ర్యాపిడో డ్రైవర్‌కు,,,,ఆటో డ్రైవర్లు స్ట్రాంగ్ వార్నింగ్

ఆధునిక నగరాల్లో రవాణా సౌకర్యాలు వేగంగా మారుతున్నాయి. గతంలో ఆటోలు, కార్లు, బస్సులు ప్రధాన రవాణా సాధనాలుగా ఉండగా.. గత నాలుగేళ్ల నుంచి బైక్ టాక్సీలు కూడా ప్రజల దైనందిన జీవితంలో ఒక భాగంగా మారాయి. ప్రారంభంలో కొంత సంకోచించినప్పటికీ.. ప్రజలు క్రమంగా బైక్ టాక్సీల సౌలభ్యానికి అలవాటు పడ్డారు. తెలుగు రాష్ట్రాల్లో ర్యాపిడో వంటి సంస్థలు బైక్ టాక్సీ సేవలను ప్రవేశపెట్టగా.. మొదట హైదరాబాద్‌లో స్టార్ట్ చేశాయి. నెమ్మదిగా విశాఖపట్నం, విజయవాడ, ఖమ్మం, వరంగల్ వంటి ప్రధాన నగరాలకు విస్తరించాయి. ఈ సేవలు తక్కువ సమయంలో.. తక్కువ ఖర్చుతో గమ్యస్థానాలకు చేరుకోవడానికి వీలు కల్పించాయి.

అయితే.. ఈ బైక్ టాక్సీల విస్తరణ ఆటో డ్రైవర్ల జీవనోపాధిపై తీవ్ర ప్రభావం చూపుతోంది. తెలంగాణలో మహిళలకు ఉచిత బస్సు ప్రయాణం కల్పించిన మహాలక్ష్మి పథకం అమలులోకి వచ్చినప్పటి నుంచి తమ ఆదాయం గణనీయంగా తగ్గిపోయిందని ఆటో డ్రైవర్లు ఆవేదన వ్యక్తం చేస్తున్నారు. దీనికి తోడు బైక్ టాక్సీల వల్ల తమకు మరింత ఉపాధి కరువవుతుందని వారు ఆందోళన చెందుతున్నారు. ఈ నేపథ్యంలో.. బైక్ టాక్సీ నడిపే వారిపై ఆటో డ్రైవర్లు ఆగ్రహం వ్యక్తం చేయడం, అసభ్యకరంగా మాట్లాడటం వంటి ఘటనలు చోటు చేసుకుంటున్నాయి.

ఇలాంటి ఒక సంఘటన ఇటీవల ఖమ్మం జిల్లాలో చోటు చేసుకుంది. ఖమ్మం బస్టాండ్ వద్ద ప్రయాణికుడిని ఎక్కించుకోవడానికి వచ్చిన ర్యాపిడో డ్రైవర్‌కు అక్కడే ఉన్న ఆటో డ్రైవర్లు అడ్డుకున్నారు. ‘మరోసారి మీరు ఇక్కడికి రావద్దు. మీ వల్ల మాకు గిరాకీ రావడం లేదు. వెంటనే ఇక్కడి నుంచి వెళ్లిపోవాలి’ అని వారు హెచ్చరించారు. దీనికి ర్యాపిడో డ్రైవర్ స్పందిస్తూ.. ‘మీరెవరు నన్ను రావొద్దు అని చెప్పడానికి..? నేనేమైనా ప్రయాణికుడి వద్దకు వెళ్లి నా బైక్ ఎక్కండి అని బతిమాలుకుంటున్నానా..? వాళ్లు యాప్‌లో బుక్ చేసుకుంటేనే ఇక్కడికి వచ్చాను’ అని బదులిచ్చాడు. దీంతో ర్యాపిడో డ్రైవర్ , ఆటో డ్రైవర్ల మధ్య వాగ్వాదం తీవ్రమైంది. ఈ క్రమంలో పోలీసులు రంగంలోకి దిగి పరిస్థితిని అదుపులోకి తీసుకువచ్చారు. ఈ సంఘటనకు సంబంధించిన దృశ్యాలు ప్రస్తుతం సామాజిక మాధ్యమాల్లో విస్తృతంగా ప్రచారంలో ఉన్నాయి.

 దేశంలో పెరుగుతున్న జనాభాకు అనుగుణంగా రవాణా సౌకర్యాలు కూడా విస్తరిస్తున్నప్పటికీ.. ఆన్‌లైన్ యాప్ ఆధారిత సేవలు సంప్రదాయ రవాణా రంగంపై తీవ్ర ప్రభావం చూపుతున్నాయి. ఈ ఆన్‌లైన్ యాప్‌లు తమ జీవనోపాధిని దెబ్బతీస్తున్నాయని ఆటో డ్రైవర్లు నిరంతరం ఆందోళన వ్యక్తం చేస్తున్నారు. ఈ సమస్యకు సమగ్ర పరిష్కారం కనుగొనడం ప్రభుత్వానికి ఒక సవాలుగా మారింది. ఆటో డ్రైవర్లకు ప్రత్యామ్నాయ ఉపాధి మార్గాలు చూపడం లేదా వారికి ఆర్థిక సహాయం అందించడం వంటి చర్యలు తీసుకోవాల్సిన అవసరం ఉంది.