కష్టకాలంలో విప్రోకు పెద్ద ఎదురుదెబ్బ.. అంతా తలకిందులు.

దిగ్గజ ఐటీ సంస్థ విప్రో మే 17న కీలక ప్రకటన చేసింది. కంపెనీ చీఫ్ ఆపరేటింగ్ ఆఫీసర్ అమిత్ చౌదరీ తన పదవికి రాజీనామా చేశారు. ఆయన రాజీనామా తక్షణమే అమల్లోకి వస్తుందని కూడా సంస్థ స్పష్టం చేసింది. కంపెనీ వెలుపల అవకాశాల్ని అందిపుచ్చుకునేందుకు ఆయన తప్పుకున్నారని ఎక్స్చేంజీ ఫైలింగ్‌లో వెల్లడించింది. మే 31 వరకు అమిత్ విధులు నిర్వర్తిస్తారని తెలిపిన విప్రో.. ఆయన స్థానంలో వెంటనే సంజీవ్ జైన్‌ను నియమించింది. ఈయన బెంగళూరు ప్రధాన కేంద్రంగా కార్యకలాపాలు నిర్వర్తిస్తారని స్పష్టం చేసింది. ఇక విప్రోను కొంతకాలంగా కష్టాలు వెంటాడుతూనే ఉన్నాయి. అగ్రనాయకత్వానికి చెందిన వ్యక్తులు.. వరుసగా రాజీనామాలు చేయడం ఆందోళన కలిగిస్తోంది. ఇది ఉద్యోగుల్లో కూడా మనోస్థైర్యం దెబ్బతీస్తోంది.

విప్రో నుంచి గతంలో పెద్ద పెద్ద లీడర్లు తప్పుకోగా.. ఇప్పుడు కూడా అదే జరుగుతోంది. ఏప్రిల్ 6న ఏకంగా కంపెనీ సీఈఓ థియరీ డెలాపోర్టే రాజీనామా చేయడం చర్చనీయాంశమైంది. ఆయన స్థానంలో వెంటనే శ్రీనివాస్ పల్లియాను సీఈఓగా నియమించింది. పల్లియా వచ్చిన తర్వాత విప్రో ఏసియా, పసిఫిక్, ఇండియా, మిడిల్ ఈస్ట్ అండ్ ఆఫ్రికా  ప్రెసిడెంట్ అనిస్ చెంఛా మే 10న రాజీనామా చేశారు. ఆయన తర్వాత ఇప్పుడు అమిత్ చౌదరీ తప్పుకోవడం గమనార్హం. అంతకుముందు కూడా పలువురు విప్రోను వీడారు. ఇటీవలి కాలంలో జూనియర్, మిడ్ లెవెల్ ఉద్యోగుల సంఖ్య భారీగా తగ్గింది.

ఇక్కడ విశేషం ఏంటంటే.. డెలాపోర్టే, చెంచా, చౌదరీ ముగ్గురూ కలిసి ఫ్రాన్స్ ప్రధాన కేంద్రంగా ఉన్న క్యాప్ జెమినీ సంస్థలో పనిచేయడమే. వీరు ముగ్గురు వరుసగా ఒకరి తర్వాత రాజీనామా చేయడం చర్చనీయాంశంగా మారింది. డెలాపోర్టే విప్రో సీఈఓగా ఉన్న సమయంలోనే.. చెంఛా, అమిత్ చౌదరీ కూడా ఈ సంస్థలోకి వచ్చారు.

ఇప్పుడు సంజీవ్ జైన్.. చీఫ్ ఎగ్జిక్యూటివ్ ఆఫీసర్ అండ్ మేనేజింగ్ డైరెక్టర్ పల్లియాకు రిపోర్ట్ చేస్తారని, ఆయన ఇప్పటికీ విప్రో ఎగ్జిక్యూటివ్ కమిటీలో కొనసాగుతారని సంస్థ ఫైలింగ్‌లో తెలిపింది. సంజీవ్ జైన్.. విప్రోలో 2023లోనే చేరారు. బిజినెస్ ఆపరేషన్స్ గ్లోబల్ హెడ్‌గా చేశారు. అంతకుముందు ఈయన కాగ్నిజెంట్, జీఈ, ఐబీఎం వంటి పెద్ద పెద్ద సంస్థల్లో పనిచేశారు. ఈ రంగంలో ఆయనకు 30 సంవత్సరాలకు పైగా విశేష అనుభవం ఉంది. విభిన్న, పెద్ద బృందాలకు నాయకత్వం వహించడంలో, గ్లోబల్ ఆపరేషన్స్ పెంచడంలో విశేష అనుభవం ఆయన సొంతం. విప్రో ఆర్టిఫిషియల్ ఇంటెలిజెన్స్ శిక్షణ, అప్‌స్కిల్లింగ్ వ్యూహం అభివృద్ధిలో ఈయన కీలక పాత్ర పోషించినట్లు వెల్లడించింది సంస్థ.