రాజ్భవన్ చోరీ కేసులో ట్విస్ట్.. అతడి పనేనట
Telangana Telugu | Suryaa Desk | Published : Tue, May 20, 2025, 06:44 PM
అత్యంత కట్టుదిట్టమైన భద్రత ఉండే తెలంగాణ రాజ్భవన్లో చోరీ ఘటన తెలంగాణలో సంచలనం సృష్టించింది. రాజ్భవన్లోకి ప్రవేశించిన ఓ వ్యక్తి హార్డ్డిస్క్ల చోరీ చేశాడు. రాజ్భవన్లోని సుధర్మ భవన్లో నాలుగు హార్డ్డిస్క్లు అదృశ్యమైనట్లుగా రాజ్భవన్ ఐటీ మేనేజర్ ఈనెల 15న పంజాగుట్ట పోలీసులకు ఫిర్యాదు చేయడంతో ఈ కేసు వెలుగులోకి వచ్చింది. రంగంలోకి దిగిన పోలీసులు దర్యాప్తు ప్రారంభించారు. సీసీ టీవీ ఫుటేజ్ను క్షుణ్ణంగా పరిశీలించగా.. ఈనెల 14వ తేదీ అర్ధరాత్రి ఒక అగంతకుడు హెల్మెట్ ధరించి మొదటి అంతస్తులోని కంప్యూటర్ గదిలోకి ప్రవేశించి హార్డ్డిస్క్లను ఎత్తుకెళ్లినట్లు గుర్తించారు. ఈ సంఘటన హై సెక్యూరిటీ జోన్లో జరగడం పోలీసులను, రాజ్భవన్ అధికారులను ఆశ్చర్యానికి గురిచేసింది.
మాయమైన హార్డ్డిస్క్లలో రాజ్భవన్కు సంబంధించిన కీలకమైన వ్యవహారాలు, ముఖ్యమైన నివేదికలు, ఫైల్స్ ఉన్నట్లు ప్రాథమికంగా భావించారు. తాజాగా.. ఈ కేసులో ట్విస్ట్ చోటు చేసుకుంది. పంజాగుట్ట పోలీసులు కీలక పురోగతి సాధించారు. రాజ్భవన్లో అవుట్సోర్సింగ్ ఉద్యోగిగా పనిచేస్తున్న హార్డ్వేర్ ఇంజినీర్ శ్రీనివాస్ పనేనని గుర్తించారు. శ్రీనివాసే హార్డ్డిస్క్లను చోరీ చేసినట్లు విచారణలో తేలింది. చోరీ చేసిన హార్డ్ డిస్క్లో ఎలాంటి కీలక సమాచారం లేదని పోలీసులు వెల్లడించారు. శ్రీనివాస్ అనే ఉద్యోగి ఓ మహిళా ఉద్యోగి ఫొటోలను మార్ఫింగ్ చేసిన కేసులో అరెస్ట్ చేసి రిమాండ్కు పంపినట్లు చెప్పారు.
అతడిని అప్పటికే ప్రభుత్వం సస్పెండ్ చేసిందని... బెయిల్పై బయటకొచ్చాక హెల్మెట్తో రాజ్భవన్లోకి వచ్చి తాను వాడిన సిస్టమ్లోని మహిళ మార్ఫింగ్ ఫొటోలు ఉన్న హార్డ్ డిస్క్ను తీసుకుని వెళ్లిపోయాడన్నారు. ఈ మేరకు శ్రీనివాస్ను అదుపులోకి తీసుకున్నట్లు వెల్లడించారు. అనంతరం అతడిని రిమాండ్కు తరలించామన్నారు. కాగా, ఈ ఘటనతో రాజ్భవన్ భద్రతా లోపాలపై పలు ప్రశ్నలు తలెత్తుతున్నాయి. హైసెక్యూరిటీ ఉండే రాజ్భవన్లో సస్పెండ్ అయిన ఉద్యోగి హెల్మెట్ ధరించి లోపలికి వెళ్లటం భద్రతా లోపాలను వేలెత్తి చూపుతుంది.
|
|