితే.. ఆ క్యాబ్ ఉబర్‌ సంస్థకు చెందినది తెలిపిన నెటిజన్.. ఉబర్‌కు తనపై కంప్లైంట్ చేస్తానని బెదిరించినా కూడా డ్రైవర్‌ ఏమాత్రం పట్టించుకోకుండా పబ్‌జీ గేమ్ ఆడటం కంటిన్యూ చేశాడని నెటిజన్ తమ పోస్టులో రాసుకొచ్చాడు. ఆ డ్రైవర్ నిర్లక్ష్యపు డ్రైవింగ్ వల్ల తన ప్రాణానికే కాకుండా.. రోడ్లపై ఉన్న ప్రజలకు కూడా ప్రమాదం ఏర్పడిందని ప్రయాణికుడు రాసుకొచ్చాడు.

సాధారణంగా.. ఫోన్ మాట్లాడుతూ ఏ వాహనం నడిపినా అది నేరమే.. ఎందుకంటే డ్రైవింగ్ చేస్తున్న సమయంలో మైండ్ డైవర్టయి.. ఏదైనా ప్రమాదం జరిగే అవకాశం ఉంది. ఫోన్ మాట్లాడటమే నేరం అని పోలీసులు చెప్తుంటే.. జనాలు డ్రైవింగ్‌లోనే వాట్సప్ చాటింగ్‌లు, వీడియో కాలింగులు, యూట్యూబ్ వీడియోలు చూస్తున్నారు. సరే ఎంటర్‌టైన్ మెంట్‌ అనుకుంటే.. ఈ క్యాబ్ డ్రైవర్ ఏకంగా స్టిరింగ్ వదిలేసి.. మొబైల్‌లోనే పబ్జీ ఆడుతున్నాడంటే.. వాడి పిచ్చి ఏ పరాకాష్టకు చేరిందో అర్థం చేసుకోవచ్చు.

సాధారణంగానే పబ్జీ అంటే.. ఎదురుగా వచ్చే శత్రువులను చంపేయటం, వారి నుంచి కాపాడుకోవటం మీద నడుస్తుంది. ఎటు నుంచి ఏ ప్రమాదం పొంచి ఉంటుందో తెలియదు.. చాలా చురుకుగా మొత్తం దాని మీదే దృష్టి పెట్టి ఆడాల్సి ఉంటుంది. అలాంటిది.. ఈ డ్రైవర్ కారు డ్రైవింగ్‌లో.. గేమ్ మీద దృష్టి పెడితే.. ఎదురుగా వచ్చే వాహనాలను ఎలా గమనిస్తాడు, రోడ్డు దాటే మనుషులను ఎలా గుర్తిస్తాడు..? సడెన్‌గా వీడిలాంటి వెధవే ఎవడో బైక్‌తో కట్ కొడితే.. ఎలా తప్పిస్తాడు.. గేర్ దేంతో వేస్తాడు.. స్టీరింగ్ ఇంకేదాంతో తిప్పుతాడు..? ఈ క్రమంలో బ్రేక్ నొక్కబోయి యాక్సలరేటర్ నొక్కితే పరిస్థితి ఏంటీ..? తన ప్రాణాన్నే కాదు కారులో ఉన్న ప్రయాణికుడి, రోడ్డుపై వెళ్లే ఇతర వాహనాల్లోని ప్రయాణికుల ప్రాణాలను కూడా ఈ డ్రైవర్ రిస్కులో పెట్టేశాడు.

ఇటీవల బెంగళూరులో ఓ టెకీ.. కారు డ్రైవింగ్ చేస్తూ ల్యాప్‌టాప్‌లో వర్క్ చేస్తుండటం చాలా వైరల్ అయ్యింది. వర్క్ ఫ్రం కార్ పేరుతో వైరల్ అయిన ఈ వీడియోలో.. తాను చేసింది చాలా రిస్కే అయినప్పటికీ ఏదో వర్క్ హడావుడిలో చేశాడనుకుంటే.. మరి ఈ క్యాబ్ డ్రైవర్ వెలగబెట్టే పబ్జీ గేమ్ ఆట అంత ఇంపార్టెంటా..? ఇంలాటి నిర్లక్ష్యపు వెధవల వల్లే రోడ్డుపై ప్రమాదాలు జరిగి విలువైన ప్రాణాలు కోల్పోతుంటారు. వీడికి మనుషుల ప్రాణాల కంటే.. పబ్జీలో ప్రాణాలు తీయటమే సరదాగా మారిందంటే.. వాడి బుర్ర ఎంతగా పాడైపోయిందో అర్థం చేసుకోవచ్చు. ఇలాంటి నిర్లక్ష్యపు వ్యక్తులకు కఠిన శిక్షలు వేస్తేనే.. మరోసారి రోడ్డు మీదికి రావాలంటే ఒళ్లు దగ్గరపెట్టుకుని వస్తారు.