తెలంగాణ బీజేపీ కొత్త అధ్యక్షుడి ఎంపికలో చంద్రబాబు పాత్ర..!? బండి సంజయ్

తెలంగాణ బీజేపీ కొత్త అధ్యక్షుడిగా ఆ పార్టీ సీనియర్ నేత, మాజీ ఎమ్మెల్సీ ఎన్. రాంచందర్‌రావు పేరు దాదాపు ఖరారైంది. అధ్యక్షుడిగా ఆయన ఒక్కరే నామినేషన్ వేయటంతో కొత్త సారిథిగా పగ్గాలు చేపట్టడం లాంఛనంగా మారింది. రాంచందర్‌రావు విద్యార్థి దశ నుంచే ఏబీవీపీ, బీజేపీ యువమోర్చాలో క్రియాశీలకంగా పని చేశారు. పార్టీలో వివిధ హోదాల్లో బాధ్యతలు నిర్వర్తించి, సుదీర్ఘకాలం సేవలు అందించారు. తెలంగాణ బీజేపీ అధ్యక్ష పదవికి మల్కాజ్‌గిరి ఎంపీ ఈటల రాజేందర్, ఎంపీ అర్వింద్ పేర్లు కూడా కూడా ప్రధానంగా వినిపించాయి. అయితే, కొన్ని కారణాల వల్ల రాంచందర్‌రావుకు అవకాశం దక్కినట్లు తెలుస్తోంది. పార్టీ అధినాయకత్వం వ్యూహాత్మక నిర్ణయాలు తీసుకుంటోందని, భవిష్యత్ ఎన్నికలను దృష్టిలో ఉంచుకొని ఈ ఎంపిక జరిగిందని రాజకీయ వర్గాలు విశ్లేషిస్తున్నాయి.

రాంచందర్‌రావు ఎంపికలో టీడీపీ అధినేత, ఏపీ సీఎం చంద్రబాబు నాయుడు పాత్ర ఉన్నట్లు సోషల్ మీడియాలో వార్తలు వినిపిస్తున్నాయి. ఎన్టీయే కూటమిలో చంద్రబాబు కీ రోల్ ప్లే చేస్తుండటంతో ఆయన చెప్పిన వారికి ఏపీ, తెలంగాణ బీజేపీ అధ్యక్ష పదవులు కట్టబెట్టారనే చర్చ జరుగుతోంది. తెలంగాణ బీజేపీలో చంద్రబాబు చక్రం తిప్పారని.. చంద్రబాబు నాయుడుకి అత్యంత సన్నిహితుడైన ఎన్. రామచందర్ రావును బీజేపీ అధిష్టానం అధ్యకుడిగా ఖరారు చేసిందని సోషల్ మీడియాలో జోరుగా చర్చ జరుగుతోంది. ఈ నేపథ్యంలో తెలంగాణ బీజేపీ కొత్త అధ్యక్షుడి ఎంపిక, చంద్రబాబు పాత్రపై కేంద్ర హోంశాఖ సహాయ మంత్రి బండి సంజయ్ కీలక కామెంట్స్ చేశారు.

చంద్రబాబు చెబితే అధ్యక్షుడిని పెట్టే పార్టీ బీజేపీ కాదని అన్నారు. అధిష్టానం ఇంకా తెలంగాణ రాష్ట్ర బీజేపీ అధ్యక్షుడిని ప్రకటించలేదని చెప్పారు. ఎవరికి వాళ్లు చంద్రబాబు ప్రకటించాడు.. ఎవరో ఇంకొక ఆయన ప్రకటించారు అంటే సరైంది కాదని అన్నారు. అందరూ నామినేషన్ వేశాక ఎవరు అధ్యక్షుడిగా ఉండాలో అధిష్టానం నిర్ణయిస్తుందని చెప్పారు. 'అదిష్టానం ఇంకా రాష్ట్ర అధ్యక్షుడిని ప్రకటించలేదు. చంద్రబాబు ప్రకటిస్తే వచ్చేది కాదు. రాష్ట్ర అధ్యక్షుడిని అధిష్టానం నిర్ణయిస్తది. అందరూ నామినేషన్ వేస్తరు. ఎవర్ని అధ్యక్షుడిని చేయాల్నో ఫైనల్ చేసేది అధిష్టానం. అందరి నిర్ణయాలు తీసుకున్న తర్వాత ఎంపిక ప్రక్రియ. సోషల్ మీడియాలో అసత్య ప్రచారం చేస్తున్నారు. ఈ మధ్య కొత్తగా స్టార్ట్ అయింది. ఆ కల్చర్ బీజేపీలో ఉండదు. చంద్రబాబు చెబితే పార్టీ అధ్యక్షుడి ఎంపిక అనేది జరగదు.' అని బండి సంజయ్ వ్యాఖ్యానించారు.