333 కిలోల లడ్డూ.. కేవలం రూ.99 లకు దక్కించుకున్న డిగ్రీ విద్యార్థి

తెలంగాణలో వినాయక చవితి వేడుకలు అత్యంత వైభవంగా జరుగుతాయి. ప్రతీ ఏటా చిన్న పెద్ద ఊరూరా గణపతి విగ్రహాలు ప్రతిష్టించి, భక్తులు భజనలు, పూజలు, సేవలు నిర్వహిస్తారు. పండగలో ప్రత్యేక ఆకర్షణ లడ్డు వేలంపాట. లక్షల్లో పోటీ పడే ఈ లడ్డు భక్తుల విశ్వాసానికి ప్రతీకగా నిలుస్తుంది. అయితే.. ఈసారి కొత్తపేటలోని శ్రీ ఏకదంత యూత్‌ అసోసియేషన్ ప్రత్యేకంగా లక్కీ డ్రా నిర్వహించి 333 కిలోల లడ్డూని కేవలం రూ.99తో బీబీఏ విద్యార్థి సాక్షిత్‌ గౌడ్‌ దక్కించుకోవడం విశేషం. సుమారు 760 టోకెన్లు విక్రయించగా, అదృష్టం అతనిపై పడటంతో భక్తులంతా ఆనందించారు.

సాధారణంగా బలాపూర్, బండ్లగూడ, ఉప్పల్, మోతినగర్, కూకట్‌పల్లి ప్రాంతాల్లో లడ్డు వేలం ప్రసిద్ధి. బలాపూర్ లడ్డూ లక్షల్లో దక్కడం సర్వసాధారణం. ఈఈసారి కూడా వేలం పోటీలో రికార్డు స్థాయిలో బిడ్లు నమోదయ్యాయి. సంవత్సరం బాలాపూర్ లడ్డూ వేలం రూ.35 లక్షలు పలికింది. ఈ సంవత్సరం గతంలో ఎప్పుడూ లేని విధంగా.. రాజేంద్రనగర్‌ సన్‌ సిటీలోని రిచ్‌మండ్ విల్లాలో ఏకంగా రూ.2.32 కోట్లు పలికింది. అంతే కాకుండా బండ్లగూడలోనూ గణేశుడి ప్రసాదం కోసం వ్యాపారులు, రాజకీయ నాయకులు ఎక్కువగా పోటీపడ్డారు. లడ్డు కేవలం మిఠాయి మాత్రమే కాదు, విజయం, అభివృద్ధి, శ్రేయస్సుకు సంకేతమని భక్తులు విశ్వసిస్తారు.

గణపతి పండుగలో శోభాయాత్రలు, సాంస్కృతిక కార్యక్రమాలు, గణపతి నవరాత్రి ఉత్సవాలు తెలంగాణ మొత్తం ఉత్సాహభరితంగా కొనసాగుతున్నాయి. నిమజ్జనాల సందర్భంగా నగరాలు రంగుల్తో కాంతులీనుతున్నాయి. హైదరాబాద్ హుస్సేన్ సాగర్ సాగర్ చుట్టు పండుగ వాతావరణ నెలకొంది. నిమజ్జనానికి గణనాథుల క్యూ కనపడుతోంది. ఇక జిల్లాల్లోని స్థానిక జలాశయాల్లో విగ్రహాలు నిమజ్జనం అవుతుండగా భక్తుల ఉత్సాహం తారాస్థాయికి చేరుతున్నాయి. ప్రతీ గల్లీ, వీధిలో గణపతి నామస్మరణ మార్మోగుతుంది.

ఇక కొత్తపేట లడ్డూ లక్కీ డ్రా యువతకు ప్రేరణగా నిలుస్తోంది. సాధారణ కుటుంబానికి చెందిన విద్యార్థి ఇంత పెద్ద లడ్డూని పొందడం అదృష్టం మాత్రమే కాదు.. భక్తిశ్రద్ధల ఫలితం అన్న నమ్మకం స్థానికులలో పెరిగింది. మొత్తంగా.. గణపతి ఉత్సవాలు తెలంగాణ సాంప్రదాయం, విశ్వాసం, ఉత్సాహానికి ప్రతీకలుగా నిలుస్తున్నాయి. లడ్డూ వేలాలు, లక్కీ డ్రాలు, నవరాత్రి కార్యక్రమాలు ప్రజల హృదయాలను ఏకం చేస్తున్నాయి.