మంత్రి కుమార్తె పొలిటికల్ ఎంట్రీ? టీఆర్ఎస్‌లో నెక్ట్స్ యంగ్ లీడర్ షురూ అవుతుందా?

తెలంగాణ రాజకీయాల్లో మరో వారసత్వ రాజకీయం..? మంత్రి కుమార్తె డైరెక్ట్ ఎంట్రీ సిద్ధమా?తెలంగాణ రాజకీయాల్లో మరో ఆసక్తికర అభివృద్ధి చోటుచేసుకుంటోంది. మంత్రి దామోదర రాజనర్సింహ కుమార్తె త్రిష ఈసారి స్థానిక సంస్థల ఎన్నికల ద్వారా రాజకీయ అరంగేట్రం చేయబోతున్నారన్న ప్రచారం జోరుగా సాగుతోంది. సంగారెడ్డి జిల్లా పరిషత్ చైర్మన్ పదవికి ఆమె పేరు చర్చల్లో ఉండటం, స్థానికంగా రాజకీయ ఉత్సాహాన్ని పెంచుతోంది.ఈసారి సంగారెడ్డి జెడ్పీ చైర్మన్ పదవి ఎస్సీ జనరల్‌కు రిజర్వ్ కావడంతో, అదే కోటాకు చెందిన నేతల్లో ఊపిరి పీల్చుకున్న వారు ఉన్నారు. ఇదే సమయంలో, ఇతర సామాజిక వర్గాల నేతలు మాత్రం తీవ్ర నిరాశకు గురయ్యారు. ఇప్పటికే తాము పదవికి చేరుకున్నట్టేనని భావించిన పలువురు ఆశావహుల కలలపై ఈ రిజర్వేషన్ నీళ్లు చల్లినట్టు అయింది.ఇప్పటికే అసెంబ్లీ ఎన్నికల్లో దామోదర రాజనర్సింహ గెలుపులో కీలకంగా వ్యవహరించిన త్రిష, తండ్రికి మద్దతుగా ప్రచారంలో చురుకుగా పాల్గొన్నారు. యువత, మహిళా ఓటర్లలో ఆమెకు మంచి క్రేజ్ ఉందన్నది లోకల్ టాక్. ఈ పరిణామాల నేపథ్యంలో ఆమెకు రాజకీయంగా బలమైన అవకాశమొచ్చినట్టు భావిస్తున్నారు.తాజా సమాచారం మేరకు, త్రిష చౌటకూర్ లేదా మునిపల్లి జెడ్పీటీసీ స్థానం నుంచి పోటీ చేసే అవకాశం ఉంది. ఇవి కాంగ్రెస్ బలమైన మండలాలుగా పరిగణించబడుతున్నాయి. అందుకే గెలుపు అవకాశాలపై పెద్దగా సందేహం లేదు అనే అభిప్రాయం దామోదర శిబిరంలో స్పష్టంగా కనిపిస్తోంది.సంగారెడ్డి జిల్లాలో మొత్తం 26 జెడ్పీటీసీ స్థానాలు ఉన్నాయి. అందులో 13 స్థానాల్లో విజయం సాధించిన పార్టీకి చైర్మన్ పదవి దక్కుతుంది. అందోల్ నియోజకవర్గంలో 6 మండలాలు ఉండటంతో, అక్కడి నుంచి పోటీ చేసే అభ్యర్థికి సానుకూలతగా మారే అవకాశాలు ఉన్నాయి.మొత్తంగా జిల్లా వ్యాప్తంగా చౌటకూర్, మునిపల్లి, మనూరు, సంగారెడ్డి, కొండాపూర్, జహీరాబాద్ — మొత్తం ఆరు జెడ్పీటీసీ స్థానాలు ఎస్సీలకు రిజర్వ్ అయ్యాయి. వీటిలో విజయం సాధించే వ్యక్తికే చైర్మన్ పీఠం దక్కే అవకాశం ఉంది.ఇక, త్రిష బరిలోకి దిగే విషయం తార్సీగా మారడంతో, ఈసారి జిల్లా స్థాయిలో స్థానిక ఎన్నికలు హాట్ టాపిక్‌గా మారే అవకాశం ఉంది. మిగిలిన కొన్ని కుటుంబాలు కూడా తమ వారసులను బరిలోకి దించేందుకు ప్రయత్నించినా, రిజర్వేషన్ల మార్పుతో పరిస్థితులు అనుకూలించలేదు. ఈ క్రమంలో త్రిషకు మార్గం క్లియర్ అయ్యిందని కాంగ్రెస్ వర్గాల్లో అంచనాలు వినిపిస్తున్నాయి.