తెలంగాణలో స్కూల్, కాలేజీల సెలవుల జాతర

తెలంగాణ రాష్ట్ర ప్రభుత్వం దసరా పండుగ సందర్భంగా పాఠశాలలు, కళాశాలలకు సెలవులను ప్రకటించింది. అధికారిక ప్రకటన ప్రకారం.. రాష్ట్రంలోని స్కూళ్లకు సెప్టెంబర్ 21 నుంచి అక్టోబర్ 3 వరకు సెలవులు ఉంటాయి. జూనియర్ కళాశాలలకు మాత్రం సెప్టెంబర్ 28 నుండి అక్టోబర్ 5 వరకు దసరా సెలవులు ఇస్తూ అధికారిక ఉత్తర్వులు జారీ చేశారు. వరుసగా స్కూల్ విద్యార్థులకు 13 రోజులు సెలవులు రాగా.. కాలేజీ విద్యార్థులకు వరుసగా 8 రోజులు సెలవులు వచ్చాయి.

జూనియర్ కళాశాలలకు అక్టోబర్ 5 వరకు ఆదివారాలు సహా ఎనిమిది రోజుల సెలవులు లభించాయి. అక్టోబర్ 6న తిరిగి కళాశాలలు తెరవనున్నారు. విద్యార్థుల విషయానికి వస్తే అక్టోబర్ 4వ తేదీన శనివారం వచ్చింది. తెల్లారి ఆదివారం కావడంతో చాలా మంది స్కూల్ కు వెళ్లే అవకాశాలు చాలా తక్కువ. ఇక వారు కూడా అక్టోబర్ 6వ తేదీ నుంచి స్కూళ్లకు వెళ్లే అవకాశాలు ఉన్నాయి.

 ఇదిలా ఉండగా.. నవంబర్ 10 నుండి 15 వరకు విద్యార్థులకు హాఫ్ ఇయర్లీ ఎగ్జామినేషన్ పరీక్షలు ఉంటాయి. సెలవులకు ముందు.. పాఠశాలలు తమ ఫార్మేటివ్ అసెస్‌మెంట్ (FA) - 2 పరీక్షలను ముగించాలి. దసరా సెలవువు అయిపోయిన తర్వాత విద్యార్థులు అక్టోబర్ 24 నుండి 31 వరకు సమ్మేటివ్ అసెస్మెంట్ (SA) - 1 పరీక్షలను రాయాల్సి ఉంటుంది. సమాధాన పత్రాల మూల్యాంకనం తర్వాత.. నవంబర్ 6 నాటికి SA 1 ఫలితాలు ప్రకటిస్తారు. SA 1 పూర్తయిన తర్వాత.. కేవలం పాఠశాలలో టీచర్లు పాఠాలు బోధించడమే జరుగుతుంది. నవంబర్ నెలలో ఎలాంటి పరీక్షలు ఉండవు.

ఈ సెలవుల్లో చాలా మంది విద్యార్థులు టూర్లకు ప్లాన్ చేసుకునేందుకు సిద్దం అవుతున్నారు. కుటుంబ సభ్యులతో కలిసి పర్యటనలకు వెళ్లాలని, స్నేహితులతో విహారయాత్రలు చేయాలని ఆలోచిస్తున్నారు. ముఖ్యంగా హైదరాబాద్, వారణాసి, బాసర, రామప్ప, నాగార్జునసాగర్, బాద్రాచలం వంటి పర్యాటక ప్రాంతాలు ఈ సెలవుల్లో సందర్శకులతో కళకళలాడుతుంటాయి. మరోవైపు.. దసరా సందర్భంగా సాంస్కృతిక కార్యక్రమాలు, బతుకమ్మ ఉత్సవాలు కూడా విద్యార్థుల సెలవులను మరింత ఆనందభరితంగా మారుస్తాయి. ఉద్యోగులు కూడా ఈ వరుస సెలవులను సద్వినియోగం చేసుకోవడానికి ముందుగానే ప్రణాళికలు సిద్ధం చేస్తున్నారు.

తెలంగాణలో దసరా పండుగ అంటేనే అందరికీ గుర్తుకు వచ్చేది పూల పండుగ అయిన బతుకమ్మ. ఎంతో భక్తిశ్రద్ధలతో ఈ పండుగను నిర్వహిస్తారు. తీరొక్క పూలతో బతుకమ్మలను పేర్చుతూ ప్రతీ రోజు ఎంతో ఉత్సాహంగా ఈ పండుగలను 9 రోజుల పాటు జరుపుకుంటారు. చిన్నా, పెద్ద అనే తేడా లేకుండా అందరూ ఈ బతుకమ్మ పండుగలో పాలు పంచుకుంటారు. వరుస సెలవుల నేపథ్యంలో విద్యార్థులు కూడా ఎంతో ఉల్లాసంగా ఈ పండుగ వేడుకల్లో భాగం అవుతారు.