బ్యాంక్ అకౌంట్ ఉందా? డెబిట్ కార్డులపై ఎలాంటి ఛార్జీలు ఉంటాయో తెలుసా?

బ్యాంకు ఖాతాదారులు అందరికీ వారి సేవింగ్స్ అకౌంట్, కరెంట్ అకౌంట్లపై బ్యాంకులు కొన్ని ఛార్జీలు విధిస్తుంటాయి. డెబిట్ కార్డులపై సాధారణ ఛార్జీలు మాత్రమే కాకుండా ఉపయోగించుకునే తీరును బట్టి బ్యాంకులు కొన్ని ఛార్జీల్ని వసూలు చేస్తుంటాయి. అవేంటో ఇక్కడ తెలుసుకోండి. డెబిట్ కార్డులు అన్నింటిపైనా దాదాపు అన్ని బ్యాంకులు కూడా రుసుముల్ని వసూలు చేస్తున్నాయి. కార్డ్ వినియోగానికి సంబంధించి వార్షిక రుసుము సాధారణంగా రూ. 100 నుంచి రూ. 500 వరకు ఉంటుంది. ఈ ఛార్జీలు ఇంకా బ్యాంకుల్ని బట్టి మారుతుంటాయి. అంటే ఒక్కో బ్యాంక్ ఒక్కో రకంగా వసూలు చేస్తుందని చెప్పొచ్చు.

డెబిట్ కార్డు రీప్లేస్‌మెంట్ రుసుము

ఖాతాదారుడి ఏటీఎం/డెబిట్ కార్డు భౌతిక నష్టానికి (ఫిజికల్ డ్యామేజీ) గురైనప్పుడు, కార్డును భర్తీ చేసేందుకు కొన్ని బ్యాంకులు అదనపు రుసుముల్ని వసూలు చేయవు. కొన్ని బ్యాంకులు మాత్రం వీటికి కూడా రూ. 100 నుంచి రూ. 200 వరకు వసూలు చేస్తున్నాయి. ఒకవేళ కార్డు పోగొట్టుకొని కొత్త కార్డు పొందాలనుకుంటే మాత్రం అప్పుడు రూ. 300 వరకు ఛార్జీలు విధిస్తున్నాయి. ఖాతాదారులు డెబిట్, ఏటీఎం కార్డ్ పిన్ మరిచిపోయినట్లియితే అప్పుడు రూ. 50 నుంచి 100 వరకు నామమాత్రపు రుసుము తీసుకొని చాలా బ్యాంకులు కూడా డూప్లికేట్ పిన్‌ను ఖాతాదారుడి అడ్రస్‌కు పంపిస్తున్నాయి. ఆన్‌లైన్‌లో అయితే ఈ సౌకర్యం ఉచితంగా పొందొచ్చు.

క్యాష్ విత్‌డ్రాయల్ (నగదు ఉపసంహరణ) ఛార్జీలు

డెబిట్ కార్డులతో అన్ని బ్యాంకుల ఏటీఎంల నుంచి నగదు ఉపసంహరించుకునే అనుమతి ఉందన్న సంగతి తెలిసిందే. అయితే ఇతర బ్యాంకుల ఏటీఎంల దగ్గర ఉచిత ట్రాన్సాక్షన్లకు ఒక లిమిట్ ఉంటుంది. ఆ పరిమితి దాటితే వేరే ఏటీఎంల నుంచి నగదు తీసుకునే ప్రతి సారీ రూ. 10- రూ. 30 వరకు ఛార్జీ పడుతుంది.

>> ఇతర కరెన్సీలలో ట్రాన్సాక్షన్లు, విదేశాల్లో డెబిట్ కార్డు బ్యాలెన్స్ చెక్ చేసుకోవాలన్నా.. ఇంకా కార్డుతో చేసిన నగదు ఉపసంహరణలపైనా బ్యాంకులు రుసుముల్ని విధిస్తుంటాయి. ఈ ఛార్జీలు.. విత్‌డ్రాయల్ మొత్తంపై కొద్దిశాతంగా గానీ లేదా ప్రతి ట్రాన్సాక్షన్‌పైనా కొంత మొత్తంగా గానీ ఫిక్స్ చేయొచ్చు.

ఇంకా వ్యాపార సంస్థల దగ్గర కొనుగోళ్లు చేసినప్పుడు, కొన్ని చోట్ల చెల్లింపులు చేసినప్పుడు రుసుములు ఎక్కువగా ఉండవు. అయితే కొందరు డెబిట్ కార్డుతో పేమెంట్స్ చేసేటప్పుడు ఒక శాతం వరకు రుసుము వసూలు చేస్తారు. కొన్ని ఇంధన లావాదేవీలపై ఒక శాతం వరకు సర్‌ఛార్జీ విధించొచ్చు.