ఎస్‌బీఐ నుంచి కొత్త స్కీమ్.. జూన్ 27 నుంచి అందుబాటులోకి.. కనీస పెట్టుబడి ఎంతంటే

ఇటీవలి కాలంలో మ్యూచువల్ ఫండ్స్‌లో భారీగా పెట్టుబడులు పెడుతున్నారు. మీరు సైతం మ్యూచువల్ ఫండ్స్‌లో ఇన్వెస్ట్ చేయాలని భావిస్తున్నారా? కొత్త ఫండ్స్ లాంచ్ కోసం వేచి చూస్తున్నారా? అయితే ఇది మీకోసమే. స్టేట్ బ్యాంక్ ఆఫ్ ఇండియాకు చెందిన అనుబంధ సంస్థ ఎస్‌బీఐ మ్యూచువల్ ఫండ్స్ ఈక్విటీ ఇన్వెస్టర్లకు శుభవార్త అందించింది. ఒక కొత్త పథకాన్ని లాంచ్ చేసింది. అదే ఎస్‌బీఐ సిల్వర్ ఈటీఎఫ్ ఫండ్ ఆఫ్ ఫండ్. ఇది ఒక ఓపెన్ ఎండెడ్ ఫండ్ ఆఫ్ ఫండ్ స్కీమ్. ఎస్‌బీఐ సిల్వర్ ఈటీఎఫ్స్‌లో ఇన్వెస్ట్ చేస్తుంటుంది. ఈ కొత్త ఫండ్ ఆఫర్ సబ్‌స్క్రిప్షన్ ఈనెల జూన్ 27 వ తేదీన ప్రారంభమై జులై 5 వ తేదీతో ముగుస్తుంది.

' నేటి ప్రపంచ ఆర్థిక పరిస్థితుల్లో ద్రవ్యోల్బణాన్ని ప్రభావితం చేసే లోహలకు డిమాండ్ పెరిగింది. ప్రధాన లోహమైన బంగారం మాత్రమే కాకుండా సిల్వర్‌కి సైతం మంచి డిమాండ్ ఉంది. గిరాకీ పెరుగుతున్న క్రమంలో దీర్ఘకాలంలో వెండి విలువను పెంచడంలో సహాయపడుతుంది. అందువల్ల కమోడిటీల్లోకి మారాలని చూస్తున్న పెట్టుబడిదారులు సిల్వర్ ఈటీఎఫ్ లేదా ఫండ్ ఆఫ్ ఫండ్ ఆఫర్ ద్వారా పెట్టుబడి పెట్టడాన్ని ఎంచుకోవచ్చు. దీర్ఘకాలంలో మంచి వృద్ధి నమోదు చేసే అవకాశాలు ఉన్నాయి.' అని ఎస్‌బీఐ మ్యూచువల్ ఫండ్ ఎండీ, సీఈఓ శంషేర్ సింగ్ పేర్కొన్నారు.

వెండి ఒక విలువైన లోహం మాత్రమే కాదని, ఇది పారిశ్రామక లోహంగా పేర్కొన్నారు ఎస్‌బీఐ మ్యూచువల్ ఫండ్ డిప్యూటీ ఎండీ డీపీ సింగ్. దాని డిమాండ్ ఎలక్ట్రానిక్స్, పునరుత్పాదక ఇంధనం వంటి రంగాలలో ఎక్కువగా ఉంటుందన్నారు. ఇది వెండికి దీర్ఘకాలకి వృద్ధి సామర్థ్యాన్ని మెరుగుపరుస్తుదని, కమోడిటీలలో పెట్టుబడి పెట్టే పెట్టుబడిదారులకు ప్రయోజనం చేకూరుస్తుందన్నారు. కానీ, ప్రస్తుతం బంగారం కంటే ఎక్కువగా ప్రభావం చూపదన్నారు.

కొత్త స్కీమ్ ఎస్‌బీఐ సిల్వర్ ఈటీఎఫ్ అనేది 95 శాతం నుంచి 100 శాతం వరకు సిల్వర్, సిల్వర్ సంబంధిత రంగాలలో పెట్టుబడులు పెడుతుంది. మిగిలిన 5 శాతం వరకు ఉండే ఫండ్స్‌ని ప్రభుత్వ సెక్యూరిటీలైన ఎస్‌డీఎల్, ట్రేజరీ బిల్స్ వంటి వాటిల్లో ఇన్వెస్ట్ చేయనుంది. ఈ న్యూ ఫండ్ ఆఫర్‌ సబ్‌స్క్రిప్షన్‌లో ఒక అప్లికేషన్‌కు కనీస పెట్టుబడి రూ. 5000 గా నిర్ణయించారు. ఆ తర్వాత ఎంతైనా ఇన్వెస్ట్ చేయవచ్చు. ఈ ఫండ్ మేనేజర్‌గా హర్ష సేథిని నియమించింది ఎస్‌బీఐ.