భారీగా పెరిగిన జీఎస్‌టీ వసూళ్లు.. ఫిబ్రవరిలో రూ. 1.68 లక్షల కోట్లు.. ఏపీ కంటే తెలంగాణే బెటర్!

భారత్‌లో వస్తు, సేవల పన్ను వసూళ్లు  మళ్లీ భారీ స్థాయిలో నమోదయ్యాయి. ఫిబ్రవరి నెలకు సంబంధించి తాజాగా డేటా విడుదలైంది. ఫిబ్రవరిలో మొత్తం రూ. 1.68 లక్షల కోట్ల జీఎస్టీ వసూళ్లు వచ్చాయి. ఏడాది కిందట ఇదే సమయంతో పోలిస్తే ఇప్పుడు 12.5 శాతం ఎక్కువ కావడం విశేషం. ఈ వసూళ్లలో సెంట్రల్ జీఎస్టీ కలెక్షన్లు రూ. 31,785 కోట్లుగా నమోదు కాగా.. స్టేట్ జీఎస్టీ రూ. 39,615 కోట్లుగా ఉంది. ఇంటిగ్రేటెడ్ జీఎస్టీ రూ. 84098 కోట్లు.. సెస్ రూ. 12,839 కోట్లుగా నమోదైంది. ఈ సంవత్సరం జనవరితో పోలిస్తే మాత్రం 3.3 శాతం తక్కువ వసూళ్లు నమోదయ్యాయి. జనవరి నెలకు సంబంధించి జీఎస్టీ కలెక్షన్లు రికార్డు స్థాయిలో రూ.1.72 లక్షల కోట్లుగా ఉండటం విశేషం. ఇది ఇప్పుడు సవరించగా రూ. 1.74 లక్షల కోట్లుగా తేలింది.

ఫిబ్రవరి కలెక్షన్లతో కలుపుకొని.. ప్రస్తుత ఆర్థిక సంవత్సరంలో మొత్తం జీఎస్టీ వసూళ్లు రూ. 18.40 లక్షల కోట్లుగా ఉంది. ఇది 2022-23 ఆర్థిక సంవత్సరంతో పోలిస్తే 11.7 శాతం ఎక్కువ అని ఆర్థిక మంత్రిత్వ శాఖ వెల్లడించింది. కేంద్ర ప్రభుత్వ అంచనాలకు అనుగుణంగా జీఎస్టీ వసూళ్లు వస్తున్నట్లు తెలిపింది. దీనిని బట్టి వృద్ధి బాటలోనే పయనిస్తున్నామని.. సానుకూలంగా ఫలితాలు వస్తున్నాయని చెప్పుకొచ్చింది.

తెలంగాణ, ఏపీల్లో ఇలా..

తెలంగాణలో జీఎస్టీ వసూళ్లు 18 శాతం పెరిగి రూ. 5211 కోట్లుగా నమోదైంది. ఇదే ఆంధ్ర ప్రదేశ్‌లో చూసినట్లయితే కేవలం 3 శాతమే పెరుగుదల కనిపించింది. 2023 ఫిబ్రవరిలో ఇది రూ. 3557 కోట్లుగా ఉండగా.. ఇప్పుడు రూ. 3678 కోట్లకు చేరింది. వరుసగా 12 నెలలోనూ భారత్‌లో జీఎస్టీ వసూళ్లు రూ. 1.50 లక్షల కోట్ల మార్కు దాటడం విశేషం. 2023-24 ఆర్థిక సంవత్సరానికి సంబంధించి సగటున నెలవారీ జీఎస్టీ వసూళ్లు రూ. 1.67 లక్షల కోట్లకు చేరింది. ఇప్పటివరకు అత్యధికంగా 2023, ఏప్రిల్ నెలలో రూ. 1.87 లక్షల కోట్ల జీఎస్టీ వసూళ్లు వచ్చాయి. తర్వాత ఈ ఏడాది జనవరి ఉంది.

నెలవారీగా జీఎస్టీ వసూళ్లు కొంతకాలంగా పెరుగుతున్నాయి. 2017-18 సమయంలో ఏడాదికి సగటున రూ. లక్ష కోట్ల కంటే దిగువనే ఉండగా.. ఇప్పుడు అది రూ.1.50 లక్షల కోట్ల మార్కును దాటి నమోదవుతుండటం విశేషం అని చెప్పొచ్చు. కరోనా విజృంభించిన తర్వాతి నుంచి జీఎస్టీ వసూళ్లు భారీగా పెరుగుతున్నాయి. 2020-21, 2021-22, 2022-23 లో జీఎస్టీ కలెక్షన్స్ పెరిగి సగటు మార్కు రూ.1.51 లక్షల కోట్లుగా నమోదైంది.