కొత్తగా రుణం తీసుకునే మహిళా సంఘాలకు చక్కటి అవకాశం

మహిళా సాధికారతను పెంపొందించే దిశగా ప్రభుత్వం మరో కీలక అడుగు వేసింది. పొదుపు సంఘాల మహిళలు ఆర్థికంగా ఎదిగేందుకు 'స్త్రీనిధి' రుణాలు ఎంతో తోడ్పడుతున్నాయి. అయితే.. ఇప్పుడు ఈ రుణాల ప్రక్రియను మరింత సులభతరం చేస్తూ 'మన స్త్రీనిధి' పేరుతో ప్రత్యేక మొబైల్ అప్లికేషన్‌ను ప్రభుత్వం అందుబాటులోకి తెచ్చింది. ఈ యాప్ ద్వారా ఇప్పటికే రుణాలు పొందిన వారే కాకుండా.. కొత్తగా రుణం కావాలనుకునే మహిళలు కూడా నేరుగా దరఖాస్తు చేసుకునే వెసులుబాటు కల్పించడం విశేషం. దీనివల్ల కార్యాలయాల చుట్టూ తిరిగే పని లేకుండా.. ఇంట్లోనే ఉండి రుణాల కోసం దరఖాస్తు చేసుకోవచ్చు.

గతంలో పొదుపు సంఘాల సభ్యులు చెల్లించే వాయిదా సొమ్మును కొందరు గ్రూపు నాయకులు పక్కదారి పట్టించిన సందర్భాలు ఉన్నాయి. సభ్యులకు తెలియకుండానే నిధులు దుర్వినియోగం కాకుండా ఉండటానికి ఈ యాప్ ఒక రక్షణ కవచంలా పనిచేస్తుంది. సభ్యులు తాము చెల్లించిన ప్రతి రూపాయి ఖాతాలో చేరిందా లేదా అనేది తమ ఫోన్ ద్వారానే ఎప్పటికప్పుడు చూసుకోవచ్చు. ఒకవేళ ఎక్కడైనా నిధుల మళ్లింపు జరిగితే వెంటనే అధికారుల దృష్టికి తీసుకెళ్లి.. ఆ సొమ్మును తిరిగి పొందే అవకాశం ఉంటుంది. దీనివల్ల మహిళల్లో భరోసా పెరుగుతుంది.

ఈ యాప్ పాత రుణాల పర్యవేక్షణకే కాకుండా.. కొత్త ఆర్థిక అవసరాలను తీర్చడానికి కూడా ఉపయోగపడుతుంది. సంఘ సభ్యులు తమకు అవసరమైన రుణ మొత్తం గురించి యాప్‌లోనే వివరాలు నమోదు చేయవచ్చు. గతంలో తీసుకున్న రుణాల చెల్లింపుల రికార్డును బట్టి.. కొత్త రుణం ఎంతవరకు వస్తుందో యాప్ ద్వారా తెలుసుకోకునే అవకాశం ఉంది. దరఖాస్తు చేసుకున్న తర్వాత అది ఏ స్టేటస్ లో ఉంది అనేది తెలుసుకోవచ్చు. అంటే అప్రూవ్ అయిందా..? లేదా ఎవరి దగ్గర పెండింగ్ లో ఉందో మీ ఫోన్ ద్వారానే ఎప్పటికప్పుడు చూసుకునే వీలుంది. దీనివల్ల మధ్యవర్తుల ప్రమేయం పూర్తిగా తొలగిపోతుంది.

దీనిని ఎలాం డౌన్ లోడ్ చేసుకోవాలి..?

స్మార్ట్‌ఫోన్ ఉన్నవారు ప్లేస్టోర్ నుండి 'మన స్త్రీనిధి' అని సెర్చ్ చేసి యాప్ ఇన్‌స్టాల్ చేసుకోవాలి. తమ రిజిస్టర్డ్ ఫోన్ నంబర్ ద్వారా లాగిన్ అయితే.. వారి సంఘం వివరాలన్నీ ప్రత్యక్షమవుతాయి. ప్రభుత్వం ప్రవేశపెట్టిన ఈ వినూత్న వ్యవస్థ ద్వారా మహిళా సంఘాల్లో మరింత పారదర్శకత రావడమే కాకుండా.. పేద మహిళలు ఆర్థికంగా మరింత బలోపేతం కావడానికి మార్గం సుగమం అవుతుంది.