మీ దగ్గర పాన్ కార్డు ఉందా? ఈ తప్పులు చేస్తే రూ. 10 వేల వరకు ఫైన్.. బీ అలర్ట్

బ్యాంక్ అకౌంట్ ఎలాగో.. ఆధార్ కార్డు ఎలాగో.. భారతీయులకు పాన్ కార్డు కూడా అలాగే అత్యంత అవసరంగా మారింది. కొత్తగా బ్యాంక్ అకౌంట్ తెరవాలన్నా.. రూ. 50 వేలకు మించి లావాదేవీలు చేయాలన్నా.. పర్మినెంట్ అకౌంట్ నంబర్ (PAN) తప్పనిసరి. కొత్తగా బైక్ తీసుకున్నా లేదా ఏదైనా ఆస్తి అమ్మాలన్నా.. కొనాలన్నా కూడా పాన్ కార్డు అవసరం. ఉద్యోగులు, వ్యాపారులకు ఇక పాన్ కార్డు సుపరిచితమే. వీరి దగ్గర కచ్చితంగా ఉండి తీరుతుంది. అయితే పాన్ కార్డు విషయంలో కొన్ని పొరపాట్లు చేస్తే మొదటికే మోసం వచ్చే ప్రమాదం ఉంటుంది. భారీ మొత్తంలో జరిమానా చెల్లించాల్సి ఉంటుంది. పాన్‌ కార్డుకు సంబంధించి ఎవరైనా తప్పుడు వివరాలు ఇవ్వడం లేదా.. రెండేసి కార్డులు కలిగి ఉండటం వంటివి చట్టరీత్యా నేరంగా పరిగణిస్తారు. దీనికి రూ. 10 వేల వరకు జరిమానా చెల్లించాల్సి ఉంటుంది.

ఐటీ చట్టం-1961లోని సెక్షన్- 272B ప్రకారం ఎవరైనా తప్పుడు పాన్ వివరాలు ఇవ్వడం చట్టరీత్యా నేరమే. దీనికి రూ. 10 వేలు ఫైన్ చెల్లించాలని చెబుతోంది ఐటీ శాఖ. ముఖ్యంగా ఐటీ రిటర్న్స్ ఫైల్ చేయడం.. పాన్ వివరాలు ఇవ్వాల్సిన ఇతర చోట్ల కూడా తప్పుడు వివరాలివ్వడం అనేది నేరం. అందుకే.. అంకెలు, సంఖ్యలతో కూడిన పాన్ నంబర్ ఎక్కడా తప్పుగా రాయొద్దు. దీని కోసం పాన్ వివరాలు ఎక్కడైనా నింపేటప్పుడు జాగ్రత్తగా ఉండాలి. పాన్ కార్డుపై తొలి 5 ఆంగ్ల అక్షరాలు, తర్వాత నాలుగు అంకెలు, చివర్లో మళ్లీ ఆంగ్ల అక్షరం ఉంటుందని గుర్తుంచుకోవాలి. ఎక్కువ మంది సున్నా, ఒక ఆంగ్ల అక్షరం ఉన్న చోట గుర్తించే క్రమంలో తడబాటు చెందుతుంటారు.

రెండు కార్డులున్నాయా?

ఐటీ చట్టం ప్రకారం.. ఒక వ్యక్తి 2 పాన్ కార్డులు కలిగి ఉండటం కూడా చట్టరీత్యా నేరమే. ఆదాయ పన్ను దర్యాప్తులో మీ దగ్గర రెండు పాన్ కార్డులు ఉన్నట్లు తేలితే.. భారీగా జరిమానా చెల్లించాలి. ఇంకా.. అధికారులు మీ బ్యాంక్ అకౌంట్‌ను స్తంభింపజేయడం వంటి కఠిన చర్యలు తీసుకుంటారు. అందుకే మీ దగ్గర రెండు పాన్ కార్డులు ఉంటే వెంటనే వెనక్కి ఇచ్చేయండి.

2 కార్డులు ఎలా ఉంటాయంటే?

ఒక వ్యక్తికి 2 పాన్ కార్డులు ఎలా ఉంటాయనే అనుమానం మీకు రావొచ్చు. చాలా మంది పాన్ కార్డ్‌లో ఏదైనా తప్పులుంటే దాన్ని సరిదిద్దుకోకుండా కొత్త దాని కోసం అప్లై చేస్తుంటారు. ఇది ఒక రకంగా రెండు పాన్ కార్డులు కలిగి ఉండేందుకు దోహదం చేస్తుంది. కార్డు కోసం అప్లై చేసినా కొన్ని సందర్భాల్లో వచ్చే అవకాశం ఉండదు. దీంతో కొందరు మళ్లీ మళ్లీ అప్లై చేస్తుంటారు. అందుకే కొత్త పాన్ అప్లై చేసే ముందు పాన్ స్టేటస్ చెక్ చేసుకోవడం మంచిది. ఇంకా మహిళలైతే పెళ్లి చేసుకున్న తర్వాత వారి ఇంటి పేరు మార్పులో భాగంగా.. కొత్త పాన్ కార్డు కోసం దరఖాస్తు చేస్తారు. అయితే పెళ్లి చేసుకున్నాక పాన్ కార్డులో కరెక్షన్స్‌ను సరిచేసుకుంటే సరిపోతుంది.

ఇలా వెనక్కివ్వండి..

ఆఫ్‌లైన్‌లో పాన్ కార్డు తొలగించడం కోసం ముందుగా మీరు ఫాం 49A లో మీ సమాచారం నింపాల్సి ఉంటుంది. తర్వాత దగ్గర్లోని NCDCL కేంద్రానికి వెళ్లి మీ డీటెయిల్స్ సమర్పించాలి. అక్కడ పాన్ కార్డు సహా అధికారులు అడిగిన వివరాలు సమర్పించాలి. అంతకుముందు ఆదాయ పన్ను శాఖ సంబంధిత అధికారికి లేఖ రాయాలి. తర్వాత డూప్లికేట్ పాన్ సమర్పించినట్లు రశీదు తీసుకోవాలి. ఆన్‌లైన్‌లో అయితే మీరు పాన్ సర్వీస్ పోర్టల్లోకి వెళ్లి.. ఛేంజ్ or కరెక్షన్‌పై క్లిక్ చేయాలి. అక్కడ మీ పూర్తి డీటెయిల్స్ ఎంటర్ చేసి.. పాన్ కార్డు అప్డేట్ చేసుకోవాలి.