తెలంగాణ పాలన.. సర్కారు కాదు, సర్కసే!

బీఆర్‌ఎస్ వర్కింగ్ ప్రెసిడెంట్ కేటీఆర్, రేవంత్ రెడ్డి నేతృత్వంలోని కాంగ్రెస్ ప్రభుత్వంపై తీవ్ర విమర్శలు గుప్పించారు. ఈ ప్రభుత్వం సర్కారు కాదు, సర్కస్ అని ఎక్స్‌ వేదికగా ఆయన ధ్వజమెత్తారు. తెలంగాణలో పాలనా వైఫల్యాలు, అరాచకత్వం, అజ్ఞానం రాజ్యమేలుతున్నాయని ఆయన ఆరోపించారు.
స్థానిక సమస్యల పరిష్కారానికి నిధులు ఇవ్వని ఎమ్మెల్యేలు, ప్రజల గోడు వినని పాలకులపై ఆయన తీవ్ర అసంతృప్తి వ్యక్తం చేశారు.పాలమూరు ఎమ్మెల్యే స్థానిక సమస్యల పట్ల నిర్లక్ష్య వైఖరిని కేటీఆర్ ఎత్తిచూపారు. స్థానిక అవసరాలకు నిధులు కేటాయించకపోవడంతో ప్రజలు ఇబ్బందులు ఎదుర్కొంటున్నారని ఆయన ఆరోపించారు.
అదే సమయంలో, ఎల్లారెడ్డి ఎమ్మెల్యే వర్ష నష్టాలకు రాష్ట్ర ప్రభుత్వం నుంచి సహాయం అందకపోవడంతో ప్రపంచ బ్యాంకుకు ఉత్తరం రాసిన ఘటనను కూడా ఆయన ప్రస్తావించారు. ఇది రాష్ట్ర ప్రభుత్వ నిర్లక్ష్యానికి నిదర్శనమని ఆయన విమర్శించారు.జడ్చర్ల ఎమ్మెల్యే కాలుష్య నియంత్రణ బోర్డు అధికారులను బెదిరించిన సంఘటనను కూడా కేటీఆర్ తప్పుబట్టారు.
పరిశ్రమలను తగలబెడతానని బెదిరించడం బాధ్యతారహిత వైఖరికి గుర్తని ఆయన అన్నారు. ఇలాంటి చర్యలు రాష్ట్రంలో అరాచకత్వాన్ని ప్రోత్సహిస్తున్నాయని, పాలనలో సమన్వయం, బాధ్యత లోపించాయని ఆయన ఆందోళన వ్యక్తం చేశారు.
తెలంగాణలో ప్రజల సమస్యల పట్ల ప్రభుత్వం నిర్లక్ష్య ధోరణిని కొనసాగిస్తే, పరిస్థితులు మరింత దిగజారతాయని కేటీఆర్ హెచ్చరించారు. ప్రజలకు న్యాయం చేయడంలో విఫలమైన ఈ ప్రభుత్వం, సర్కస్‌లా మారిందని ఆయన విమర్శలు గుప్పించారు. రాష్ట్ర ప్రజలు ఈ పరిస్థితులను గమనిస్తున్నారని, తగిన సమయంలో సమాధానం చెబుతారని ఆయన ఉద్ఘాటించారు.