ఖమ్మం-దేవరపల్లి గ్రీన్ ఫీల్డ్,,, నేషనల్ హైవే మూసివేత

ఖమ్మం నుంచి దేవరపల్లి వరకు నిర్మిస్తున్న నూతన గ్రీన్ ఫీల్డ్ హైవేపై వాహనాల రాకపోకలను అధికారులు పూర్తిగా నిలిపివేశారు. సంక్రాంతి పండుగ రద్దీని దృష్టిలో ఉంచుకుని ప్రయాణికుల సౌకర్యార్థం తాత్కాలికంగా తెరిచిన ఈ రహదారిని.. వరుస ప్రమాదాల నేపథ్యంలో మూసివేయాలని నేషనల్ హైవే అథారిటీ ఆఫ్ ఇండియా నిర్ణయించింది.

పండుగ సమయంలో హైదరాబాద్ నుండి ఆంధ్రప్రదేశ్ వెళ్లే వారికి సుమారు 120 కిలోమీటర్ల మేర ప్రయాణించేందుకు అనుమతి ఇచ్చారు. అయితే.. గత కొద్ది రోజులుగా ఇక్కడ జరుగుతున్న ప్రమాదాలు అధికారులను ఆందోళనకు గురిచేస్తున్నాయి. ఈ నెల 16న తల్లాడ, వైరా మండలాల్లో జరిగిన వేర్వేరు ప్రమాదాల్లో ఎనిమిది మంది గాయపడ్డారు. పొగమంచు కప్పి ఉండటం, మితిమీరిన వేగంతో వాహనాలు నడపడమే ఈ ప్రమాదాలకు కారణమని తేలింది. మరీ ముఖ్యంగా.. ఈ నెల 23న కల్లూరు వద్ద జరిగిన బైక్ ప్రమాదంలో ఇద్దరు యువకులు మరణించడం విషాదం నింపింది. అసలు ఈ యాక్సెస్ కంట్రోల్డ్ హైవేలపై ద్విచక్ర వాహనాలకు అనుమతి లేకపోయినా.. కొందరు రహస్యంగా ప్రవేశించి ప్రాణాలు కోల్పోతున్నారు.

హైవేపైకి ఇతర వాహనాలు రాకుండా ఎంట్రీ, ఎగ్జిట్ పాయింట్ల వద్ద బారికేడ్లతో పాటు భారీ క్రాష్ బ్యారియర్లను కూడా ఏర్పాటు చేశారు. నిర్మాణ సామగ్రిని తీసుకెళ్లే వాహనాలకు తప్ప, సామాన్య వాహనదారులకు ప్రవేశం లేకుండా కఠిన నిబంధనలు అమలు చేస్తున్నారు. ఖమ్మం జిల్లా పరిధిలోని ధంసలాపురం వద్ద రైల్వే బ్రిడ్జి, మున్నేరు వంతెన పనులు ఇంకా కొనసాగుతున్నాయి. ఈ పనులన్నీ పూర్తయి.. రహదారి అధికారికంగా ప్రారంభమయ్యే వరకు ఎట్టి పరిస్థితుల్లోనూ వాహనాలను అనుమతించబోమని అధికారులు స్పష్టం చేశారు.

ఈ గ్రీన్ ఫీల్డ్ హైవేపై గరిష్ఠ వేగ పరిమితి గంటకు 100 కిలోమీటర్లు. కానీ.. ఇటీవల జరిగిన ప్రమాదాలలో వాహనాల వేగం 120 కిలోమీటర్ల కంటే ఎక్కువగా ఉన్నట్లు గుర్తించారు. భవిష్యత్తులో ఇలాంటి సంఘటనలు జరగకుండా రహదారి పొడవునా సీసీ కెమెరాలతో పాటు స్పీడ్ గన్స్‌ను ఏర్పాటు చేస్తున్నారు. వేగ పరిమితి దాటితే ఆటోమేటిక్ గా చలానా జనరేట్ అయ్యేలా సాంకేతికతను సిద్ధం చేస్తున్నారు. ఈ రహదారి పూర్తిగా అందుబాటులోకి వస్తే హైదరాబాద్ నుండి వైజాగ్, రాజమండ్రి వెళ్లే ప్రయాణికులకు సుమారు గంటన్నర సమయం ఆదా అవుతుంది.