నల్గొండలో సైనిక్ స్కూల్ ఆశలు ఆరంభం.. నాగార్జునసాగర్ బీసీ గురుకులం అప్గ్రేడ్ దిశగా ఒక అడుగు!

నాగార్జునసాగర్‌లోని బీసీ వెల్ఫేర్ గురుకుల పాఠశాలను సైనిక్ స్కూల్‌గా మార్చే ప్రతిపాదన ఊపందుకుంది. మంగళవారం సైనిక్ స్కూల్ సొసైటీ ప్రత్యేక ప్రతినిధుల బృందం పాఠశాలను సందర్శించి, అన్ని మౌలిక వసతులను లోతుగా పరిశీలించింది. ఈ సందర్శనతో స్థానికంగా ఒక ప్రతిష్ఠాత్మక సైనిక్ విద్యాలయం ఏర్పాటు దిశగా ముందడుగు పడినట్లయింది. ఈ అప్గ్రేడ్ విజయవంతమైతే తెలంగాణలో మరో కీలక సైనిక్ స్కూల్ జాబితాలో చేరనుంది.
ప్రతినిధుల బృందం క్లాస్‌రూమ్‌లు, హాస్టళ్లు, డైనింగ్ హాల్, క్రీడా మైదానాలు, ల్యాబొరేటరీలు, లైబ్రరీ వంటి అన్ని సదుపాయాలను గంటల తరబడి తనిఖీ చేసింది. విద్యా ప్రమాణాలు, ఫ్యాకల్టీ సామర్థ్యం, విద్యార్థుల శారీరక దృఢత్వం, డిసిప్లిన్ స్థాయిలను కూడా దగ్గరగా అధ్యయనం చేసింది. ఈ పరిశీలనల ఆధారంగా త్వరలోనే వివరణాత్మక నివేదిక సిద్ధం చేసి కేంద్ర ప్రభుత్వానికి సమర్పించనున్నారు.
ఈ బృందానికి కర్ణాటకలోని బీజాపూర్ సైనిక్ స్కూల్ ప్రిన్సిపల్ గ్రూప్ కెప్టెన్ రాజ్యలక్ష్మి పృథ్వీరాజ్ నేతృత్వం వహించారు. నల్గొండ కేంద్రీయ విద్యాలయ ప్రిన్సిపల్ శ్రీనివాసులు, ఎంజెపి గురుకుల విద్యాలయాల రీజినల్ కోఆర్డినేటర్ స్వప్న, నాగార్జునసాగర్ బీసీ గురుకుల పాఠశాల ప్రిన్సిపల్ రవికుమార్ ఈ బృందంలో పాల్గొన్నారు. అధికారులంతా ఈ పాఠశాలలో ఇప్పటికే ఉన్న మౌలిక సౌకర్యాలపై సంతృప్తి వ్యక్తం చేశారు.
సైనిక్ స్కూల్ ఆమోదం పొందితే నల్గొండ జిల్లా విద్యార్థులకు దేశస్థాయి సైనిక శిక్షణ, ఉన్నత విద్యా అవకాశాలు ఇంటి వద్దే అందుబాటులోకి వస్తాయి. ఎన్డీఏ, ఇతర రక్షణ రంగ పరీక్షల్లో విజయం సాధించే అవకాశం పెరుగుతుందని అధికారులు ఆశాభావం వ్యక్తం చేస్తున్నారు. రాష్ట్రంలోని బడుగు, బలహీన వర్గాల విద్యార్థులకు ఇది ఒక స్వప్న సాకారమని చెప్పవచ్చు.