పాకిస్థాన్తో క్రికెట్ ఆటపై బీజేపీపై విమర్శలు గుప్పించిన కేటీఆర్
Telangana Telugu | Suryaa Desk | Published : Tue, Sep 16, 2025, 08:05 PM
బీజేపీ జాతీయవాదంపై బీఆర్ఎస్ వర్కింగ్ ప్రెసిడెంట్, మాజీ మంత్రి కేటీఆర్ తీవ్రస్థాయిలో విమర్శలు గుప్పించారు. ఉగ్రవాదాన్ని ప్రోత్సహిస్తున్న పాకిస్థాన్తో క్రికెట్ ఆడటాన్ని తప్పుబడుతూ, బీజేపీ అనుసరిస్తున్న వైఖరిని ఆయన సూటిగా ప్రశ్నించారు. ఐదు నెలల క్రితం పహల్గాంలో జరిగిన ఉగ్రదాడిలో 26 మంది అమాయక ప్రజలు ప్రాణాలు కోల్పోయిన విషయాన్ని కేటీఆర్ గుర్తుచేశారు. ఆ దారుణ ఘటనకు వ్యతిరేకంగా బాధిత కుటుంబాలు తీవ్ర నిరసనలు తెలుపుతున్నా, జాతీయవాదాన్ని తమ బ్రాండ్గా చెప్పుకునే బీజేపీ ప్రభుత్వం పాకిస్థాన్తో క్రికెట్ ఆడటంపై ఎందుకు మౌనంగా ఉందని ఆయన నిలదీశారు. ఈ విషయంపై బీజేపీ సమాధానం చెప్పాలని డిమాండ్ చేశారు.అదేవిధంగా, వక్ఫ్ సవరణ చట్టం-2025పై సుప్రీం కోర్టు ఇచ్చిన మధ్యంతర ఉత్తర్వులను బీఆర్ఎస్ స్వాగతించడంపై కొందరు బీజేపీ మద్దతుదారులు కలవరపడ్డారని కేటీఆర్ ఎద్దేవా చేశారు. దీనిని బట్టి చూస్తే బీజేపీకి భారత రాజ్యాంగంపైనా, అత్యున్నత న్యాయస్థానం ఆదేశాలపైనా గౌరవం లేదని స్పష్టమవుతోందని ఆయన అన్నారు. వారి వైఖరి ఎప్పుడూ ఇలాగే నీచంగా ఉంటుందని విమర్శించారు.కులం, మతం, వర్గం చూడకుండా ప్రతి భారతీయుడినీ సమానంగా చూడటమే తమ పార్టీకి తెలిసిన నిజమైన జాతీయవాదం అని కేటీఆర్ పేర్కొన్నారు. దేశాన్ని నిర్మించేది జాతీయత అయితే, ఆధిపత్యం, అహంకారాన్ని ప్రదర్శించేది జింగోయిజం అని, ఈ రెండింటి మధ్య ఉన్న సన్నని గీతను బీజేపీ గ్రహించాలని ఆయన హితవు పలికారు. "జైహింద్" అంటూ తన ట్వీట్ను ముగించారు.
|
|