ఇంటర్ కాలేజీలకు,,,,ఈ నెల 11వ తేదీ నుండి 18వ తేదీ వరకు సంక్రాంతి సెలవులు

తెలంగాణ రాష్ట్రంలోని ఇంటర్మీడియట్ విద్యార్థులకు సంక్రాంతి సెలవుల విషయంలో స్పష్టత వచ్చేసింది. పండుగ సంబరాలను సొంత ఊళ్లలో జరుపుకోవాలని భావించే విద్యార్థులకు, వారి తల్లిదండ్రులకు ఈ ప్రకటన ఎంతో ఊరటనిచ్చింది. తెలంగాణ ఇంటర్ బోర్డు అకడమిక్ క్యాలెండర్ ప్రకారం ఈ ఏడాది సెలవుల తేదీలను అధికారికంగా ఖరారు చేసింది.

రాష్ట్రంలోని అన్ని ప్రభుత్వ, ప్రైవేటు , ఎయిడెడ్ జూనియర్ కళాశాలలకు ఈ నెల 11వ తేదీ నుండి 18వ తేదీ వరకు సంక్రాంతి సెలవులు ప్రకటించారు. అంటే ఈ నెల 10వ తేదీ శనివారం కాలేజీలు ముగిసిన తర్వాత విద్యార్థులకు వరుసగా ఎనిమిది రోజుల పాటు సెలవులు లభించనున్నాయి. తిరిగి ఈ నెల 19వ తేదీ ఆదివారం కావడంతో.. కళాశాలలు జనవరి 20న పునఃప్రారంభం అవుతాయి.

మరోవైపు పాఠశాల విద్యార్థుల విషయానికి వస్తే.. వారికి సెలవులు ఈ నెల 10వ తేదీ నుండే ప్రారంభమై 16వ తేదీ వరకు కొనసాగుతాయి. ఇంటర్ విద్యార్థులతో పోలిస్తే స్కూల్ విద్యార్థులకు ఒక రోజు ముందుగానే సెలవులు మొదలవుతున్నప్పటికీ.. కాలేజీ విద్యార్థులకు మరో రెండు రోజులు అదనంగా సెలవులు లభించడం విశేషం.

విద్యాశాఖ సెలవులను ప్రకటించడమే కాకుండా.. కొన్ని కఠినమైన మార్గదర్శకాలను కూడా జారీ చేసింది. వాటిలో.. సంక్రాంతి సెలవుల సమయంలో ఎట్టి పరిస్థితుల్లోనూ ప్రైవేటు కళాశాలలు ప్రత్యేక తరగతులు నిర్వహించకూడదని ఇంటర్ బోర్డు హెచ్చరించింది. ఈ నిబంధనలను అతిక్రమించే యాజమాన్యాలపై కఠిన చర్యలు తీసుకుంటామని అధికారులు స్పష్టం చేశారు. విద్యార్థులు మానసిక ఒత్తిడి లేకుండా పండుగను కుటుంబంతో గడిపేలా చూడాలన్నదే ప్రభుత్వ ఉద్దేశం.

సెలవుల ప్రకటన రావడంతో హైదరాబాద్ వంటి నగరాల నుండి సొంత గ్రామాలకు వెళ్లే విద్యార్థుల రద్దీ పెరగనుంది. దీనిని దృష్టిలో ఉంచుకుని ఆర్టీసీ ప్రత్యేక బస్సులను ఏర్పాటు చేస్తోంది. రైళ్లలో కూడా ముందస్తు రిజర్వేషన్లు ఇప్పటికే నిండిపోవడంతో.. విద్యార్థులు తమ ప్రయాణాలను ప్రణాళికాబద్ధంగా సిద్ధం చేసుకుంటున్నారు. తెలంగాణలో సెలవుల ప్రకటన వచ్చినప్పటికీ.. ఏపీలో ఇంటర్ కాలేజీలకు ఇంకా అధికారిక తేదీలు వెలువడలేదు.

అయితే అక్కడి పాఠశాలల షెడ్యూల్‌ను బట్టి ఒకట్రెండు రోజుల్లో స్పష్టత వచ్చే అవకాశం ఉంది. తెలంగాణ ప్రభుత్వం అకడమిక్ క్యాలెండర్‌ను తూచా తప్పకుండా పాటిస్తూ.. ముందుగానే సెలవులను ప్రకటించడం వల్ల ప్రైవేటు కాలేజీల వేధింపులకు అడ్డుకట్ట పడినట్లయింది. విద్యార్థులు తమ పాఠ్యపుస్తకాలకు విరామం ఇచ్చి.. సంప్రదాయ పండుగను ఆనందంగా జరుపుకోవడానికి ఈ ఎనిమిది రోజుల విరామం ఎంతగానో తోడ్పడనుంది.