కేసీఆర్ అంటే నాకు గౌరవం,,,: జగ్గారెడ్డి

మాజీ ముఖ్యమంత్రి కేసీఆర్‌పై మాజీ ఎమ్మెల్యే, సీనియర్ కాంగ్రెస్ నేత జగ్గారెడ్డి తీవ్ర స్థాయిలో విమర్శలు గుప్పించారు. కేసీఆర్‌ను పరిపూర్ణత కలిగిన నాయకుడిగా తాను భావిస్తున్నప్పటికీ, గాంధీ కుటుంబంపై ఆయన ఇటీవల చేసిన వ్యాఖ్యలను జగ్గారెడ్డి తప్పుబట్టారు. ముఖ్యంగా, ముఖ్యమంత్రి రేవంత్ రెడ్డికి భయపడే కేసీఆర్ అసెంబ్లీకి రావడం లేదని ఆయన ఆరోపించారు. జగ్గారెడ్డి మీడియాతో మాట్లాడుతూ, "కేసీఆర్ పదేళ్లు ముఖ్యమంత్రిగా పనిచేశారు. ఆయనకు రాజకీయాల్లో విశేష అనుభవం ఉంది. కానీ, ఆయన ఇప్పుడు మాట్లాడుతున్న మాటలు సరిగా లేవు. రేవంత్ రెడ్డి అసెంబ్లీలో కేసీఆర్‌ను నిలదీస్తాడనే భయంతోనే ఆయన సభకు రావడం లేదు. రేవంత్, కేసీఆర్ ఒకసారి సభలో ఎదురుపడితే తెలంగాణ శాసనసభ ఎలా ఉంటుందో చూద్దాం." అని సవాల్ విసిరారు.

నిన్న జరిగిన బీఆర్ఎస్ రజతోత్సవ సభలో కేసీఆర్ చేసిన వ్యాఖ్యలపై జగ్గారెడ్డి తీవ్రంగా స్పందించారు. "తెలంగాణ కోసం గాంధీ కుటుంబం నెలల తరబడి వేచి చూసింది నిజం కాదా? తెలంగాణ వచ్చే వరకు గాంధీ కుటుంబం హీరోలు. మరి తెలంగాణ వచ్చిన తర్వాత డూప్లికేట్ గాంధీలు ఎలా అయ్యారు?" అని ఆయన ప్రశ్నించారు. ప్రజల పక్షాన కాంగ్రెస్ హీరో అని, ప్రతిపక్షానికి విలన్ అని ఆయన అభివర్ణించారు. బీఆర్ఎస్ తమ ఉనికిని కాపాడుకోవడానికి ఆ సభను నిర్వహించిందని ఆయన విమర్శించారు.

ఇదే క్రమంలో.. కేసీఆర్ తెలంగాణ నినాదం నుండి వెనక్కి తగ్గాలని భావించిన సమయంలో కాంగ్రెస్ నేతలే ఆయనకు మద్దతుగా నిలిచారని జగ్గారెడ్డి సంచలన వ్యాఖ్యలు చేశారు. "రాష్ట్ర విభజన జరగాలని మా పార్టీ నాయకులే వెనక ఉండి నడిపించారు. కాంగ్రెస్ నాయకత్వం అండగా లేకపోతే కేసీఆర్ దీక్ష జరిగేదే కాదు. ఇది నేను విమర్శ కోసం చెప్పడం లేదు. రాహుల్ గాంధీపై కేసీఆర్ చేసిన వ్యాఖ్యలు ఆయన స్థాయికి తగినవి కావు. మీ మాటపై మీకే విలువ లేదా? సోనియా గాంధీ లేకుంటే తెలంగాణ వచ్చేది కాదని చెప్పింది మీరే కదా? రాహుల్ గాంధీ తెలంగాణ ఇవ్వాలని చెప్పిన తర్వాతే ప్రక్రియ మొదలైంది. అప్పుడేమో రాహుల్, సోనియా గాంధీ దేవుళ్లు అన్నారు. ఇప్పుడు అధికారం లేకపోవడంతో దయ్యాలు అయ్యారా?" అని ఆయన నిలదీశారు.

కేసీఆర్ అనవసరంగా మాట తూలుతున్నారని, రాహుల్ గాంధీ గురించి మాట్లాడినందుకు బేషరతుగా క్షమాపణ చెప్పాలని జగ్గారెడ్డి డిమాండ్ చేశారు. "నాకు కేసీఆర్‌పై గౌరవం ఉంది. కానీ, ఈ వయసులో ఇంత దిగజారి మాట్లాడటం అవసరమా? ఎథిక్స్‌తో రాజకీయాల్లో ఉన్న ఏకైక కుటుంబం రాహుల్ గాంధీ కుటుంబం. బ్రిటిష్ పాలనలో కూడా లక్షల కోట్ల ఆస్తులను దేశానికి ధారాదత్తం చేసిన కుటుంబం వారిది. బీఆర్ఎస్ ఢిల్లీకి సంచులు మోయలేదా? ఢిల్లీ, ఒరిస్సా, పంజాబ్, కర్ణాటక, తమిళనాడు వంటి రాష్ట్రాలకు డబ్బులు పంపింది కేసీఆర్ కాదా?" అని జగ్గారెడ్డి తీవ్రంగా ప్రశ్నించారు.