రాత్రంతా కరెంట్ లేదు.. రంజాన్ ఎలా చేసుకోవాలి

హైదరాబాద్‌లో శుక్రవారం (మార్చి 21న) అర్ధరాత్రి సమయంలో కుండపోత వర్షం కురిసింది. ఉరుములు, మెరుపులు, బలమైన ఈదురుగాలులతో కూడిన వర్షం కురియటంతో.. నగరంలోని పలు ప్రాంతాల్లో విద్యుత్ సరఫరాకు తీవ్ర అంతరాయం ఏర్పడింది. రాత్రంతా విద్యుత్ లేకపోవటంతో.. ఆయా ప్రాంతాల ప్రజలు ఇబ్బందులు ఎదుర్కొన్నారు. అందులోనూ ఓల్డ్ సిటీ, న్యూ సిటీ ప్రాంతాల్లోని ముస్లిం ప్రజలు ఇక్కట్లు ఎదుర్కోవాల్సి వచ్చింది. ప్రస్తుతం.. రంజాన్ మాసం నడుస్తున్న వేళ.. రాత్రి సమయంలో విద్యుత్ అంతరాయం కలగటంతో మసీదుల్లో నమాజ్ చేసుకునేందుకు, ఉపవాసాన్ని విరమించేందుకు ఇబ్బంది పడ్డారు. కాగా.. ఈ విషయాన్ని అసెంబ్లీ సమావేశాల్లో ప్రస్తావించారు ఎంఐఎం ఎమ్మెల్యే జాఫర్ హుస్సేన్.

అసెంబ్లీ సమావేశాల్లో భాగంగా.. సభలో మాట్లాడిన జాఫర్ హుస్సేన్.. రాత్రి కురిసిన వర్షానికి కలిగిన విద్యుత్ అంతరాయం వల్ల ముస్లింలు ఎంతగా ఇబ్బంది పడ్డారన్నది వివరించారు. "డిప్యూటీ సీఎం భట్టి విక్రమార్క ముందు ఈ విషయాన్ని ప్రస్తావించటం దురదృష్టకరం. నిన్న రాత్రి 12 గంటలకు వర్షం కురవటం ప్రారంభమైనప్పటి నుంచి.. మొత్తం ఓల్డ్ సిటీలోనే కాదు, న్యూ సిటీలో కూడా విద్యుత్‌ సరఫరా ఆగిపోయింది. నా నియోజకవర్గం యాకుత్ పురాతో పాటు.. పక్కనే ఉన్న చంద్రయాన్ గుట్ట, చార్మినార్, కార్వాన్, బహదూర్ పురా, నాంపల్లి లాంటి ప్రాంతాల్లో రాత్రి మొత్తం కరెంటే లేదు. ఉదయం సమయంలో ఉపవాస దీక్ష ప్రారంభించే సమయానికి కూడా కరెంట్ రాలేదు. రంజాన్ పవిత్ర మాసంలో ముస్లింలు ఎంతో నిష్టగా మసీదుల్లో ప్రార్థనలు చేస్తుంటారు. ముఖ్యంగా మక్కా మసీదు, షాహీ మసీదుల్లో పెద్ద ఎత్తున నమాజులు చేస్తుంటారు.

షాహీ మసీదు దగ్గర ఒక జనరేటర్ పెట్టాలని రంజాన్ మాసం మొదలవకముందే.. ముస్లిం మైనారిటీ శాఖ విజ్ఞప్తి చేసింది. కేవలం 10 రోజులు మాత్రం అక్కడ జనరేటర్ పెట్టి మళ్లీ తీసుకెళ్లిపోయారు. రాత్రి మొత్తం నమాజ్ చేసేందుకు తీవ్ర ఇబ్బందులు ఎదుర్కోవాల్సి వచ్చింది. రాత్రి ఎప్పుడో పోయిన కరెంటు.. కొన్ని ప్రాంతాల్లో ఉదయం నాలుగున్నరకు వస్తే.. మరికొన్ని ప్రాంతాల్లో మధ్నాహ్నం వరకు కూడా రాలేదు. చిన్న వర్షానికి ఇంత ఇబ్బంది వస్తే ఎలా? ప్రభుత్వం దగ్గర కరెంట్ వెంటనే రిస్టోర్ చేయడానికి సరైన మెకానిజం ఉందా.. లేదా..?" అంటూ ప్రభుత్వాన్ని జాఫర్ హుస్సేన్ నిలదీశారు. కాగా.. ఈ వీడియో ఇప్పుడు సోషల్ మీడియాలో వైరల్ అవుతోంది.