ఆత్మవిశ్వాసంతో అమెరికాలో భారతీయ అంధుల క్రికెట్ జట్టు

దాదాపు రెండు నెలల అమెరికా పర్యటనకు వెళ్లిన ( జూలై 25 నుంచి సెప్టెంబర్ 17 వరకు) ‘భారతీయ అంధుల క్రికెట్ జట్టు’ మంగళవారం డాలస్‌లో పర్యటించింది. అక్కడ అగ్రరాజ్యంలోనే అతిపెద్ద మహాత్మాగాంధీ స్మారకస్థలిని సందర్శించి, జాతిపితకు ఘన నివాళులర్పించారు. మహాత్మాగాంధీ మెమోరియల్ ఆఫ్ నార్త్ టెక్సాస్ వ్యవస్థాపక అధ్యక్షులు డాక్టర్ ప్రసాద్ తోటకూర, కార్యదర్శి రావు కల్వాల, బోర్డు సభ్యుడు కమల్ కౌశల్, బాబీ, రవితో పాటు పలువురు ప్రవాసీ భారతీయులు వీరికి ఘనస్వాగతం పలికారు.

బోస్టన్, న్యూయార్క్, న్యూజెర్సీ, వాషింగ్టన్ డి.సి, చికాగో, డాలస్, లాస్ ఏంజిల్స్, సియాటెల్, ఏరియా లలో పర్యటిస్తున్న ఈ క్రికెట్ జట్టులో సమర్తనం ఇంటర్నేషనల్ ఛైర్మన్ డాక్టర్ మహంతేష్, టీం మేనేజర్ ధీరజ్ సెక్వేరియా.. ఆటగాళ్లు దున్న వెంకటేశ్వర రావు, సునీల్ రమేశ్, షుక్రం మాజిహ్, సంజయ్ కుమార్ షా, రవి అమితి, పంకజ్ భూ, నీలేష్ యాదవ్, నరేష్ తుందా, నకుల బడానాయక్, మహారాజ, లోకేష్, గుడ్డాడప్ప, దుర్గారావు తోమ్పాకి, దినేష్ రాత్వా, దినాగర్, దేబరాజ్ బెహరా, అజయ్ కుమార్ రెడ్డి ఉన్నారు.

వీరిలో కొంతమంది పూర్తిగా అంధులు, మరికొంత మంది పాక్షికంగా మాత్రమే చూడగల్గుతారు. ఈ అంధ క్రికెటర్లు వాడే బంతి సాధారణ బంతిలా కాకుండా శబ్దంచేసే కొన్ని మువ్వలు లాంటివి ఉంటాయి. బౌలర్ బంతి విసిరినప్పుడు, ఆ బంతి చేసే శబ్దం ఆధారంగా ఎటువైపు ఎంత వేగంతో బంతి వస్తుందో అంచనావేసి బ్యాట్స్‌మెన్ దానిని కొడతాడు. ఇప్పటికే ఎన్నో జాతీయ, అంతర్జాతీయ పోటీలలో పాల్గొని ఛాంపియన్స్ గా నిలిచిన ఈ భారత జట్టులో విజయవాడకు చెందిన అర్జున అవార్డు గ్రహీత అజయ్ రెడ్డి కూడా పాల్గొనడం విశేషం.

ఈ క్రికెట్ టీం విదేశీ పర్యటన మొత్తాన్ని ‘సుబ్బు కోట ఫౌండేషన్’స్పాన్సర్ చేసి ఆర్ధిక సహకారం అందించడం ముదావహం. వారు పర్యటిస్తున్న అన్ని నగరాలలో అంధులు క్రికెట్ ఎలా ఆడతారో తెలియజేస్తూ ఎగ్జిబిషన్ మ్యాచ్స్ ఆడుతూ తమ క్రికెట్ ఆటలు సుదీర్ఘ కాలం విజయవంతంగా కొనసాగడానికి కావలసిన ఆర్ధిక పరిపుష్టికోసం విరాళాలు సేకరిస్తున్నారు.