వారి ఉద్యోగాలు అన్నీ పర్మినెంట్..భారీ శుభవార్త చెప్పిన మంత్రి సీతక్క

తెలంగాణ రాష్ట్రంలోని పంచాయతీ కార్యదర్శులు తమ చిరకాల సమస్యల పరిష్కారం కోసం ప్రజాభవన్‌లో పంచాయతీరాజ్, గ్రామీణాభివృద్ధి, మహిళా శిశు సంక్షేమ శాఖ మంత్రి సీతక్కతో సమావేశమయ్యారు. తెలంగాణ పంచాయత్ సెక్రటరీస్ ఫెడరేషన్ ప్రతినిధులు మంత్రికి తమ డిమాండ్లను విన్నవించారు.

దశాబ్ద కాలంగా పరిష్కారం కాకుండా ఉన్న తమ సమస్యలపై మంత్రి దృష్టిని ఆకర్షించారు. ఈ సందర్భంగా.. గతంలో తమకు రూ. 104 కోట్ల బిల్లులు విడుదల చేయించడం, డిప్యూటేషన్లకు అనుమతి ఇవ్వడం వంటి కీలక నిర్ణయాలు తీసుకున్నందుకు మంత్రి సీతక్కకు కృతజ్ఞతలు తెలిపారు. జూనియర్ పంచాయతీ కార్యదర్శుల సర్వీస్ కాలం గణన, వారికి ప్రొబేషన్ డిక్లరేషన్ ఇవ్వడం, ఔట్‌సోర్సింగ్ విధానాన్ని రద్దు చేసి, అందులో ఉన్న OPS (Outsourced Panchayat Secretaries)లను జూనియర్ పంచాయతీ కార్యదర్శులుగా క్రమబద్ధీకరణ చేయాలని కోరారు.

స్పోర్ట్స్ కోటా కింద ఎంపికైన 98 మంది అభ్యర్థులను తక్షణమే విధుల్లోకి తీసుకోవడం, గత బీఆర్‌ఎస్ పాలనలో జరిగిన 16 రోజుల సమ్మె కాలాన్ని సర్వీస్‌గా పరిగణించడం, వైద్య బిల్లుల త్వరిత క్లియరెన్స్, అలాగే జీవిత భాగస్వామి మ్యూచువల్ ట్రాన్స్‌పర్స్‌లకు అంగీకారం తెలపడం, మాజీ సైనికుల వేతనాల నిర్ణయం వంటి అంశాలను కూడా వారు ప్రత్యేకంగా ప్రస్తావించారు. ఈ సమావేశంలో ఫెడరేషన్ రాష్ట్ర అధ్యక్షుడు ఏ. శ్రీకాంత్ గౌడ్, రాష్ట్ర కోశాధికారి ఎం. శశిధర్, రాష్ట్ర నాయకులు ఎం. హరికృష్ణ, రంగారెడ్డి జిల్లా అధ్యక్షుడు పి. శివకుమార్, రాష్ట్ర సంయుక్త కార్యదర్శి సాపాటి పాండుతో పాటు ఇతర కీలక నేతలు పాల్గొని.. వినతి పత్రాన్ని సమర్పించారు.

మంత్రి సానుకూల స్పందన..

పంచాయతీ కార్యదర్శులు చేసిన వినతికి మంత్రి సీతక్క సానుకూలంగా స్పందించారు. న్యాయమైన పరిష్కారాన్ని చూపించడానికి ప్రభుత్వం నిబద్ధతతో ఉందని ఆమె హామీ ఇచ్చారు. పంచాయతీరాజ్ గ్రామీణాభివృద్ధి శాఖ డైరెక్టర్ సృజనను ఆదేశించిన మంత్రి.. వివరించిన అంశాలను పరిశీలించి, అవసరమైన చర్యలు తీసుకోవాలని సూచించారు. త్వరలోనే పంచాయతీ కార్యదర్శులతో ప్రత్యేకంగా సమావేశాన్ని నిర్వహించి, అన్ని అంశాలపై ఒక ఖచ్చితమైన నిర్ణయాన్ని తీసుకుంటామని సీతక్క తెలిపారు. సానుకూలత వ్యక్తం చేసిన మంత్రికి కృతజ్ఞతలు తెలుపుతూ కార్యదర్శులు శాలువాతో ఆమెను గౌరవించారు.