ప్రభుత్వ ఉద్యోగం కోసం ఎనిమిదేళ్ల న్యాయ పోరాటం.. ఎట్టకేలకు

నేటీ పోటీ ప్రపంచంలో ప్రభుత్వం ఉద్యోగం సాధించడం అంటే మాటలు కాదు. దాని వెనక ఎన్నోఏళ్ల కృషి, పట్టుదల, రాత్రింబవళ్లు వారు పడిన శ్రమ దాగి ఉంటాయి. ఇక కొందరి విషయంలో ఎంత కష్టపడ్డా ఫలితం ఉండదు. ఇక కొన్ని సందర్భాల్లో ప్రభుత్వ విధి విధానాల వల్ల అర్హత సాధించినప్పటికీ కొందరు ఉద్యోగాలు పొందలేరు. ఇప్పుడు మనం చెప్పుకోబోయే మహిళ కూడా ఈ కోవకు చెందిన ఆమె. పోలీసు కోలువు కోసం ఆమె ఏకంగా 8 సంవత్సరాలు న్యాయ పోరాటం చేసి ఎట్టకేలకు విజయం సాధించింది. ఆ వివరాలు..

హైదరాబాద్‌కు చెందిన కె.సంగీత అనే దళిత 2015 సంవత్సరంలో పడిన కానిస్టేబుల్ రిక్రూట్‌మెంట్‌తో భాగంగా ఉద్యోగం కోసం దరఖాస్తు చేసుకుంది. రాత పరీక్ష, శారీరక సామర్థ్య పరీక్షల్లో కూడా ఉత్తీర్ణత సాధించింది. తుది పరీక్షలో ఆమె మంచి మార్కులే సాధించింది. కానీ స్థానికేతరులకు అవకాశం కల్పించడంతో.. ఆమెకు ఉద్యోగం రాలేదు. దీంతో 2017లో ఆమె కోర్టును ఆశ్రయించింది. మహిళ కానిస్టేబుల్ ఉద్యోగం కోసం 8 సంవత్సరాలు న్యాయ పోరాటం చేసింది. ఎట్టకేలకు కోర్టు ఆమెకు అనుకూలంగా తీర్పు వెల్లడించింది.

సంగీతకు ఎస్సీ రిజర్వేషన్ కింద స్థానిక కోటాలో కానిస్టేబుల్ ఉద్యోగం ఇవ్వాలని హైకోర్టు ఆదేశించింది. 2015లో జరిగిన నియామకాల్లో తనను కాదని వేరే వాళ్లకు ఉద్యోగం ఇవ్వడాన్ని ఆమె 2017లో కోర్టులో సవాల్ చేశారు. ఈ కేసులో సింగిల్ జడ్జి ఆమెకు అనుకూలంగా తీర్పునిచ్చారు. దీనిని ప్రభుత్వం అప్పీల్ చేయగా, హైకోర్టు ఆ అప్పీల్‌ను కొట్టివేసింది. సంగీతకు అనుకూలంగా తీర్పు వెల్లడించింది.

2015 సంవత్సరంలో పోలీస్ బోర్డు రిక్రూట్‌మెంట్‌లో భాగంగా స్టైపెండరీ కేడెట్ ట్రైనీ సివిల్ పోలీసు కానిస్టేబుల్, ఏఆర్‌ కానిస్టేబుల్ పోస్టుల భర్తీ జరిగింది. అయితే దీనిలో స్థానికేతరులకు అవకాశం ఇవ్వడంపై హైదరాబాద్ , గౌలిగూడకు చెందిన కె.సంగీత అభ్యంతరం తెలిపారు. ఆమె గౌలిగూడకు చెందినవారు. 2017లో హైకోర్టులో పిటిషన్ వేశారు. దీని విచారణ సందర్భంగా గతంలో సింగిల్ జడ్జి ఇచ్చిన తీర్పులో పిటిషనర్‌ను ఎస్సీ రిజర్వేషన్, స్థానిక కోటా కింద నియామకం చేపట్టాలని కోర్టు ఆదేశించింది. అయితే ఈ తీర్పును రాష్ట్ర ప్రభుత్వం, పోలీసు నియామక మండలి సవాల్ చేశాయి.

తాజాగా దీన్ని ప్రధాన న్యాయమూర్తి జస్టిస్ అపరేష్ కుమార్ సింగ్, జస్టిస్ జి.ఎం.మొహియుద్దీన్‌లతో కూడిన ధర్మాసనం విచారించింది. ఇరువైపుల వాదనలు విన్న తర్వాత సింగిల్ జడ్జి తీర్పును ధర్మాసనం సమర్థించింది. ప్రభుత్వ అప్పీల్‌ను కొట్టివేసింది. దీంతో సంగీతకు ఉద్యోగం వచ్చే అవకాశం ఏర్పడింది. ఎట్టకేలకు ఆమె ఎనిమిది సంవత్సరాల పోరాటం ఫలించబోతుంది. ఈ తీర్పుపై సంగీత హర్షం వ్యక్తం చేసింది.