సీనియర్ సిటిజన్లకు 2 శాతం ఎక్కువ వడ్డీ.. కేంద్రం వద్ద ప్రతిపాదన.

ఫిక్స్‌డ్ డిపాజిట్లపై సీనియర్ సిటిజన్లకు 2 శాతం మేర అదనంగా వడ్డీ ఇవ్వాలని కోరుతున్నాయి భారత పెన్షనర్ సమాజ్, ఫెడరేషన్ ఆఫ్ పెన్షనర్స్ సంఘాలు. బ్యాంకు డిపాజిట్లపై జనరల్ కస్టమర్లకు ఇస్తోన్న స్టాండర్డ్ వడ్డీ రేటుపై అదనంగా అందించే వడ్డీ రేటును 2 శాతానికి పెంచాలని కోరుతూ ప్రధాన మంత్రి నరేంద్ర మోదీ, కేంద్ర ఆర్థిక మంత్రి నిర్మలా సీతారామన్‌కు లేఖ రాశాయి పెన్షనర్ల సంఘాలు. సీనియర్ సిటిజన్లకు ఇచ్చే వడ్డీ రేటు కీలకంగా మారుతుందని లేఖలో పేర్కొన్నాయి. ప్రస్తుతం బ్యాంకులు ఇస్తున్న 0.25 శాతం నుంచి 0.50 శాతం అదనపు వడ్డీని 2 శాతానికి పెంచితే సీనియర్ సిటిజన్ ఎఫ్‌డీ గణాకాల్లో క్షీణత సమస్యను అధిగమించవచ్చని కోరాయి. దీంతో సీనియర్లు ఎక్కువ మంది సేవింగ్స్ చేసుకునేందుకు ముందుకు వస్తారని లేఖలో కేంద్రానికి సూచించాయి.

ప్రస్తుతం దేశంలోని దాదాపు అన్ని ప్రభుత్వ, ప్రైవేట్ బ్యాంకులు జనరల్ కస్టమర్లతో పోలిస్తే సీనియర్ సిటిజన్లకు అదనంగా 0.25 శాతం నుంచి 0.50 శాతం వరకు వడ్డీ రేటును కల్పిస్తున్నాయి. అలాగే కొన్ని బ్యాంకులు సూపర్ సీనియర్ సిటిజన్లకు దానిపైన కూడా అదనపు వడ్డీ ఇస్తున్నాయి. ప్రస్తుతం ప్రముఖ ప్రైవేట్ బ్యాంకుల్లో సీనియర్ సిటిజన్లకు అత్యధికంగా 8.6 శాతం వరకు వడ్డీ లభిస్తోంది. ప్రభుత్వ రంగ బ్యాంకుల్లో చూస్తే పంజాబ్ అండ్ సింధ్ బ్యాంక్ గరిష్ఠంగా 7.9 శాతం ఎఫ్‌డీ వడ్డీ రేట్లు కల్పిస్తోంది. మరోవైపు.. ఫిక్స్‌డ్ డిపాజిట్లపై అదనపు వడ్డీ పెంచడంతో పాటు.. బ్యాంకులు, ఫోస్టాఫీసుల్లో డిపాజిట్ చేసే సీనియర్లకు సమగ్ర బీమా కవరేజీని కల్పించాలని, దీంతో వారికి అదనపు భద్రత లభిస్తుందని లేఖలో కోరాయి పెన్షనర్ల సంఘాలు. ఇలా చేయడం ద్వారా సీనియర్లకు ఆర్థిక రక్షణ లభిస్తుందని తెలిపాయి. అలాగే పెన్షన్లను ట్యాక్స్ ఫ్రీగా చేయాలని కోరాయి. ప్రస్తుతం పెరుగుతున్న ధరలను దృష్టిలో పెట్టుకుని సీనియర్లకు అదనపు బెనిఫిట్స్ కల్పించాలని 5వ సీపీసీ లోని ప్యారా 167.11 ప్రకారం పెన్షన్లు, డియర్‌నెస్ రిలీఫ్, ఫిక్స్‌డ్ మెడికల్ అలవెన్స్‌లను ఆదాయపు పన్ను పరిధి నుంచి తొలగించాలని కోరాయి.

అలాగే.. కోవిడ్-19 మహమ్మారి సమయానికి సంబంధించిన డియర్‌నెస్ అలెవెన్స్, డియర్‌నెస్ రిలీఫ్ 18 నెలల బకాయిలను వెంటనే విడుదల చేయాలని కేంద్ర ఆర్థిక మంత్రి నిర్మలా సీతారామన్, కేంద్ర ప్రభుత్వానికి లేఖ ద్వారా కోరింది భారతీయ ప్రతిక్ష మజ్దూర్ సంఘ్. కరోనా సమయంలో 2020, జనవరి నుంచి 2021 జూన్ వరకు 18 నెలల పాటు చెల్లించాల్సిన డీఏ, డీఆర్ లను నిలిపివేసింది కేంద్రం. ఆ తర్వాత జులై, 2021లో డీఏ, డీఆర్‌లను కేంద్ర ప్రభుత్వ ఉద్యోగులు, పెన్షనర్లకు 17 శాతం నుంచి 28 శాతానికి పెంచింది. ఈ క్రమంలో కోవిడ్ టైమ్ లోని ఏరియర్స్‌ని వెంటనే ఇవ్వాలని కోరుతున్నాయి పెన్షనర్ల సంఘాలు.