తెలంగాణలో కొత్తగా మరో ఆర్టీసీ బస్ డిపో

తెలంగాణ రాష్ట్ర రోడ్డు రవాణా సంస్థ (టీజీఎస్ఆర్టీసీ) బలోపేతంపై ప్రభుత్వం ప్రత్యేక దృష్టి సారించింది. ప్రజా రవాణాను మెరుగుపరచడం, మారుమూల ప్రాంతాలకు కూడా అనుసంధానాన్ని కల్పించడం, ప్రయాణికులకు సురక్షితమైన, సౌకర్యవంతమైన ప్రయాణ అనుభూతిని అందించడం లక్ష్యంగా పలు చర్యలు చేపడుతోంది. ఈ దిశగా కొత్త బస్సుల కొనుగోలు, బస్సు డిపోల ఏర్పాటు, బస్ స్టేషన్ల ఆధునీకరణ, అలాగే సిబ్బంది నియామకాలపై ప్రభుత్వం ప్రత్యేక శ్రద్ధ వహిస్తోంది.

పాతబడిన బస్సుల స్థానంలో ఆధునిక సాంకేతికతతో కూడిన, పర్యావరణ హితమైన బస్సులను ప్రవేశపెడుతున్నారు. ప్రయాణికుల సౌకర్యార్థం ఎయిర్ కండిషన్డ్ బస్సులు, స్లీపర్ బస్సులు, విద్యుత్ బస్సులను కూడా అందుబాటులోకి తెస్తున్నారు. ఇది ప్రయాణికులకు మెరుగైన సౌకర్యాన్ని అందిస్తూనే.. కాలుష్య నియంత్రణకు కూడా దోహదపడుతుంది. ప్రజారవాణాను మరింత విస్తృతం చేయడానికి ప్రభుత్వం కొత్త బస్సు డిపోలను ఏర్పాటు చేస్తోంది. తాజాగా ములుగు జిల్లా ఏటూరునాగారంలో 99వ ఆర్టీసీ డిపోకు నేడు శంకుస్థాపన చేశారు. రూ.4.5 కోట్ల వ్యయంతో నిర్మించనున్న ఈ డిపో ద్వారా ఆంధ్రప్రదేశ్, ఛత్తీస్‌గఢ్, ఒడిశా సరిహద్దుల్లోని ఏటూరునాగారం ప్రజలకు రవాణా కష్టాలను తీర్చనున్నారు. ఈ మేరకు రవాణాశాఖ మంత్రి పొన్నం ట్విట్టర్ వేదికగా వివరాలు వెల్లడించారు.

'నేడు ములుగు జిల్లాలో ఆర్టీసీ బస్సు డిపోకు శంకుస్థాపన సందర్భంగా ములుగు జిల్లా ప్రజలకు శుభాకాంక్షలు. ఈ బస్సు డిపో ద్వారా ఆంధ్రప్రదేశ్, ఛత్తీస్‌గఢ్, ఒడిశా సరిహద్దుల్లోని ఏటూరు నాగారంలో బస్సు డిపో నెలకొల్పడంతో అక్కడి ప్రజల రవాణా కష్టాలు తీరనున్నాయి. రాష్ట్రంలో మారుమూల ప్రాంతాలలో కూడా ప్రజా రవాణాను మెరుగుపర్చడమే లక్ష్యంగా రాష్ట్ర ప్రభుత్వం కొత్త బస్సులు ,కొత్త డిపోలు,కొత్త బస్ స్టేషన్‌ల అభివృద్ధి ,కొత్త నియామకాలు చేపడుతుంది.' అని పొన్నం ట్వీట్ చేశారు.

బస్సు డిపోలతో పాటు, రాష్ట్రవ్యాప్తంగా బస్ స్టేషన్ల ఆధునీకరణపై కూడా ప్రభుత్వం దృష్టి సారించింది. ప్రయాణికులకు మెరుగైన వెయిటింగ్ రూమ్‌లు, పరిశుభ్రమైన మరుగుదొడ్లు, తాగునీటి సదుపాయాలు వంటి మౌలిక వసతులను కల్పించడం ద్వారా ప్రయాణ అనుభవాన్ని మెరుగుపరుస్తుంది.