కాంగ్రెస్ పాలనలో రైతులకు కష్టాలు.. ఆయిల్ పామ్ ఫ్యాక్టరీని సందర్శించిన మాజీ మంత్రి హరీశ్ రావు

సిద్దిపేట జిల్లా నర్మెట్టలోని ఆయిల్ పామ్ ఫ్యాక్టరీని మాజీ మంత్రి హరీశ్ రావు శనివారం సందర్శించారు. ఈ సందర్భంగా ఫ్యాక్టరీలో జరుగుతున్న నూనె ఉత్పత్తి ప్రక్రియను పరిశీలించిన ఆయన, సిద్దిపేటలో పూర్తిస్థాయిలో నూనె ఉత్పత్తి ప్రారంభం కావడం పట్ల హర్షం వ్యక్తం చేశారు. గత బీఆర్ఎస్ ప్రభుత్వం తీసుకున్న నిర్ణయాల వల్ల నేడు రైతులు ఆయిల్ పామ్ సాగు వైపు మళ్లుతున్నారని, ఇది వ్యవసాయ రంగంలో ఒక మంచి పరిణామమని ఆయన కొనియాడారు.
ఈ సందర్భంగా ప్రస్తుత కాంగ్రెస్ ప్రభుత్వంపై హరీశ్ రావు తీవ్ర స్థాయిలో విమర్శలు గుప్పించారు. కరోనా వంటి గడ్డు కాలంలోనూ మాజీ ముఖ్యమంత్రి కేసీఆర్ ఎక్కడా రైతుబంధు పథకాన్ని ఆపలేదని, అన్నదాతలకు అండగా నిలిచారని గుర్తు చేశారు. కానీ నేటి కాంగ్రెస్ పాలనలో వ్యవస్థ మొత్తం అస్తవ్యస్తమైందని, రైతులు తమ హక్కుల కోసం పోరాడాల్సిన పరిస్థితి ఏర్పడిందని ఆయన ఆవేదన వ్యక్తం చేశారు.
యూరియా పంపిణీ విషయంలో ప్రభుత్వం అనుసరిస్తున్న తీరును ఆయన తప్పుబట్టారు. యూరియా కోసం కొత్తగా యాప్‌లు ప్రవేశపెట్టి రైతులను గందరగోళానికి గురిచేస్తున్నారని, క్షేత్రస్థాయిలో రైతులు తీవ్ర ఇబ్బందులు పడుతున్నారని విమర్శించారు. టెక్నాలజీ పేరుతో సామాన్య రైతులకు ఎరువులు అందకుండా చేయడం సరికాదని, వెంటనే పంపిణీ ప్రక్రియను సులభతరం చేయాలని ఆయన డిమాండ్ చేశారు.
రాష్ట్ర ప్రభుత్వం రైతుల పట్ల కక్షపూరితంగా వ్యవహరిస్తోందని, వానాకాలం పంటలకు సంబంధించి సుమారు రూ. 600 కోట్ల బోనస్‌ను పెండింగ్‌లో పెట్టడమే దీనికి నిదర్శనమని హరీశ్ రావు ధ్వజమెత్తారు. ముఖ్యమంత్రి రేవంత్ రెడ్డి కావాలనే రైతులను ఇబ్బందులకు గురిచేస్తున్నారని మండిపడ్డారు. ఇప్పటికైనా ప్రభుత్వం మొండివైఖరి వీడి, రైతులకు రావాల్సిన బకాయిలను వెంటనే విడుదల చేయాలని ఆయన కోరారు.