పారిస్ ఒలింపిక్స్‌లో ,,,,టైటిల్ ఫేవరేట్‌ను చిత్తు చేసిన భారత షట్లర్

పారిస్ ఒలింపిక్స్‌లో మెన్స్ సింగిల్స్‌ బ్యాండ్మింటన్‌లో భారత షట్లర్ లక్ష్యసేన్  ఆల్ ఇంగ్లాండ్ ఛాంపియన్ జొనాథన్ క్రిస్టీని ఓడించాడు. వరల్డ్ నంబర్ 4 ప్లేయర్‌ను ఇంటి ముఖం పట్టించిన లక్ష్య సేన్.. ప్రి క్వార్టర్స్‌లో అడుగుపెట్టాడు. బ్యాడ్మింటన్ ర్యాంకింగ్స్‌లో 22వ స్థానంలో ఉన్న లక్ష్య సేన్.. జొనాథన్‌ను ఓడించడం ఇది రెండోసారి మాత్రమే కావడం విశేషం. అద్భుతమైన ఫామ్‌లో ఉన్న లక్ష్య సేన్.. 21-18, 21-12 తేడాతో వరుస సెట్లలో క్రిస్టీని ఓడించాడు. 2018 ఏషియన్ గేమ్స్‌లో స్వర్ణం సాధించిన క్రిస్టీని భారత షట్లర్ 50 నిమిషాల్లో మట్టి కరిపించాడు. పారిస్ ఒలింపిక్స్‌లో టైటిల్ ఫేవరేట్లలో ఒకరిగా బరిలోకి దిగిన జొనాథన్‌ను ఓడించడం ద్వారా లక్ష్య సేన్ అందరి దృష్టిని ఆకర్షించాడు.

ఈ విజయం ద్వారా ఒలింపిక్స్‌లో నాకౌట్ దశకు చేరుకున్న రెండో భారత మెన్స్ సింగిల్ షట్లర్‌గా లక్ష్య సేన్ రికార్డ్ క్రియేట్ చేశాడు. 2016 రియో ఒలింపిక్స్‌లో తెలుగు బ్యాడ్మింటన్ ప్లేయర్ కిదంబి శ్రీకాంత్ మాత్రమే ఇప్పటి వరకు ఈ ఘనత సాధించాడు. అయితే ఆ తర్వాత జరిగిన టోక్యో ఒలింపిక్స్‌లో శ్రీకాంత్ గ్రూప్ దశ దాటలేకపోయాడు. ఒలింపిక్స్ మ్యాచ్‌కు ముందు లక్ష్య సేన్‌పై జొనాథన్ క్రిస్టీదే పై చేయి. వీరిద్దరూ ఐదుసార్లు ముఖాముఖి తలపడగా.. నాలుగుసార్లు క్రిస్టీ గెలవగా.. లక్ష్య సేన్ ఒక్కసారి మాత్రమే గెలవగలిగాడు. ఈ ఏడాది ఆరంభంలో ఆల్ ఇంగ్లాండ్ ఓపెన్ సెమీఫైనల్ సహా రెండుసార్లు క్రిస్టీ చేతిలో సేన్ ఓడిపోయాడు. అయితే కీలక మ్యాచ్‌లో అద్భుతంగా ఆడిన సేన్.. తన కంటే బలమైన ప్రత్యర్థిని చిత్తు చేశాడు.

ఈ గేమ్ ఆరంభంలో క్రిస్టీ 5-0 ఆధిక్యంలోకి దూసుకెళ్లాడు. అయితే కీలక సమయంలో పుంజుకున్న సేన్.. ప్రత్యర్థిపై ఒత్తిడి తెచ్చాడు. దూకుడుగా ఆడిన లక్ష్య సేన్.. ఇంటర్వెల్ సమయానికి 11-10 తేడాతో ఆధిక్యంలోకి వెళ్లాడు. అయితే తన అనుభవాన్ని ఉపయోగించిన క్రిస్టీ.. భారత షట్లర్‌ మరింత ఆధిక్యంలోకి వెళ్లకుండా అడ్డుకున్నాడు. 16-18తో వెనుకంజలో ఉన్న దశలో వరుసగా ఐదు పాయింట్లు గెలిచిన సేన్.. తొలి గేమ్‌ను కైవసం చేసుకున్నాడు. ఈ క్రమంలో భుజం వెనుక నుంచి సేన్ ఆడిన షాట్ మ్యాచ్ మొత్తానికే హైలెట్‌గా నిలిచింది. ఈ షాట్‌కు ప్రేక్షకులతోపాటు నెటిజన్లు ఫిదా అయిపోయారు. తొలి గేమ్‌ను కైవసం చేసుకున్న సేన్.. రెండో గేమ్‌లో మరింత ఆత్మవిశ్వాసంతో ఆడాడు. ప్రేక్షకుల నుంచి మద్దతు లభించడంతో.. ఇండోనేసియన్ ప్లేయర్‌ను రెండో గేమ్‌లోనూ చిత్తు చేశాడు. లక్ష్య సేన్ ప్రి క్వార్టర్ మ్యాచ్‌లో భారత్‌కే చెందిన హెచ్ఎస్ ప్రణయ్‌తో తలపడే అవకాశం ఉంది.