చిన్నారుల కోసం బెస్ట్ స్కీమ్.. రోజుకు రూ. 18 ఆదాతో.. ఇలా చేతికి రూ. 3 లక్షలు

ఈ రోజుల్లో చాలా మంది సంపాదనతో పాటు పొదుపుపైనా ఆసక్తి చూపిస్తున్నారు. సంపాదించిన దాంట్లో కొంత మొత్తమైనా పొదుపు చేసుకునేందుకు చూస్తున్నారు. భవిష్యత్తులో పెరిగే ఖర్చులు.. ఇంకా అవసరాల దృష్ట్యా పొదుపు అనివార్యం అనే విషయాన్ని ప్రతి ఒక్కరు నమ్ముతున్నారు. ఇంకా ప్రభుత్వ రంగ సంస్థలు కూడా ఎన్నో రకాల సేవింగ్స్ స్కీమ్స్ ప్రవేశపెడుతుండటంతో చాలా మంది ఈ పథకాల పట్ల ఆకర్షితులు అవుతున్నారు. అయితే దాదాపు అన్ని రకాల పొదుపు పథకాలు పెద్దలకు సంబంధించినవే ఉంటాయి. కానీ పోస్టాఫీస్ కూడా కొన్ని రకాల ఇన్సూరెన్స్ సేవింగ్స్ పథకాల్ని అందిస్తుంది. బాల్ జీవన్ బీమా పథకం పేరిట తీసుకొచ్చిన ఈ పథకానికి సంబంధించిన వివరాలు తెలుసుకుందాం.

>> పోస్టాఫీస్ అందిస్తున్న రూరల్ ఇన్సూరెన్స్ స్కీమ్స్‌లో ఇదొకటి. రోజుకు రూ. 6 లేదా రూ. 18 చొప్పున ఆదాతో మెచ్యూరిటీ కల్లా చేతికి పెద్ద మొత్తంలో డబ్బులు వస్తాయని చెప్పొచ్చు. రోజుకు రూ. 6 పెట్టుబడితో మెచ్యూరిటీకి రూ. లక్ష రాబడి వస్తుంది. అదే రూ. 18 చొప్పున ఆదా చేసుకుంటూ పోతే రూ. 3 లక్షలు పొందొచ్చు. ఈ స్కీమ్ కేవలం చిన్నారుల కోసమే తీసుకొచ్చింది కేంద్రం. దీంట్లో చేరాలంటే 5 నుంచి 20 సంవత్సరాల వరకు ఉండాలి. పిల్లల పేరిట తల్లిదండ్రులు ఈ స్కీంలో పెట్టుబడి పెట్టొచ్చు. ఇంకా తల్లిదండ్రుల వయసు 45 సంవత్సరాలు మించకూడదు.

>> కుటుంబంలో గరిష్టంగా ఇద్దరు పిల్లలకు మాత్రమే ఈ స్కీంలో చేరే అవకాశం ఉంటుంది. ఉదాహరణకు.. మీకు ఇద్దరు పిల్లలు ఉంటే గనుక రోజుకు రూ. 36 చొప్పున ఆదా చేస్తూ పోతే మెచ్యూరిటీకి చేతికి రూ. 6 లక్షలు వస్తాయి. పాలసీ మెచ్యూరిటీకి ముందే పాలసీ హోల్డర్ మరణిస్తే.. ఆ సమయంలో ఇకపై పాలసీ ప్రీమియం చెల్లించాల్సిన అవసరం ఉండదు.

>> పాలసీ టెన్యూర్ ముగిసిన తర్వాత పిల్లలకు మెచ్యూరిటీ మొత్తం చెల్లిస్తారు. పాలసీ ప్రీమియంను తల్లిదండ్రులు చెల్లించాల్సి ఉంటుంది. పాలసీ మధ్యలో నుంచి వైదొలగాలనుకుంటే ఐదేళ్ల తర్వాత సరెండర్ చేయొచ్చు. ఈ స్కీంలో పెట్టిన ఇన్వెస్ట్‌మెంట్‌కు రూ. 1000 ప్రతి సంవత్సరం హామీ మొత్తం మీద రూ. 48 చొప్పున బోనస్ అందిస్తారు. ఈ స్కీంలో చేరాలంటే దగ్గర్లోని పోస్టాఫీసును సంప్రదించొచ్చు.