రాణించిన రాహుల్, జడేజా.. రెండో రోజు భారత్‌దే.. ఇంగ్లాండ్‌పై తిరుగులేని స్థితిలో రోహిత్ సేన

హైదరాబాద్ వేదికగా ఇంగ్లాండ్‌తో జరుగుతున్న తొలి టెస్టులో భారత్ పట్టుబిగించింది. రెండో రోజు ఆట పూర్తయ్యే సరికే 7 వికెట్ల నష్టానికి 421 రన్స్ చేసిన భారత్ స్పష్టమైన ఆధిక్యం సాధించింది. మొత్తంగా తొలి ఇన్నింగ్స్‌లో 9 మంది బ్యాటింగ్ చేయగా.. అందులో అశ్విన్ మినహా మిగతా వారంతా రెండంకెల స్కోరు చేశారు. ముగ్గురు బ్యాటర్లు 80కిపైగా రన్స్ చేశారు. ఇక భారత పిచ్‌లపై సత్తాచాటాలనే లక్ష్యంతో ఏకంగా ముగ్గురు స్పెషలిస్టు స్పిన్నర్లతో బరిలోకి దిగిన ఇంగ్లీష్ జట్టు రెండో రోజు పూర్తిగా తేలిపోయింది. పార్ట్ టైమ్ స్పిన్నర్ జో రూట్.. ఆ జట్టుకు ప్రధాన బౌలర్‌గా మారిపోయాడు. యశస్వి జైశ్వాల్, శ్రీకర్ భరత్‌ను ఔట్ చేశాడు. మిగతా బౌలర్లు వికెట్ల కోసం తీవ్రంగా శ్రమించారు. టామ్ హార్ట్లీ 25 ఓవర్లలో 131 పరుగులు సమర్పించుకున్నాడు. రెహాన్ అహ్మద్ 23 ఓవర్లలో 105 పరుగులు ఇచ్చాడు.

ఓవర్‌ నైట్ స్కోరు 119/1 తో రెండో రోజు ఆట ప్రారంభించిన భారత్‌కు ఆదిలోనే ఎదురుదెబ్బ తగిలింది. వన్డే తరహాలో బ్యాటింగ్ చేస్తున్న యశస్వి జైశ్వాల్ (80).. మరో నాలుగు పరుగులు మాత్రమే జోడించి రూట్ బౌలింగ్‌లో పెవిలియన్ చేరాడు. ఆ తర్వాత క్రీజులోకి వచ్చిన కేఎల్ రాహుల్.. సాధికారికంగా బ్యాటింగ్ చేశాడు. క్రీజులో ఉన్నంత సేపు అసౌకర్యంగా కనిపించిన గిల్.. పేలవ ఫామ్‌ను కొనసాగిస్తూ 66 బంతుల్లో 23 పరుగులు చేసి ఔట్ అయ్యాడు. అనంతరం రాహుల్, శ్రేయస్‌ అయ్యర్.. ఇంగ్లాండ్ బౌలర్లను సమర్థవంతంగా ఎదుర్కొన్నారు. దీంతో లంచ్ సమయానికి భారత్ 222/3తో నిలిచింది.

అయితే లంచ్ నుంచి వచ్చిన కాసేపటికే భారత్‌కు మరో షాక్ తగిలింది. భారీ షాట్‌కు ప్రయత్నించి శ్రేయస్ అయ్యర్ (35) ఔట్ అయ్యాడు. ఆ తర్వాత క్రీజులోకి వచ్చిన రవీంద్ర జడేజా.. వీలు చిక్కినప్పుడల్లా బౌండరీలు కొడుతూ స్కోరు బోర్డును పరుగులు పెట్టించాడు. దీంతో టీ బ్రేక్ కంటే ముందే భారత్.. ఇంగ్లాండ్ స్కోరును దాటేసి ఆధిక్యంలోకి వచ్చింది. అయితే టీ బ్రేక్‌కు ముందు కేఎల్ రాహుల్ (86) ఔట్ అయ్యాడు. సెంచరీ చేసేలా కనిపించిన రాహుల్.. టార్ హార్ట్లీ బౌలింగ్‌లో సిక్స్ కొట్టబోయి క్యాచ్ ఔట్ అయ్యాడు. దీంతో టీ బ్రేక్ సమయానికి భారత్ 309/5తో నిలిచింది.

ఈ దశలో బాధ్యతాయుతంగా బ్యాటింగ్ చేసిన రవీంద్ర జడేజా.. శ్రీకర్ భరత్ (41)తో కలిసి ఆధిక్యాన్ని పెంచాడు. ఈ క్రమంలోనే జడ్డూ హాఫ్ సెంచరీ పూర్తి చేసుకున్నాడు. స్వల్ప వ్యవధిలోనే భరత్, అశ్విన్ (1 రనౌట్) ఔట్ కావడంతో భారత్.. ఓ దశలో 358/7 వికెట్లు కోల్పోయింది. రవీంద్ర జడేజాకు తోడైన అక్షర్ పటేల్.. ఇంగ్లీష్ బౌలర్లకు ఏమాత్రం అవకాశం ఇవ్వలేదు. వీరిద్దరూ 8వ వికెట్‌కు అజేయంగా 63 పరుగులు జోడించారు. దీంతో భారత్ రెండో రోజు ఆట ముగిసే సమయానికి 421/7తో నిలిచింది. క్రీజులో రవీంద్ర జడేజా (81), అక్షర్ పటేల్ (35)లు క్రీజులో ఉంగా.. ప్రస్తుతం భారత జట్టు 175 పరుగుల ఆధిక్యంలో ఉంది. ఇక ఇంగ్లాండ్ బౌలర్లలో టామ్ హార్ల్డీ 2, జో రూట్ 2, జాక్ లీచ్ 1, రెహాన్ అహ్మద్ 1 వికెట్ తీశారు.