సంగారెడ్డి జిల్లా ఆందోల్‌లో అగ్ని ప్రమాదం,,,,టపాసుల గోడౌన్‌లో భారీగా మంటలు

తెలంగాణ రాష్ట్రంలోని సంగారెడ్డి జిల్లా, ఆందోల్ పట్టణంలో ఒక టపాసుల గోడౌన్ లో జరిగిన అగ్ని ప్రమాదం తీవ్ర కలకలంసృష్టించింది. ఒక్కసారిగా మంటలు ఎగసిపడటంతో ఆ ప్రాంతమంతా భారీ శబ్దాలతో టపాసులు పేలాయి. ఈ సంఘటనతో చుట్టుపక్కల ప్రాంతాలలో దట్టమైన పొగ కమ్ముకుంది.

ఆందోల్ పట్టణంలో ఉద్రిక్తత..

ఆందోల్ పట్టణంలోని టపాసుల నిల్వ కేంద్రంలో సంభవించిన ఈ ప్రమాదం వల్ల భారీ ఆస్తి నష్టం జరిగినట్లు ప్రాథమిక సమాచారం అందుతోంది. మంటల ధాటికి టపాసుల పేలుళ్ల శబ్దాలకు ఆ ప్రాంతంలో భయంకరమైన వాతావరణం నెలకొంది. ఈ సంఘటనతో స్థానిక ప్రజలు భయాందోళనకు గురయ్యారు. గోదాముకు సమీపంలో నివసించే ప్రజలు తమ ఇళ్లను వీడి సురక్షిత ప్రాంతాలకు పరుగులు తీశారు.

ప్రమాద సమాచారం అందిన వెంటనే అగ్నిమాపక సిబ్బంది సంఘటనా స్థలానికి చేరుకున్నారు. వారు మంటలను ఆర్పేందుకు నిరంతరాయంగా శ్రమిస్తున్నారు. అయిత.. పేలుడు పదార్థాల కారణంగా మంటలను నియంత్రించడం వారికి పెద్ద సవాలుగా మారింది. టపాసుల గోదాము వద్ద జరిగిన ఈ ప్రమాదానికి సంబంధించి మరో విచిత్రమైన పరిస్థితి నెలకొంది. ఈ ప్రమాద వార్త విని గోదాము వద్దకు టపాసుల కోసం జనం గుంపులు గుంపులుగా ఎగబడ్డారు. నిజానికి.. ప్రమాదకర పరిస్థితి ఉన్నప్పటికీ.. టపాసులు దొరుకుతాయనే ఆశతో ప్రజలు అక్కడికి చేరుకోవడం విస్మయాన్ని కలిగిస్తోంది.

ఈ గుంపును నియంత్రించడానికి పోలీసులకు తీవ్ర ఇబ్బందులు ఎదురయ్యాయి. ప్రజల భద్రత దృష్ట్యా, గోదాము చుట్టూ భారీగా పోలీసులు మోహరించి, పరిస్థితిని అదుపులోకి తీసుకురావడానికి ప్రయత్నిస్తున్నారు. ఈ సంఘటన టపాసుల నిల్వ కేంద్రాల భద్రతా ప్రమాణాలపై ప్రశ్నలు లేవనెత్తుతోంది. ఈ గోదాముకు సరైన అనుమతులు ఉన్నాయా..? లేదా అనే దానిపై అధికారులు దర్యాప్తు చేపట్టారు.

టపాసుల వ్యాపారం చేసేటప్పుడు అన్ని ప్రభుత్వ నిబంధనలను పాటించాలి. భద్రత, నిల్వ, అమ్మకాలకు సంబంధించిన అనుమతులు తప్పనిసరిగా ఉండాలి. దీపావళి వంటి పండుగ సమయాల్లో అధికారులు ఆకస్మిక తనిఖీలు చేసి, నిబంధనలను ఉల్లంఘించేవారిపై చర్యలు తీసుకోవాలి. టపాసుల గోడౌన్లలో అగ్ని ప్రమాదాలు జరగకుండా తగిన జాగ్రత్తలు తీసుకోవాల్సిన అవసరం ఉంది. ఇలాంటి జాగ్రత్తలు పాటిస్తే.. అగ్నిప్రమాదాలు జరగకుండా నివారించవచ్చు.