మున్సిపల్ పోరుకు ముహూర్తం ఖరారు? ఈసీ కంటే ముందే తేదీలను ప్రకటించిన బీజేపీ చీఫ్ రామచందర్ రావు

తెలంగాణ రాష్ట్రంలో మున్సిపల్ ఎన్నికల వేడి ఒక్కసారిగా రాజుకుంది. ఫిబ్రవరి 3వ తేదీన రాష్ట్రవ్యాప్తంగా మున్సిపల్ ఎన్నికలు నిర్వహించనున్నట్లు బీజేపీ రాష్ట్ర అధ్యక్షుడు ఎన్. రామచందర్ రావు సంచలన ప్రకటన చేశారు. వరంగల్‌లో నిర్వహించిన పార్టీ ముఖ్య కార్యకర్తల సమావేశంలో పాల్గొన్న ఆయన, ఎన్నికల షెడ్యూల్‌పై క్లారిటీ ఇచ్చారు. అధికారికంగా ఎన్నికల సంఘం నుంచి ప్రకటక రాకముందే ఆయన ఈ వివరాలను వెల్లడించడం రాజకీయ వర్గాల్లో పెద్ద ఎత్తున చర్చకు దారితీసింది.
ఎన్నికల ప్రక్రియకు సంబంధించిన పూర్తి వివరాలను కూడా రామచందర్ రావు ఈ సందర్భంగా వివరించారు. ఈ నెల 16వ తేదీ నుంచే అభ్యర్థుల నుంచి నామినేషన్ల స్వీకరణ ప్రక్రియ ప్రారంభమవుతుందని ఆయన పేర్కొన్నారు. ఇప్పటికే ఎన్నికల నోటిఫికేషన్ వెలువడిందని, పార్టీ శ్రేణులన్నీ సమరానికి సిద్ధం కావాలని ఆయన పిలుపునిచ్చారు. ఎన్నికల నిర్వహణపై పూర్తి స్పష్టతతో ఉన్నామని, అభ్యర్థుల ఎంపిక ప్రక్రియను కూడా త్వరలోనే పూర్తి చేస్తామని కార్యకర్తలకు దిశానిర్దేశం చేశారు.
ఈ మున్సిపల్ ఎన్నికల్లో బీజేపీ అభ్యర్థులను భారీ మెజారిటీతో గెలిపించాలని ఆయన ఓటర్లను కోరారు. రాష్ట్ర ప్రభుత్వ వైఫల్యాలను ఎండగట్టేందుకు ఈ ఎన్నికలు ఒక వేదిక కావాలని, ప్రజలు మార్పును కోరుకుంటున్నారని ఆయన ఆశాభావం వ్యక్తం చేశారు. క్షేత్రస్థాయిలో పార్టీని బలోపేతం చేసి, ప్రతి వార్డులోనూ కమలం జెండా ఎగురవేయడమే లక్ష్యంగా పని చేయాలని నేతలకు సూచించారు. అభివృద్ధి మంత్రంతోనే తాము ప్రజల ముందుకు వెళ్తామని ఈ సందర్భంగా రామచందర్ రావు స్పష్టం చేశారు.
సాధారణంగా ఎన్నికల తేదీలను కేంద్ర లేదా రాష్ట్ర ఎన్నికల సంఘం అధికారికంగా ప్రకటిస్తుంది. అయితే ఈసీ కంటే ముందే రామచందర్ రావు ఎన్నికల షెడ్యూల్‌ను ప్రకటించడంపై విపక్షాల నుంచి విమర్శలు వ్యక్తమవుతున్నాయి. ప్రభుత్వ రహస్యాలు ముందే ఎలా లీక్ అయ్యాయని కొందరు ప్రశ్నిస్తుండగా, రామచందర్ రావు వ్యాఖ్యల వెనుక ఉన్న ఆంతర్యం ఏమిటనేది ఆసక్తికరంగా మారింది. ఈ పరిణామాల నేపథ్యంలో ఎన్నికల సంఘం స్పందన ఎలా ఉంటుందో వేచి చూడాలి.