రేషన్ కార్డుదారులు వాటి కోసం క్యూలో ఉండాల్సిన అవసరమే లేదు

తెలంగాణ రాష్ట్ర ప్రభుత్వం సామాన్య ప్రజల కోసం డిజిటల్ సేవలను మరింత చేరువ చేస్తోంది. ఇందులో భాగంగా రేషన్ కార్డు దారుల సౌకర్యార్థం టీ-రేషన్ యాప్ ను అందుబాటులోకి తీసుకువచ్చింది. గతంలో రేషన్ కార్డులో పేరు ఉందో లేదో తెలుసుకోవాలన్నా.. ప్రతి నెల ఎంత బియ్యం వస్తున్నాయో చూడాలన్నా రేషన్ షాపుల చుట్టూ లేదా ప్రభుత్వ కార్యాలయాల చుట్టూ తిరగాల్సి వచ్చేది. కానీ ఇప్పుడు ఆ అవసరం లేకుండా... మీ మొబైల్ ఫోన్ ద్వారానే సమస్త సమాచారాన్ని నిమిషాల్లో తెలుసుకోవచ్చు.

టీ-రేషన్ యాప్ అంటే ఏమిటి..?

తెలంగాణ పౌర సరఫరాల శాఖ రూపొందించిన ఈ యాప్, రేషన్ పంపిణీ వ్యవస్థలో పారదర్శకతను పెంచడానికి ఒక గొప్ప ప్రయత్నం. దీని ద్వారా సామాన్య ప్రజలకు తమకు అందే సరుకులపై పూర్తి అవగాహన కలుగుతుంది. రేషన్ డీలర్లు ఇచ్చే సమాచారంతో సంబంధం లేకుండా.. ప్రభుత్వం మీకు ఎంత కేటాయించిందో నేరుగా చూసుకోవచ్చు.

 ఈ యాప్ కేవలం సమాచారం చూడటానికే కాకుండా.. అనేక రకాల సేవలను అందిస్తుంది. అందులో .. బియ్యం కోటా వివరాలు కూడా ఉంటాయి. ప్రతి నెలా మీ కుటుంబానికి ఎన్ని కిలోల బియ్యం, గోధుమలు లేదా ఇతర సరుకులు వస్తాయో ముందుగానే తెలుసుకోవచ్చు. గత ఆరు నెలల్లో మీరు ఏ తేదీన.. ఎంత రేషన్ తీసుకున్నారో పూర్తి జాబితా కనిపిస్తుంది. రేషన్ కార్డులో ఎంతమంది పేర్లు ఉన్నాయి..? ఎవరి ఆధార్ కార్డు లింక్ అయ్యింది అనే వివరాలు కూడా ఉంటాయి. మీకు కేటాయించిన రేషన్ షాప్ నంబర్, డీలర్ పేరు, ఆ షాప్ ఎక్కడ ఉందో మ్యాప్ ద్వారా కూడా తెలుసుకోవచ్చు.

రేషన్ వ్యవస్థలో అవినీతిని అరికట్టడానికి ఈ యాప్ ఎంతగానో ఉపయోగపడుతుంది. చాలా సందర్భాలలో కొంతమంది డీలర్లు సరుకులు తక్కువగా ఇస్తున్నారనే ఫిర్యాదులు వస్తుంటాయి. కానీ ఈ యాప్ వాడటం వల్ల ప్రభుత్వం ఆ నెలలో మీకు కేటాయించిన అసలు పరిమాణం ఎంతో మొబైల్‌లో కనిపిస్తుంది. దీనివల్ల డీలర్లను ప్రశ్నించే అవకాశం ప్రజలకు కలుగుతుంది. గంటల తరబడి రేషన్ షాపుల వద్ద క్యూలో నిలబడి వివరాలు అడగాల్సిన పనిలేదు. ఈ యాప్ తెలుగు , ఇంగ్లీష్ భాషల్లో ఉండటం వల్ల గ్రామీణ ప్రాంత ప్రజలు కూడా సులభంగా వాడుకోవచ్చు. మీ రేషన్ కార్డు యాక్టివ్‌గా ఉందో లేదో ఎప్పటికప్పుడు చెక్ చేసుకోవచ్చు. ప్రతి విషయానికి రేషన్ షాపుకు వెళ్లి.. డీలర్లను అడగాల్సిన అవసరం లేకుండా.. ఈ రేషన్ యాప్‌లోనే అన్నీ తెలుసుకునే విధంగా ప్రభుత్వం ప్రవేశపెట్టింది.

ఈ యాప్‌ను వాడటం చాలా సులభం. ముందుగా ప్లే స్టోర్ నుండి T-Ration అని సెర్చ్ చేసి డౌన్‌లోడ్ చేసుకోవాలి. యాప్ ఓపెన్ చేయగానే మీ రేషన్ కార్డు నంబర్ లేదా ఆధార్ నంబర్ అడుగుతుంది. వివరాలు నమోదు చేయగానే మీ కార్డుకు సంబంధించిన పూర్తి డాష్‌బోర్డ్ కనిపిస్తుంది. అక్కడ 'స్టాక్ రిపోర్ట్' లేదా 'అలోకేషన్' అనే ఆప్షన్ల ద్వారా మీ నెలవారీ సరుకుల వివరాలు చూడవచ్చు. తెలంగాణ ప్రభుత్వం అందిస్తున్న ఈ డిజిటల్ విప్లవం వల్ల సామాన్యులకు రేషన్ సేవలు మరింత పారదర్శకంగా, వేగంగా అందుతున్నాయి.