వారందరికీ ఇన్‌కమ్ ట్యాక్స్ నోటీసులు.. ఆ ట్రాన్సాక్షన్లపై ఫోకస్.. మెయిల్ చెక్ చేసుకోండి!

పన్ను చెల్లింపుదారులకు బిగ్ అలర్ట్. ఇన్‌కమ్ ట్యాక్స్ డిపార్ట్‌మెంట్ ఈ ఆర్థిక ఏడాది 2023- 24 కు సంబంధించిన అడ్వాన్స్ ట్యాక్స్ లక్ష్యంగా ప్రత్యేక ఎలక్ట్రానికి క్యాంపెయిన్ (ఇ- క్యాంపెయిన్) ప్రారంభించేందుకు సిద్ధమైంది. ఈ క్యాంపెయిన్ లో భాగంగా ముఖ్యమైన, పెద్ద మొత్తంలో జరిగిన ట్రాన్సాక్షన్లపై స్పెషల్ ఫోకస్ పెట్టింది. పన్ను చెల్లింపుదారులకు నోటీసుల ద్వారా సమాచారం చేరవేస్తోంది. కీలకమైన ఫైనాన్షియల్ ట్రాన్సాక్షన్ల గురించి ఇ- మెయిల్స్, ఎస్ఎంఎస్‌ల ద్వారా వ్యక్తులు, సంస్థలకు తెలియజేస్తోంది. ఆయా ట్రాన్సాక్షన్లను తమ లెక్కలోకి తీసుకుని మార్చి 15, 2024 నాటికి చెల్లించాల్సిన అడ్వాన్స్ ట్యాక్స్ పేమెంట్లు పూర్తి చేసేందుకు హెచ్చరికలు చేస్తోంది.

ఆర్థిక ఏడాది 2023- 24 లో వ్యక్తిగత పన్ను చెల్లింపుదారులు, సంస్థలు నిర్వహించ కొన్ని కీలకమైన ఆర్థిక లావాదేవీలపై సమాచారం సేకరించింది ఐటీ డిపార్ట్‌మెంట్. ప్రస్తుత ఆర్థిక ఏడాదిలో ఇప్పటి వరకు చెల్లించిన పన్నుల విశ్లేషణ ఆధారంగా.. అసెస్మెంట్ ఇయర్ 2024- 25 కి కాలంలో చేపట్టిన ఆర్థిక కార్యకలాపాలకు అనుగుణంగా వారి అడ్వాన్స్ ట్యాక్స్ పేమెంట్లు లేనట్లు గుర్తించింది. ఈ మేరకు ప్రధాన ట్రాన్సాక్షన్ల వివరాలను పన్ను చెల్లింపుదారులకు చేరవేస్తూ వారిని హెచ్చరిస్తోంది.

ట్యాక్స్ పేయర్లకి సమాచారం అందించి వారు అడ్వాన్స్ ట్యాక్స్ చెల్లించేలా చేసేందుకు ఆదాయపు పన్ను శాఖ ఇ-క్యాంపెయిన్ లాంఛ్ చేస్తోంది. దీనికి 'అడ్వాన్స్ ట్యాక్స్ ఇ-క్యాంపెయిన్ అసెస్మెంట్ ఇయర్ 2024- 25 లో ముఖ్యమైన ట్రాన్సాక్షన్లు' అని నాకరణం చేసింది. ఈ వివరాలను తెలుసుకుని తమ అడ్వాన్స్ ట్యాక్స్ వివరాలను ఖచ్చితత్వంతో లెక్కించాలని, మార్చి 15, 2024 లోపు బకాయిలను పూర్తిగా చెల్లించాలని కోరుతోంది. వివిధ మార్గాల ద్వారా ముఖ్యమైన, పెద్ద ట్రాన్సాక్షన్ల వివరాలను ఇన్‌కమ్ ట్యాక్స్ విభాగం సేకరించింది.

ఆయా వివరాలను యాన్యువల్ ఇన్ఫర్మేషన్ స్టేట్‌మెంట్ (AIS) మాడ్యూల్ లో పెందుపరిచింది. వాటిని పన్ను చెల్లింపుదారులు, సంస్థలు యాక్సెస్ చేసేలా అవకాశం కల్పించింది. ఏఐఎస్ లో నమోదైన ట్రాన్సాక్షన్ల ఆధారంగా తమ అడ్వాన్స్ ట్యాక్స్ లయబిలిటీ ఉండాలని కోరుతోంది. ఆ వివరాలను తెలుసుకునేందుకు పన్ను చెల్లింపుదారులు కంప్లియన్స్ పోర్టల్‌లో ఇ- ఫైలింగ్ ఖాతాలోకి లాగిన్ కావాల్సి ఉంటుంది. అక్కడి నుంచి ఇ-క్యాంపెయిన్ ట్యాబ్ పై క్లిక్ చేయడంతో మీ ముఖ్యమైన ట్రాన్సాక్షన్ల వివరాలు కనిపిస్తాయి.