పోరాడి ఓడిన లక్ష్యసేన్.. పురుషుల సింగిల్స్‌లో మలేషియా ఆటగాడి చేతిలో ఓటమి

పారిస్‌ 2024 ఒలింపిక్స్‌లో భారత్‌ మరో పతకం సాధించి అవకాశాన్ని కొద్దిలో చేజార్చుకుంది. పురుషుల బ్యాడ్మింటన్‌ సింగిల్స్‌లో కాంస్య పతక పోరులో భారత స్టార్‌ షట్లర్‌ లక్ష్యసేన్‌ పరాజయం పాలయ్యాడు. ప్రపంచ ఏడో ర్యాంకర్‌ మలేషియాకు చెందిన లీ జి జియా చేతిలో ఓడిపోయాడు. ఓ దశలో తొలి సెట్‌ను గెలుచుకున్న లక్ష్యసేన్.. కాంస్యం సాధించేలా కన్పించాడు. కానీ, అనూహ్యంగా ఆ తర్వాత రెండు సెట్లలోనూ ఓడి.. నిరాశగా వెనుదిరిగాడు.

 తొలి సెట్‌ను 21-13తో గెలుచుకున్న లక్ష్యసేన్‌ ఆ తర్వాత వరుసగా రెండు సెట్లలో 16-21, 11-21తో కోల్పోయాడు. దీంతో పతకం లేకుండానే ఒలింపిక్స్‌ నుంచి నిష్క్రమించాడు. కాగా సంచలన ప్రదర్శనతో సెమీస్‌కు దూసుకొచ్చిన 22 ఏళ్ల లక్ష్యసేన్.. బ్యాడ్మింటన్‌ పురుషుల సింగిల్స్‌లో సెమీ ఫైనల్‌ చేరిన తొలి భారత ప్లేయర్‌గా నిలిచాడు. పతకం సాధిస్తే.. మరో రికార్డు సాధించేవాడు.

ఇక పారిస్ ఒలింపిక్స్‌లో భారత్‌ ఇప్పటివరకు 3 పతకాలు సాధించింది. 10 మీటర్ల ఎయిర్‌ పిస్టల్‌ ఈవెంట్‌లో మను భాకర్‌ కాంస్యం పతకం సాధించింది. పారిస్‌ ఒలింపిక్స్‌లో భారత్‌కు ఇదే తొలి మెడల్‌ కావడం గమనార్హం. ఆ తర్వాత 10 మీటర్ల ఎయిర్‌ పిస్టల్‌ మిక్స్‌డ్‌ టీమ్ ఈవెంట్‌లో సరబ్జోత్‌ సింగ్‌తో కలిపి మను భాకర్.. రెండో కాంస్యపతకాన్ని కైవసం చేసుకుంది. పారిస్ ఒలింపిక్స్‌లో భారత్‌కు మూడో పతకం సైతం షూటింగ్‌లోనే దక్కింది. పురుషుల 50 మీటర్ల రైఫిల్‌లో షూటర్ స్వప్నిల్ కుశాలే కాంస్య పతకం సాధించాడు.

బాక్సింగ్‌లో తప్పకుండా పతకాలు సాధిస్తారనే అంచనాలతో బరిలోకి దిగిన లవ్లీనా బోర్గోహెయిన్‌, తెలంగాణ అమ్మాయి నిఖత్‌ జరిన్‌లు అంచనాలు అందుకోలేకపోయారు. టోక్యో 2020 ఒలింపిక్స్‌లో కాంస్య పతక విజేత పీవీ సింధు సైతం పతకం సాధించలేక నిరాశగా వెనుదిరిగింది. తాజా లక్ష్యసేన్ కూడా ఒట్టి చేతులతో వెనుదిరిగాడు.