హై అలర్ట్ తెలంగాణలో: రేవంత్ రెడ్డి కీలక నిర్ణయం – స్కూల్ సెలవులు, వర్క్ ఫ్రం హోం ఆదేశాలు!

తెలంగాణలో వర్ష బీభత్సం: సీఎం రేవంత్ కీలక ఆదేశాలు గ్రేటర్ హైదరాబాద్‌తో పాటు తెలంగాణ వ్యాప్తంగా కురుస్తున్న భారీ వర్షాలు రాష్ట్రాన్ని అతలాకుతలం చేస్తున్నాయి. రహదారులు జలమయమైపోవడం, లోతట్టు ప్రాంతాల్లో నీరు చేరడంతో ప్రజలు తీవ్ర ఇబ్బందులకు గురవుతున్నారు. దీనితో ప్రభుత్వం అన్ని రంగాల్లో అప్రమత్తమైంది.ఈ సంక్షోభ పరిస్థితిని దృష్టిలో ఉంచుకొని ముఖ్యమంత్రి రేవంత్ రెడ్డి రాష్ట్రంలోని అన్ని జిల్లాల కలెక్టర్లు, ఉన్నతాధికారులతో వీడియో కాన్ఫరెన్స్ నిర్వహించారు. వాతావరణ శాఖ (IMD) వచ్చే మూడు రోజుల్లో రాష్ట్ర వ్యాప్తంగా అతి భారీ వర్షాలు కురిసే అవకాశం ఉందని హెచ్చరించడంతో, సీఎం అత్యవసర చర్యలు చేపట్టాలని ఆదేశించారు.రెవంత్ రెడ్డి సూచనల ప్రకారం, వచ్చే 72 గంటలు ప్రభుత్వం పూర్తి అప్రమత్తతతో పని చేయాలి. లోతట్టు ప్రాంతాల్లో నివసించే ప్రజలకు వెంటనే హెచ్చరికలు జారీ చేయాలని, ఎక్కడైనా అత్యవసర ఘటనలు జరిగితే తక్షణమే కంట్రోల్ రూమ్‌కు సమాచారం అందాల్సిందిగా సూచించారు.ఐటీ ఉద్యోగుల భద్రతను దృష్టిలో ఉంచుకుని, వీలైన స్థితిలో వర్క్ ఫ్రం హోం విధానాన్ని అమలు చేయాలని సీఎం సలహా ఇచ్చారు. లోతట్టు ప్రాంతాల ప్రజలను అవసరమైతే సురక్షిత ప్రాంతాలకు తరలించాలని అధికారులను ఆదేశించారు.విద్యార్థుల భద్రత క్రమంలో రాష్ట్రంలోని అన్ని విద్యా సంస్థలకు సెలవులు ప్రకటించే అంశాన్ని పరిశీలనలో ఉంచారు. ఈ మేరకు అధికారులు, సిబ్బంది, ఉద్యోగుల సెలవులు రద్దు చేస్తూ ప్రభుత్వం ఉత్తర్వులు జారీ చేసింది. ప్రతి జిల్లాలో ఇన్‌చార్జ్ మంత్రులు స్వయంగా ఫీల్డ్‌లో పర్యవేక్షణ చేయాలని, వరద ప్రభావిత ప్రాంతాల్లో ప్రత్యేక మానిటరింగ్ టీములను నియమించాలని ముఖ్యమంత్రి పేర్కొన్నారు.చెరువులు, వాగులు పొంగిపొర్లుతున్న నేపథ్యంలో రక్షణ బృందాలు, పడవలు, వైద్య సిబ్బంది పూర్తిగా సిద్ధంగా ఉండాలని సూచించారు.వర్షాల ప్రభావంతో రోడ్లపై నీరు నిలిచి వాహన రాకపోకలకు అంతరాయం ఏర్పడింది. కొన్ని గ్రామాల్లో విద్యుత్ సరఫరా నిలిచిపోయింది. తాగునీటి వనరులు కలుషితమవడం వల్ల ప్రజలు తీవ్రమైన అసౌకర్యాలు ఎదుర్కొంటున్నారు.ఈ సమీక్షా సమావేశంలో మంత్రులు శ్రీధర్ బాబు, కోమటిరెడ్డి వెంకట్ రెడ్డి, సీఎస్ రామకృష్ణారావు, డీజీపీ జితేందర్, తదితర ఉన్నతాధికారులు పాల్గొన్నారు.