రూ.20 వేలు జీతం ఉంటే హోమ్ లోన్ ఎంతిస్తారు

నా శాలరీకి బ్యాంకులు హోమ్ లోన్ ఇస్తాయా? ఇస్తే ఎంతిస్తాయి? అని చాలా మంది సొంతింటి కల నెరవేర్చుకోవాలని భావిస్తున్న వారిలో సహజంగా మొదటగా వచ్చే ప్రశ్న. నెల వారీ జీతం తో ఉద్యోగం చేసే వ్యక్తులు, సొంత వ్యాపారం చేసే వారికి గృహ రుణ మంజూరులో బ్యాంకులు తమ స్ట్రాటజీని అనుసరిస్తాయి. ఈ క్రమంలో ఒక ప్రైవేట్ ఉద్యోగి నెల వారీ జీతం రూ.20 వేలు తీసుకుంటున్నాడు అనుకుందాం. అతను సిటీకి దగ్గర్లో ఇల్లు కొనుగోలు చేయాలని భావిస్తున్నప్పుడు బ్యాంకులో హోమ్ లోన్ కోసం దరఖాస్తు చేసుకోవచ్చా? ఇంటి రుణం పొందవచ్చా? బ్యాంకులు ఎంత వరకు లోన్ ఇస్తాయి అనే విషయాలు తెలుసుకుందాం.

రూ.20 వేల శాలరీ అందుకునే వ్యక్తులకు బ్యాంకులు హోమ్ లోన్ మంజూరు చేస్తాయి. సాధారణంగా బ్యాంకులు ఉద్యోగ సంస్థ అందించిన ప్లే స్లిప్స్, 6 నెలల బ్యాంకు స్టేట్ మెంట్, ఆదాయ పన్ను రిటర్నులు వంటి ప్రూఫ్స్ అడిగే అవకాశం ఉంటుంది. అలాగే ఉద్యోగాలు చేస్తున్న వారి నికర నెలవారీ ఆదాయం కంటే 60 రెట్ల వరకు గృహ రుణాలు ఇస్తుంటాయి బ్యాంకులు. అలాగే వారి నెల వారీ ఈఎంఐ జీతంలో 50 శాతానికి మించకుండా జాగ్రత్తపడతాయి. 50 శాతానికి మించింతే ఈఎంఐ చెల్లింపులు చేసే సామర్థ్యం రుణ గ్రహీతకు ఉండదని బ్యాంకులు భావిస్తాయి. సాధారణంగా బ్యాంకులు రూ.20 వేల శాలరీ ఉన్న వ్యక్తికి రూ.10 లక్షల వరకు లోన్ ఇవ్వొచ్చు. దీనిపై వడ్డీ రేటు 7.5 శాతం నుంచి 8.50 శాతం వరకు ఉండే అవకాశం ఉంటుంది.

అయితే, ఇది బ్యాంకులను బట్టి మారుతుంటుంది. అలాగే రూ.30 వేల శాలరీ ఉంటే రూ.17 లక్షల వరకు, రూ. 40 వేల శాలరీ ఉంటే రూ. 23 లక్షల వరకు, రూ.50 వేల శాలరీ ఉన్న వారికి రూ.30 లక్షల వరకు లోన్ తీసుకునేందుకు అర్హత ఉంటుంది. హోమ్ లోన్ తీసుకునేందుకు 21 ఏళ్ల నుంచి 55 ఏళ్ల వయసు మధ్య ఉన్న వారు అర్హులు. సాధారణంగా బ్యాంకులు 650 కన్నా ఎక్కువ క్రెడిట్ స్కోర్ ఉన్న వారికి రుణాలు ఇచ్చేందుకు మొగ్గు చూపుతాయి. అలాగే 750 కన్నా ఎక్కువ క్రెడిట్ స్కోర్ ఉంటే వడ్డీ రేటులో రాయితీలు సైతం ఇస్తుంటాయి.

మరోవైపు.. తీసుకున్న లోన్‌పై ఈఎంఐ టెన్యూర్ అనేది రుణ గ్రహీత వయసును బట్టి మారుతుంటుంది. నెలవారీ ఈఎంఐ జీతంలో 50 శాతానికి మించకుండా వయసును బట్టి బ్యాంకులు లోన్ టెన్యూర్ నిర్ణయిస్తాయి. 35 ఏళ్ల వయసు వరకు శాలరీ అందుకునే వ్యక్తులకు ఈఎంఐ టెన్యూర్ 30 ఏళ్ల వరకు ఎంచుకునే వీలుంటుంది. వయసు పెరిగే కొద్ది ఈ టెన్యూర్ తగ్గుతూ వస్తుంది. రూ.20 వేల జీతం ఉన్న వ్యక్తి రూ. 10 లక్షల లోన్ తీసుకుంటే 7.50 శాతంతో ఎంత ఈఎంఐ పడుతుందో చూద్దాం. 15 ఏళ్ల పాటు టెన్యూర్ పెట్టుకుంటే నెలవారీ ఈఎంఐ రూ.10 వేల వరకు ఉంటుంది. అలాగే 20 ఏళ్ల కాల వ్యవధి పెట్టుకుంటే నెలవారీ ఈఎంఐ రూ.8,800 వరకు ఉంటుంది. అలాగే 30 ఏళ్ల టెన్యూర్ ఎంచుకుంటే నెలవారీ ఈఎంఐ రూ.7,690 వరకు ఉండొచ్చు.